“ʻEletā Michael B. Strong,” Liahona, Mē 2024.
ʻEletā Michael B. Strong
Fitungofulu Taki Māʻolunga
Naʻe kamata hono ako ʻe ʻEletā Maikolo B. Situlongo ʻa e ongoongoleleí ʻi ʻapi, ʻa ia naʻe akoʻi ai ia ʻe heʻene ongomātuʻá.
Naʻe pehē ʻe ʻEletā Situlongo, “Kuo tupulaki ʻeku fakamoʻoní pea fakaʻau ke mālohi ange ʻi he fakalau ʻa e taimí, ʻo meimei ʻi ha ngaahi founga ʻoku ʻikai faʻa fakatokangaʻi.” ʻI heʻene manatu ki aí, “Kuo tā tuʻo lahi ʻeku mātā e toʻukupu ʻo e ʻOtuá ʻi heʻeku moʻuí, ka kuo fakaʻilongaʻi ia ʻaki ha ngaahi aʻusia loloto fakalaumālie mo mahuʻinga fau.”
ʻI heʻene ohi hake mo hono uaifí hona fāmilí, kuó na taumuʻa ʻaki ke fakakau ʻa e ongoongoleleí ʻi heʻenau moʻuí. Naʻe pehē ʻe ʻEletā Situlongo, “Kuó ma feinga ke tohi tongi ʻa e ongoongoleleí ko ha konga ʻo ʻemau moʻuí. Ko e tuʻunga ia ʻoku mau ʻi aí.”
Naʻe maʻu ʻe ʻEletā Situlongo ha mataʻitohi BA ʻi he microbiology mo ha mataʻitohi hono ua ʻi he kemisitulií mei he ʻUnivēsiti Pilikihami ʻIongí ʻi he 1989 pea mo ha mataʻitohi fakafaitoʻo mei he Baylor College of Medicine ʻi he 1993.
Kuó ne hoko ko ha toketā, pea ʻi he taimi naʻe uiuiʻi ai iá, naʻá ne ngāue ko ha ʻōfisa maʻu-fakamatala fakafaitoʻo maʻá e ʻUnivēsiti ʻo ʻIutaá.
Kuo ʻilo ʻe ʻEletā Situlongo ko e taimi kuó ne fehangahangai ai mo e ngaahi palopalemá, kau ai e ngaahi palopalema ʻi heʻene ngāué, kuo tataki ia ki ha ngaahi solovaʻanga he kuó ne lotua ʻa e ngaahi faingataʻa ko iá. Naʻá ne pehē, “Naʻe lava pē ke u ongoʻi hono ʻomi ʻe he ʻEikí ha ngaahi fakakaukaú mo ʻEne ʻai ke mahino kiate au ʻa e ngaahi solovaʻangá ʻa ia naʻe ʻikai ke u mei mamata ki aí. Kuó u fakatokangaʻi ʻokú Ne tokanga moʻoni kiate kitautolu.”
ʻI he taimi ne uiuiʻi ai ʻa ʻEletā Situlongo ke hoko ko ha Fitungofulu Taki Māʻolungá, naʻá ne lolotonga hoko ko ha Fitungofulu Fakaʻēlia ʻi he ʻĒlia ʻIutaá. Kuó ne hoko foki ko e palesiteni ʻo e Misiona Perú Lima Central, palesiteni fakasiteiki, pīsope, mo ha faifekau taimi kakato ʻi he Misiona Bolivia Cochabamba.
Naʻe fāʻeleʻi ʻa Maikolo Peleni Situlongo ʻi Sōleki Siti ʻi he ʻaho 6 ʻo ʻAokosi 1965. Naʻá ne mali mo Kilisitina Konelī ʻi he ʻaho 22 ʻo ʻAokosi 1987, ʻi he Temipale Salt Late. Ko ha ongomātuʻa kinaua ki ha fānau ʻe toko ono. ʻOku nofo ʻa ʻEletā mo Sisitā Situlongo ʻi Senitāvila, ʻIutā, USA.