ʻEletā I. Raymond Egbo

Fitungofulu Taki Māʻolunga

Lolotonga ʻa e ako ʻa ʻEletā I. Leimoni ʻEkipou ʻi ha ʻapiako nofomaʻu fakalotu ʻi Naisīliá, naʻe toutou fakaafeʻi ia ʻe hono tuofefine lahí ke ne “haʻu ʻo mamata” ki he meʻa naʻe akoʻi ʻe he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. ʻI hono taʻu 14, naʻá ne kamata ʻalu ki he seminelí ʻi he efiafí.

Lolotonga hono lau ʻe ʻEletā ʻEkipou ʻa e lēsoni ki he kalasi seminelí, naʻá ne lau ʻa e Tokāteline mo e Ngaahi Fuakava 135 pea mo hono fakapoongi ʻo Siosefa Sāmitá.

Naʻe pehē ʻe ʻEletā ʻEkipou, ʻa ia naʻe ʻikai fuoloa mei ai kuó ne kau ki he Siasí, “Naʻe ongo mālohi moʻoni ha meʻa kiate au ʻo u ʻiloʻi ko e Palōfita ko Siosefa Sāmitá ko ha palōfita ia ʻa e ʻOtuá. Naʻá ku ʻiloʻi naʻe fakapoongi ia koeʻuhí ko e moʻoní. ʻOku ou kei ongoʻi pē he taimí ni ʻa e ongo naʻá ku maʻu ʻi he ʻaho ko iá ʻi he taimi ʻoku ou lau ai iá.”

Kimui angé, lolotonga ʻene kei ako he ʻunivēsití, naʻe poupouʻi ia ʻe hono tuofefiné ke ne ʻalu ʻo ngāue fakafaifekau. Naʻe ʻita ʻena tamaí ʻi heʻene mavahe mei he akó, ka naʻe faitohi mai maʻu pē ʻa ʻEletā ʻEkipou kiate ia ʻo fakamatalaʻi ʻa e meʻa kotoa pē naʻá ne faí mo e meʻa naʻá ne akoʻí.

Naʻe ʻohovale ʻa ʻEletā ʻEkipou ʻi he fakaʻosiʻosi ʻene ngāue fakafaifekaú, naʻe lau ange ʻe heʻene palesiteni fakamisioná ha tohi mei heʻene tangataʻeikí ʻa ia naʻe pehē ai kuó ne ʻosi papitaiso. Naʻe tohi mai ʻene tamaí ʻo pehē, “Talaange ki ai te u tatali atu pē ki ai.”

Naʻe fāʻeleʻi ʻa ʻEletā ʻItiō Leimoni ʻEkipou ʻi Taulanga Hākoti, Liva Siteiti, Naisīlia, ʻi he ʻaho 25 ʻo Sune 1974, kia ʻUto ʻItio ʻEkipou mo Velonika ʻUkamaka ʻEkipou. Naʻá ne fetaulaki mo Komifoti ʻIkipi ʻEse ʻi he taimi naʻe hiki mai ai hono fāmilí ki he kolo naʻe lotu ai [ʻa ʻEletā ʻEkipoú] ʻi he 1994. Naʻá na mali ʻi he ʻaho 15 ʻo Mē 2003, ʻi Kalapā, Naisīlia. ʻOku ʻi ai haʻana fānau ʻe toko tolu.

ʻOku maʻu ʻe ʻEletā ʻEkipou ha ʻū mataʻitohi ʻi he faiakó, palani kelekelé, mo hono puleʻi ʻo e pisinisí mei ha ʻunivēsiti ʻe tolu. Kuó ne ngāue ʻi he Seminelí mo e ʻInisititiuti Fakalotú talu mei he 2002 ʻi ha ngaahi lakanga kehekehe, kau ai ʻene hoko ko ha talēkita fakafonua mo e talēkita fakaʻēlia.

ʻI hono uiuiʻi ʻo ʻEletā ʻEkipoú, naʻá ne lolotonga ngāue ko ha Fitungofulu Fakaʻēlia ʻi he ʻĒlia ʻAfilika Hihifó. Kuó ne hoko ko e palesiteni ʻo e Misiona Nigeria Calabar pea kuó ne hoko ko ha tokoni ʻi he kau palesitenisī fakasiteikí mo ha aleaʻanga māʻolunga. Naʻá ne ngāue fakafaifekau taimi kakato ʻi he Misiona Nigeria Lagos.