ʻEletā Christopher H. Kim

Fitungofulu Taki Māʻolunga

ʻI he taimi naʻe taʻu 14 ai ʻa ʻEletā Kulisitofā H. Kimí pea maʻu hano faingamālie ke vahevahe ʻa e ongoongoleleí mo hono ngaahi kaungāmeʻá, naʻá ne fakatokangaʻi naʻe fiemaʻu ke ne ʻiloʻi ʻa e moʻoni ʻo e Tohi ʻa Molomoná kae lava ke ne lea ʻi he loto-fakapapau.

ʻOkú ne manatu ʻo pehē, “ʻI heʻeku lotua e Tohi ʻa Molomoná, naʻá ku maʻu ha ongo naʻe fakafiemālie ki hoku laumālié. Pea fakafokifā pē, naʻe ʻikai ha toe fehuʻia pe tālaʻa kau ki he Tohi ʻa Molomoná.” Naʻá ne toe pehē, ko e fuofua taimi ia ʻi heʻene moʻuí “Ke u ongoʻi moʻoni ʻa e Laumālié, ʻiloʻi ʻa hono moʻoni ʻo e Tohi ʻa Molomoná, peá u ʻiloʻi ko Siosefa Sāmitá ko ha palōfita ia ʻa e ʻOtuá.”

Naʻe fāʻeleʻi ʻa Kulisitofā Haiunusu Kimi ʻi he ʻaho 18 ʻo Nōvema 1965, ʻi Taiku, Kōlea Tonga, ko e lahi taha ia ʻi he fānau ʻe toko fā ʻa Siniho Kimi mo Kunisa Kimí. Naʻe kau ʻene ongomātuʻá ki he Siasí ʻi heʻene kei pēpē valevalé. Naʻe nofo ʻa ʻEletā Kimi ʻi Taiku ʻo aʻu ki heʻene ʻosi mei he ako māʻolungá pea hikifonua hono fāmilí ki he ʻIunaiteti Siteití, ʻo nofo ʻi he Fakatonga ʻo Kalefōniá.

Lolotonga ʻene ngāue fakafaifekau ʻi he Misiona Washington Seattle, naʻe ngāue fakafaifekau ʻa Sisitā Seongimi (Sū) Hongo ʻi he Misiona California Los Angeles. Lolotonga ʻene ʻi aí, naʻá ne maheni ai mo e faʻē ʻa ʻEletā Kimí. ʻI he ʻosi ʻa e ngāue fakafaifekau ʻa ʻEletā Kimi mo Sisitā Hongo kimui aí, naʻe kamata ke na teiti. Naʻá na mali ʻi he ʻaho 7 ʻo Tīsema 1991 ʻi he Temipale Los Angeles California. ʻOku ʻi ai haʻana foha ʻe toko taha mo e ʻofefine ʻe toko tolu.

Naʻe ʻosi ʻa ʻEletā Kimi mei he ʻUnivēsiti Pilikihami ʻIongí mo ha mataʻitohi BA ʻi he sōsiolosiá ʻi he 1995 pea mo ha MA ʻi he fakalele pisinisí ʻi he 1997. Hili ʻene akó, naʻá ne ngāue ʻi he ʻIunaiteti Siteití, Taileni, mo Kōlea Tonga. Talu mei he 2005, kuó ne ngāue maʻá e Unicity International, ko ha kautaha ʻi ʻIutā ʻoku nau ngaohi e meʻakai fakatupu moʻui leleí mo e meʻa-teuteú, ko e fakamuimuitahá naʻá ne hoko ko e palesiteni ʻo e ngaahi māketi fakaemāmani lahí, ʻoku ʻuluʻi ʻōfisi ʻi Soulu, Kōlea Tonga.

Kuo hoko ʻa ʻEletā Kimi ko ha Fitungofulu Fakaʻēlia talu mei he 2019. Kuó ne hoko foki ko ha palesiteni fakasiteiki, tokoni palesiteni fakasiteiki, palesiteni misiona fakasiteiki, mo ha aleaʻanga māʻolunga.