“Palesiteni Paul V. Johnson,” Liahona, Mē 2024.
Palesiteni Paul V. Johnson
Palesiteni Lahi ʻo e Lautohi Faka-Sāpaté
Talu mei he hoko ʻa e Palesiteni Lahi ʻo e Lautohi Faka-Sāpaté ko Paula V. Sionisoní ko ha faiako seminelí ʻo aʻu ki he taʻu ʻe hiva naʻá ne hoko ai ko e komisiona ʻo e ako ʻa e Siasí, kuo lahi haʻane aʻusia ʻi hono akoʻi ʻo e ongoongoleleí. Ka ʻokú ne pehē ko e ʻulungaanga mahuʻinga taha ʻokú ne ʻomi ki hono uiuiʻi foʻoú, “ko ʻeku ʻofa ki heʻeku Tamai Hēvaní pea mo e Fakamoʻuí pea mo ʻeku ʻofa ki he kakai kei talavoú mo e kakai kehé foki.”
Naʻe fāʻeleʻi ʻa Palesiteni Sionisoni ʻi he ʻaho 24 ʻo Sune 1954 ʻi Keinesivili, Folōlita, USA kia Vea Sionisoni mo Uinifeleti ʻAmasa. Kimuʻa peá ne taʻu tahá, naʻe hiki ʻene ongomātuʻá ki Lōkani, ʻIutā, USA, ʻa ia naʻá ne tupu hake ai mo hono ngaahi tokoua mo e tuofāfine ʻe toko fitu.
Naʻá ne maheni mo hono uaifi ʻi he kahaʻú ko Sila Uasipení, ʻi he taimi naʻe fakaafeʻi ai ia ke vaʻinga ʻakapulu ʻi he ako māʻolungá ʻi Monitiselo, ʻIutā, ʻe ha faiako mālōlō naʻe hiki mai mei Lōkani. Naʻe ʻosi fetaulaki pē ʻa Paula mo Sila kimuʻa, ka naʻá na kaungāmeʻa ʻeni lolotonga ʻena kau ki he uooti mo e kalasi semineli tatau pē. Naʻe faitohi ʻa Sisitā Sionisoni kiate ia lolotonga ʻene ngāue fakafaifekau taimi kakato ʻi Noauē.
Naʻá na mali ʻi he ʻaho 18 ʻo ʻAokosi 1976, ʻi he Temipale Logan Utah. ʻOku ʻi ai haʻana fānau ʻe toko 9 mo e makapuna ʻe toko 43.
Kuo fehangahangai ʻa e fāmili Sionisoní mo ha ngaahi faingataʻa lahi, mei he mālōlō hona ʻofefiné he kanisaá ki heʻena fefaʻuhi mo ʻena ngaahi fokoutua fakaemoʻui leleí. Ka naʻe pehē ʻe Palesiteni Sionisoni kuo tākiekina ʻe he ngaahi aʻusia ko iá ʻa ʻene fakakaukau ki he palani ʻa e ʻOtuá. Naʻá ne pehē, “ʻOku ou tui ʻokú ne ʻai au, ʻi heʻeku hoko ko ha faiakó, ke u tokoniʻi ʻa e toʻu tupú ke nau pikitai ki he Fakamoʻuí pea ki heʻenau Tamai Hēvaní.”
Naʻe maʻu ʻe Palesiteni Sionisoni ha mataʻitohi BA ʻi he tafaʻaki ki he ako ki he fanga monumanú (zoology) ʻi he 1977 mo ha mataʻitohi MA ʻi he faifaleʻí mo e faifakahinohinó ʻi he 1978, mei he ʻUnivēsiti Pilikihami ʻIongí fakatouʻosi. Naʻe maʻu hono mataʻitohi toketā ʻi he faiakó mei he ʻUnivēsiti ʻo e Siteiti ʻIutaá ʻi he 1989.
Naʻe hikinimaʻi ʻa Palesiteni Sionisoni ko ha Fitungofulu Taki Māʻolunga ʻi ʻEpeleli 2005 pea kuó ne hoko ko ha mēmipa ʻo e Kau Palesitenisī ʻo e Kau Fitungofulú talu mei he ʻaho 1 ʻo ʻAokosi 2021. Kuó ne hoko ko ha tokoni ʻi he Kau Palesitenisī Fakaʻēlia ʻo ʻIulopé, tokoni ʻi he Kau Palesitenisī Fakaʻēlia ʻo Sileí, tokoni palesiteni fakasiteiki, mo ha pīsope.
ʻE foaki kiate ia ʻa e tuʻunga mālōlō fakalāngilangí, ʻo kamata mei he ʻaho 1 ʻo ʻAokosi 2024, ʻi he kamata ʻi hono uiuiʻi foʻoú.