ʻEletā Gregorio E. Casillas

Fitungofulu Taki Māʻolunga

Naʻe fāʻeleʻi ʻa Kelekōlio ʻEnilike Kasilasi ʻi Tihuana, Pasa Kalefōnia, Mekisikou, ʻi he ʻaho 26 ʻo ʻAokosi 1975. Naʻá ne nofo ai ʻo aʻu ki heʻene ngāue fakafaifekau taimi kakato ʻi he Misiona Mexico Tampico.

Naʻá ne sila mo ʻAlemā ʻEniselina ʻOpeso Konisālesi ʻi he Temipale San Diego California ʻi Sune 1999. Ko e mātuʻa kinaua ki ha fānau ʻe toko tolu.

Kimuʻa peá na malí, naʻá na nofo māvahevahe ʻi ha maile ʻe 100 (161 km) lolotonga e ako [ʻa ʻEletā Kasilasi] ʻi Tihuana, pea ako [ʻa Sisitā Kasilasi] ʻi Mekisikali. ʻI he ngaahi māhina kimuʻa peá na malí, naʻá na lotu mo ʻaukai ke ʻiloʻi ʻa e feituʻu ke na nofo mo kamata ai hona fāmilí. ʻOku manatuʻi ʻe ʻEletā Kasilasi ʻa e ongo naʻá ne maʻu mei he Laumālie Māʻoniʻoní.

Naʻe pehē ʻe ʻEletā Kasilasi, “ʻOku ou manatuʻi naʻe lolotonga ʻema ʻaukaí, ne u fanongo ki he folofola mai ʻa e ʻEikí ʻo pehē, ʻKapau ko hoʻomo moʻungá ʻoku hangē ko La Lumolosá [ko ha moʻunga lahi ʻoku tuʻu ʻi he vahaʻa ʻo ha ongo kolo], te u toʻo ia.’”

Naʻá ne pehē naʻe fakafaingamālieʻi ʻe he ʻEikí ʻa e founga ke fakataha ai ʻa e ongomeʻá ki Mekisikali ʻi he taimi naʻe tali taʻeʻamanekina ai ʻe he ʻunivēsiti aí ke ne hiki ange ʻo ako aí.

Naʻá ne pehē, ko e taimi naʻá na ʻi Mekisikali aí “naʻá ma fetaulaki ai mo e kakai naʻe fiemaʻu ke ma fetaulaki mo iá. Pea naʻá ma ngāue ʻi he ngaahi uiuiʻi naʻe fiemaʻu ke ma ngāue ai.”

Naʻe hoko ʻa e aʻusia ko ʻení ke fokotuʻu ai ha sīpinga ki heʻena moʻui fakatahá. Naʻe pehē ʻe ʻEletā Kasilasi, “Ko e taimi ʻoku tau fakamuʻomuʻa ai ʻa e ʻOtuá, ʻe tonu ʻa e ngaahi meʻa kotoa pē. ʻOku fiemaʻu pē ke te kiʻi tui mo kiʻi ngāue, pea ʻe toki fakamafao mai leva ʻe he ʻEikí Hono toʻukupú ke tāpuekina kitautolu.”

Naʻe maʻu ʻe ʻEletā Kasilasi hono mataʻitohi BA ʻi he ʻenisinia sivilé mei he Universidad Autónoma de Baja California. Naʻá ne maʻu foki mo ha mataʻitohi MA ʻi he puleʻi pisinisí mei he ʻUnivēsiti Xochicalco. Kuó ne ngāue ʻi hono puleʻi e polōseki langá pea kimuí ni maí naʻá ne hoko ko e pule fakaʻēlia ki he ngaahi naunau ʻo e temipalé ʻi he ʻĒlia ʻa e Siasí ʻi Mekisikoú.

Kuo hoko ʻa ʻEletā Kasilasi ko ha Fitungofulu Fakaʻēlia, palesiteni fakamisiona ʻi he Misiona Mexico Mexico City South, palesiteni fakasiteiki, pīsope, aleaʻanga māʻolunga, palesiteni kōlomu kaumātuʻa, mo e palesiteni ʻo e Kau Talavoú ʻi he uōtí.