“ʻEletā D. Martin Goury,” Liahona, Mē 2024.
ʻEletā D. Martin Goury
Fitungofulu Taki Māʻolunga
ʻI he tupu hake ʻa ʻEletā D. Māteni Kouli ʻi ha kiʻi kolo siʻisiʻi ʻi Kouti ti ʻAivolií, naʻá ne fakaʻānaua ke hoko ko ha faifekau mo tokoni ki he niʻihi kehé.
Lolotonga ʻene ʻi Lonitoni, ʻIngilani ʻi ʻOkatopa ʻo e 1992 ke ako ʻa e lea faka-Pilitāniá mo feinga akó, naʻá ne fetaulaki ai mo ha ongo faifekau ʻo e Kau Māʻoniʻoni ʻi he Ngaahi ʻAho Kimui Ní. Naʻe ʻoange ʻe he ongo faifekaú, ko e taha ‘iate kinaua ko e faifekau lea faka-Falanisē pē ia ʻe taha ʻi Lonitoní, ha tatau ʻo e Tohi ʻa Molomoná ʻi he lea faka-Falaniseé kia ʻEletā Kouli.
Naʻá ne kamata lau e tohí pea ʻikai fuoloa kuó ne maʻu ha fakamoʻoni ki hono moʻoní. ʻI he taimi naʻe haʻu ai ha ongo faifekau foʻou ki hono ʻapi nofoʻangá hili ha ngaahi māhina siʻi mei aí, naʻá ne kau ki he Siasí. Naʻá ne pehē, “ʻOku ou manatuʻi ʻeku fuʻu fiefia lahí.”
Naʻe tupulaki ʻene fiefiá ʻi hono akoʻi ia ʻe he ongo faifekaú fekauʻaki mo e lakanga fakataulaʻeikí. Naʻe pehē ʻe ʻEletā Kouli, “Naʻá na fakamatalaʻi ʻa e ʻuhinga ʻo e lakanga fakataulaʻeikí mo e founga ʻe lava ke u fakaʻaongaʻi ai ia ke tokoni ki he niʻihi kehé. Kiate aú, ko hano fakahoko ia e meʻa naʻá ku faʻa fakaʻānaua ki aí. Naʻá ku vēkeveke.”
Naʻe fāʻeleʻi ʻa Talepe Mateni Kouli ʻi he ʻaho 30 ʻo Sānuali 1964, kia ʻIolo Kouli Maulisi mo Paame Keipi ʻOteti. Naʻá ne tupu hake ʻi ha kolo ko Lehipa pea mo e ongo kolo ko ʻOume mo Kakinoa. Naʻá ne mali mo Lute Simoni Keningitoni ʻi he Temipale London England ʻi he ʻaho 8 ʻo ʻEpeleli 1995. ʻOkú na nofo ʻi ʻApitasani, Kouti ti ʻAivolī, pea ʻoku ʻi ai haʻana fānau ʻe toko fā.
Naʻe maʻu ʻe ʻEletā Kouli hono mataʻitohi BA ʻi he faiakó mei he CAFOP (Ngaahi Senitā Akoʻanga Fakaakó mo e Tā Fakatātaá) ti Mani ʻi he 1988 mo e ʻenisinia fakamīsiní mei he ʻUnivēsiti ʻo e Pangikē Lonitoni Sauté ʻi he 1997. Kuó ne ngāue ko ha faiako lautohi puleʻanga, ʻenisinia tā-fakatātā, pule polōseki māʻolunga, mo e tokoni talēkita polōseki maʻá e Cameron, pule ʻo e ngaahi ngāue ʻa Naisīlia ki he OneSubsea Services, mo e pule ngāue fakafonua maʻá e Schlumberger. Kimuí ni maí, naʻe ngāue ʻa ʻEletā Kouli maʻá e Siasí ko ha kouʻōtineita tokoni ki he takí mo e mēmipá.
Naʻá ne hoko ko ha Fitungofulu Fakaʻēlia ʻi he ʻĒlia ʻAfilika Hihifó ʻi he taimi naʻe uiuiʻi ai iá. Naʻá ne hoko kimuʻa ko e palesiteni ʻo e Misiona Benin Cotonou, pīsope, tokoni pīsope, palesiteni fakakolo, mo e palesiteni ʻo e kōlomu ʻo e kaumātuʻá.