Ngāue Fakaetauhi ʻa e Kau Palesitenisī ʻUluakí

ʻI ha pōpoaki mītia fakasōsiale naʻe vahevahe ʻi he ʻaho 14 ʻo Fēpueli 2024, naʻe fakaafeʻi ai ʻe Palesiteni Lāsolo M. Nalesoni ʻa e tokotaha kotoa pē ke nau fakaʻaongaʻi ʻa e ʻAho Valenitainé ko ha fakamanatu ke toe tukupā ke ʻofa ʻi honau kaungāʻapí. Naʻe pehē ʻe Palesiteni Nalesoni ko e ʻaho ia ʻoku fakafiefiaʻi ai ʻe he kakaí ʻi māmani fulipē ʻa e ʻofá. Neongo ʻe lava ke fekauʻaki ʻa e ʻofá he taimi ʻe niʻihi mo e matalaʻiʻakaú, sokoletí, mo e ʻū meʻaʻofá, ka “ʻoku akoʻi mai ʻe he fekau lahi hono uá ha faʻahinga ʻe taha ʻo e ʻofá—ʻa ia ko e ʻofa maʻu pē ʻi hotau kaungāʻapí.”

ʻI he ʻaho 15 ʻo Fēpuelí, naʻe talitali lelei ai ʻe Palesiteni Nalesoni mo hono ongo tokoní ʻa e palesiteni ʻo e Puleʻanga Navahoó ko Toketā Piu Naikeleni mo hono uaifí, Sesimani Pelekiuota-Naikeleni, ki he Temipale Sikueá. ʻOku tukupā ʻa Toketā Naikeleni ke ʻave ʻa e ngaahi fiemaʻu vivili hangē ko e vaí, ʻuhilá, mo e hala leleí ki he ʻapi kotoa pē ʻi Navahō. ʻI he ngaahi taʻu kimui ní, kuo tokoni ʻa e Siasi ʻo Sīsū Kalaisí ke ʻave ha niʻihi ʻo e ngaahi meʻa ko iá ki he Puleʻanga Navahoó.

Lolotonga e fakamafola ʻo e Kaumeʻa ki he Kaumeʻá ʻi he ʻaho 9 ʻo Māʻasí, naʻe lea ʻa Palesiteni Tāleni H. ʻOakesi, Tokoni ʻUluaki ʻi he Kau Palesitenisī ʻUluakí, mo hono uaifi ko Kilisitení, ki haʻana makapuna ua ʻe toko fitu ʻoku nau ʻi he toʻu Palaimelí ʻo fekauʻaki mo e founga ke fanongo ai ki he Laumālie Māʻoniʻoní pea mo e meʻa ʻoku fai ʻe he Laumālie Māʻoniʻoní—fakatokanga, fakafiemālieʻi, fakamoʻoni, fakahinohino, akoʻi, mo ha ngaahi meʻa lahi ange.

Naʻe pehē ʻe Palesiteni ʻOakesi, “ʻOku fakafanongo ʻa e kau ākonga ʻa Sīsū Kalaisí kia Sīsū Kalaisi. Taimi ʻe niʻihi ʻokú Ne ʻomi ha ongo kiate kitautolu, pea taimi ʻe niʻihi ko ha foʻi fakakaukau. ʻOku tau ongoʻi Hono leʻó he taimi ʻe niʻihi. Kuo kole mai ʻe Palesiteni Nalesoni ko hotau palōfitá, ke tau fanongo ki hotau Fakamoʻuí mo fakafanongo kiate Ia.”

Hili ha taʻu ʻe 61 ʻo ʻena nofo-malí, naʻe lea māvae fakataimi ʻa Palesiteni Henelī B. ʻAealingi, ko e Tokoni Ua ʻi he Kau Palesitenisī ʻUluakí, ki hono uaifi ko Kefiliní, ʻa ia naʻe mālōlō ʻi he ʻaho 15 ʻo ʻOkatopa 2023. Kuo pehē ʻe Palesiteni ʻAealingi, “Kuo hoko maʻu pē ʻa Kefilini ko ha tokotaha naʻá ne ʻai au ke u loto ke hoko ko e lelei taha te u ala lavá.”

ʻI he ʻaho 24 ʻo Māʻasí, naʻe fakatapui ai ʻe Palesiteni ʻAealingi ʻa e Temipale Red Cliffs Utah ʻi Seni Siaosi, ʻIutā, USA. Lolotonga ʻa e ouau fakatapuí, naʻá ne pehē ai, “Te ke maʻu ha fiefia ʻi hoʻo ngāue ʻi hení ʻa ia ʻoku ʻikai maʻu ʻi ha toe founga kehe.”