Ngaahi Ongoongo ʻo e Siasí

ʻOku Maʻu ʻe he Siasí ʻa e Temipale Ketilaní, mo ha Koloa Kehe

ʻI he ʻaho 5 ʻo Māʻasi 2024, naʻe liliu fakaʻofisiale ʻa e fatongia mo e tauhi ʻo e Temipale Ketilani ʻi ʻOhaioó, ko ha ʻū fale fakahisitōlia kehekehe ʻi Nāvū, ʻIlinoisi, mo ha ʻū tohi mo e koloa fakakuongamuʻa kehekehe mei he Komiunitī ʻo Kalaisí ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻaki ha mahuʻinga naʻe felotoi ki ai.

Naʻe fakatapui ʻa e Temipale Ketilaní ʻi he 1836 (vakai, Tokāteline mo e Ngaahi Fuakava 109–110), ka naʻe ʻikai fuoloa mei ai naʻe pau ke liʻaki ia ʻe he Kāingalotú koeʻuhí ko e fakatangá. Hili ʻa e liliu kimuí ni ʻo e tokotaha ʻoku ʻoʻona ʻa e kelekelé, naʻe tāpuni ʻa e temipalé ʻi ha kiʻi taimi nounou ka naʻe toe fakaava ia ʻi he ʻaho 25 ʻo Māʻasí ke mamataʻi ʻe he kakaí ʻo ʻikai ha totongi. ʻE kei hoko pē ia ko ha fale fakahisitōlia.

Ko e meʻa tatau pē naʻe hoko ʻi Nāvū ki he ʻApi ʻo e Fāmili Sāmitá, ko e Fale Lahí (ʻa e ʻapi ʻo Siosefa mo ʻEma mei he 1843 ʻo aʻu ki he pekia [ʻa Siosefa] ʻi he 1844), pea mo e Falekoloa Piliki Kulokulá (ʻa ia naʻe fokotuʻu ai ʻa e Fineʻofá), naʻe toe fakaava foki mo ia ki he kakaí ʻo ʻikai ha totongi.