“ʻEletā Karl D. Hirst,” Liahona, Mē 2024.
ʻEletā Karl D. Hirst
Fitungofulu Taki Māʻolunga
ʻOku lau ʻe ʻEletā Kali D. Hesi ia ko ha “tokotaha angamaheni pē ʻi ha uiuiʻi kāfakafa.”
ʻOku fakakaukau ʻa e Fitungofulu Taki Māʻolunga foʻoú ki heʻene fakamoʻoní mo hono ngaahi fakapapaú ko ha ngaahi meʻa angamaheni pē foki mo ia. Naʻe pehē ʻe ʻEletā Hesi, “ʻOku ʻikai ha ʻaʻahi fakalangi mai, pea halaʻatā pē mo ha meʻa ʻe fakaholomamata fakalaumālie—pea kuo ʻikai ke u toe hohaʻa ki ai koeʻuhí he ʻoku ou fiemālie pē ʻi he founga kuo fili ai ʻe he ʻOtuá ke folofola mai kiate aú, neongo kapau ʻokú Ne fili ke folofola ki he kakai kehé ʻi ha founga kehe. ʻOku ʻikai fakaholomamata, ka ʻoku mahutafea ia.”
Naʻe fakalele ʻe Siaki, ko e tamai ʻa ʻEletā Hesí, ha kiʻi falekoloa ʻi he loto koló. Naʻá ne ʻilo ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻo fakafou ʻi he kau kasitomaá pea naʻá ne kau ki he Siasí hili ha ngaahi taʻu lahi mei hono fāʻeleʻi ʻo Kali ʻi he ʻaho 28 ʻo Fēpueli 1972, ʻi Puli, Lanikāsia, ʻIngilani.
Naʻe kamata e fakamoʻoni ʻa ʻEletā Hesi kia Sīsū Kalaisí ʻi he taimi naʻá ne ako ai ha ngaahi talanoa ʻo e Fakamoʻuí mo hivaʻi ha ngaahi himi lolotonga ʻene ʻalu ʻo Lautohi Faka-Sāpate ʻi ha siasi kehe ʻi heʻene kei siʻí mo ʻene faʻē ko Viviena Lute Meakini Hesí, mo ʻene kui fefiné.
Kimui angé, naʻe maʻu lotu ʻa e talavou ko Kalí ʻi he ngaahi fakatahaʻanga ʻa e Siasí peá ne maʻu ha fakaafe mei ha faiako Palaimeli ke papitaiso, ʻa ia naʻá ne tali ʻi hono taʻu 10. ʻI he taʻu ʻe nimangofulu tupu ʻo e moʻuí, kuo tauhi ʻe ʻEletā Hesi ʻene tui mo e fakamoʻoni heʻene kei siʻí.
Naʻe pehē ʻe ʻEletā Hesi, “Kuo folofola mai ʻa e ʻOtuá kiate au ʻi hoku lotó ʻi he founga tatau naʻá Ne fai ʻi heʻeku ʻi he Palaimelí pea ʻi he founga tatau pē naʻá Ne fai ʻi heʻeku ʻi he Lautohi Faka-Sāpaté.”
Naʻá ne mali mo Kelela ʻElisapeti Laiti ʻi he ʻaho 29 ʻo Mē 1993, ʻi Penilī, Lanikāsia. Naʻe silaʻi kinaua kimui ange ʻi he ʻaho ko iá ʻi he Temipale Lonitoni ʻIngilaní.
Naʻe maʻu ʻe ʻEletā Hesi ha mataʻitohi BA ʻi he laó ʻi he 1996 mei he ʻUnivēsiti Lanikasitaá pea mo ha mataʻitohi MA ʻi he puleʻi ʻo e pisinisí mei he ʻApiako Pisinisi ko ʻAlaienisi Manisesitaá (Alliance Manchester) ʻi he 2016. Talu mei he 1997 mo ʻene ngāue ko ha loea (barrister).
ʻOkú na hoko ko e ongomātuʻa ki ha fānau ʻe toko ono, naʻe nofo ʻa e fāmili Hesí ʻi Polosova, Sesitāfila, ʻIngilani, ʻi he taimi naʻe uiuiʻi ai iá, pea naʻá na hoko ko e ongo talēkita ki he fakatahaʻanga Ki Hono Fakamālohia ʻo e Toʻu Tupú.