“ʻEletā Aroldo B. Cavalcante,” Liahona, Mē 2024.
ʻEletā Aroldo B. Cavalcante
Fitungofulu Taki Māʻolunga
ʻI ha fakaafe ʻa ha taha ʻokú ne tokoua ʻaki, naʻe kau atu ʻa ʻAloto B. Kavalakanite ʻi hono taʻu 18 ki ha konifelenisi fakavahelahi ʻi he 1988 naʻe meʻa ai ʻa Palesiteni Kōtoni B. Hingikelī (1910–2008), ʻa ia naʻá ne hoko he taimi ko iá ko e Tokoni ʻUluaki ʻi he Kau Palesitenisī ʻUluakí.
Naʻá ne fakamatala ʻo pehē, “Naʻá ku ongoʻi ha meʻa naʻe mātuʻaki mālohi. Naʻá ku lava ʻo mamata ki ha maama ʻia Palesiteni Hingikelī.”
Neongo naʻá ne maʻulotu ʻi he taʻu ʻe tolu hono hokó, ka naʻe ʻikai ke ne papitaiso. Naʻe tukituki atu ʻa e ongo faifekaú ʻi hono matapaá ʻi ha ʻaho ʻe taha. Naʻá na pukepuke ʻena tohi fakaʻēliá, peá na lau mei ai ʻa e meʻa naʻe tohi ʻe he kau faifekau kimuʻá ʻo kau kiate iá. Ko e meʻa naʻe ongo kiate iá ko e sētesi fakaʻosí: “ʻOku ʻikai ke ne fie līʻoa kia Sīsū Kalaisi.”
Naʻe manatu ʻa ʻEletā Kavalakanite ʻo pehē, “Naʻá ku pehē naʻá ku līʻoa moʻoni kia Sīsū Kalaisi, pea naʻe ongo moʻoni ʻa e fakalea ko iá kiate au.”
ʻI heʻene fifili pe ko e anga ia ʻo e vakai mai ʻa e Fakamoʻuí kiate iá, naʻá ne fehuʻi ange, “Ko e hā te u lava ʻo fai ke liliu ai ʻení, ongo ʻEletā?”
Naʻe kamata akoʻi ia ʻe he ongo faifekaú, pea naʻe papitaiso ʻa e talavou taʻu 21 hili pē ha ʻaho ʻe 10 mei ai. Talu mei ai mo e līʻoa ʻa ʻEletā Kavalakanite ki he ongoongolelei ʻa e Fakamoʻuí.
Naʻe pehē ʻe ʻEletā Kavalakanite, “ʻOku ʻikai fekauʻaki ʻa e ngāue ia ko ʻení mo kitautolu. ʻOku fekauʻaki ia mo e Fakamoʻuí. Pea ʻoku ou feinga ke fai hoku lelei tahá Maʻana, kae ʻikai maʻaku.”
Naʻe fāʻeleʻi ʻa ʻAloto Paleto Kavalakanite Filiho ʻi he ʻaho 22 ʻo Nōvema 1970, ʻi Fotalesa, Siala, Palāsila. Naʻe silaʻi ia kia Kilisitiana Lameiho Pesela Leite ʻi he Temipale Recife Brazil ʻi he ʻaho 21 ʻo Sānuali 2004. Ko ha ongomātuʻa kinaua ki ha fānau ʻe toko fā.
Naʻe maʻu ʻe ʻEletā Kavalakanite ha mataʻitohi (postgraduate) ʻi he pule fakalaó mei he ʻUnivēsiti Fakafonua ʻo Sialá ʻi he 1997. Kuó ne ngāue ko ha loea maʻá e Procuradoria Geral do Município mei he 1997 ki he 2005 pea mo ha hoa pule ʻo e Barreto Cavalcante Advogados talu mei he 1999.
Kimuʻa pea uiuiʻi ʻa ʻEletā Kavalakanite ko ha Fitungofulu Taki Māʻolungá, naʻá ne hoko ko ha palesiteni fakamisiona ʻi Palāsila. Kuó ne hoko foki ko ha Fitungofulu Fakaʻēlia, palesiteni fakasiteiki, pīsope, mo ha tokoni pīsope.