“Brother Chad H Webb,” Liahona, Mē 2024.
Brother Chad H Webb
Tokoni ʻUluaki ʻi he Kau Palesitenisī Lahi ʻo e Lautohi Faka-Sāpaté
ʻI he kei talavou ʻa Seti Uepí, naʻá ne ako ʻi he Kolisi ʻo ʻIutā Hahaké (ʻoku hoko he taimí ni ko e ʻUnivēsiti ʻo e Siteiti ʻIutā Hahaké) ʻi he taimi naʻá ne maʻu ai ha aʻusia fakalaumālie mahuʻinga naʻá ne fakaloloto ʻene fakamoʻoni ki he ongoongoleleí. Naʻe kamata ʻa e aʻusia ko iá ʻaki ha holi ke fakamālohia ʻene tuí.
Lolotonga hono fakahoko ʻe Brother Uepi ʻene ngāue fakaakó mo e vaʻinga pasiketipolo ʻi heʻene timi he ʻunivēsití, naʻá ne fakamuʻomuʻa ʻa e ako folofolá, lotú, mo e fakalaulaulotó ʻi heʻene teuteu ke ngāue fakafaifekau taimi kakato ʻi Velakulusi, Mekisikoú.
ʻI ha pō momoko ʻe taha naʻá ne lue takai ai ʻi Palaisi, ʻIutā, mo fakakaukau ki he meʻa kotoa pē naʻá ne akó. Naʻá ne maʻu ha fakahinohino fakalangi ʻi heʻene hū atu ki ha tauʻanga meʻalele naʻe ʻikai ha taha ai.
Naʻá ne pehē, “Naʻá ku ongoʻi naʻe mahino ʻa e ngaahi tali kotoa ki heʻeku ngaahi lotú mo e ngaahi fehuʻí, pea naʻá ku ongoʻi moʻoni ʻa hono moʻoni ʻo e ongoongoleleí pea mo e Siasí. Naʻe fakamahinoʻi lelei ʻa e ngaahi moʻoni ko iá ki hoku ʻatamaí, fakataha mo e ongo naʻe ʻafioʻi au ʻe he Tamai Hēvaní. Naʻá ku ongoʻi ʻEne ʻofá mo ʻEne fakahinohinó. Ko e taha ia ʻo e ngaahi aʻusia maʻongoʻonga naʻá ku maʻu ke fakaloloto ai ʻeku fakamoʻoní.”
Naʻe fāʻeleʻi ʻa Seti H Uepi ʻi Lekisipoki, ʻAitahō, USA, ʻi he ʻaho 18 ʻo Tīsema 1964, kia Leli Siaosi Uepi mo Peisa Uepi. Naʻá ne tupu hake ʻi he fakatonga-hahake ʻo ʻAitahoó peá ne mali mo Kilisitī ʻAna Polonisoni ʻi he Temipale Logan Utah ʻi he ʻaho 4 ʻo ʻAokosi 1990. ʻOkú na nofo ʻi Leitoni, ʻIutā, USA, pea ʻoku ʻi ai haʻana fānau ʻe toko ono.
Naʻe ʻosi ʻa Brother Uepi mei he ʻUnivēsiti Pilikihami ʻIongí mo ha mataʻitohi BA ʻi he lea faka-Sipeiní mo ha mataʻitohi MA ʻi he tuʻunga fakatakimuʻa mo e fakavaʻe fakafaiakó. Naʻá ne faiako ʻi he ngaahi kalasi seminelí ʻi Sōleki Siti mo e ngaahi kalasi ʻinisititiutí ʻi Vesiniā mo ʻIutā, fakafekauʻaki e ngaahi polokalama ʻinisititiuti ʻi Uāsingatoni, D.C., mo tokangaʻi hono akoʻi mo fili ʻo e kau faiako seminelí. Kuo hoko ʻa Brother Uepi ko ha pule ʻo e Seminelí mo e ʻInisititiuti Fakalotú talu mei he 2008.
Naʻe tukuange ʻa Brother Uepi mei heʻene hoko ko e palesiteni ʻo e Siteiki Leitoni Teleʻa ʻIutā Viú ʻi ha taimi nounou pē kimuʻa pea uiuiʻi iá. ʻOku kau ʻi hono ngaahi uiuiʻi kimuʻá ʻa e pīsope, aleaʻanga māʻolunga, mo e palesiteni ʻo e kōlomu ʻo e kaumātuʻá.