“Ngaahi Fehuʻi mo e Tali fekauʻaki mo e ʻFakamoʻoni ʻOku Haohaoá,ʼ” Liahona, Sune 2024.
Haʻu, ʻo Muimui ʻIate Au
Ngaahi Fehuʻi mo e Tali fekauʻaki mo e “Fakamoʻoni ʻOku Haohaoá”
“Fokotuʻu hoʻo fakamoʻoní ko e meʻa mahuʻinga taha kiate koé.”1 —Palesiteni Russell M. Nelson
Lotu Toputapú, tā fakatātā ʻa Linda Curley Christensen, ʻoua naʻa hiki hano tatau
ʻI he hoko ʻa ʻAlamā ko e fakamaau lahí, naʻá ne vakai “naʻe fakaʻau ke pōlepole ʻa e kakai ʻo e siasí” (ʻAlamā 4:6) pea “nau holi lahi ki he ngaahi koloa pea mo e ngaahi meʻa taʻeʻaonga ʻo e māmaní, ko ia naʻa nau kamata ai ke femanukiʻaki, ʻiate kinautolu” (ʻAlamā 4:8). Naʻe ʻikai ke fokotuʻu ʻe ʻAlamā ʻa e ngaahi fonó, ka naʻá ne fili ha taha kehe ke ne fetongi ia ko e fakamaau lahi, peá ne līʻoa ke malanga ʻaki e folofola ʻa e ʻOtuá ki he kakaí, “he naʻe ʻikai te ne ʻilo ha founga te ne lava ai ʻo toe fakatafoki mai ʻa kinautolu ka ʻi hono fakafepakiʻi ʻa kinautolu ʻaki ʻa e fakamoʻoni ʻoku haohaoá” (ʻAlamā 4:19).
Ko e hā ʻa e ngaahi konga mahuʻinga ʻo ha fakamoʻoni ʻoku haohaoá?
Te tau lava ʻo maʻu ha fakamoʻoni ki he ngaahi tefitoʻi moʻoni kotoa pē ʻo e ongoongoleleí, ka ko e ngaahi moʻoni tefitó ʻeni:
-
Ko e ʻOtuá ʻa ʻetau Tamai Hēvaní, pea ʻokú Ne ʻofa ʻiate kitautolu.
-
ʻOku moʻui ʻa Sīsū Kalaisi. Ko e ʻAlo Ia ʻo e ʻOtuá mo hotau Fakamoʻuí.
-
Ko Siosefa Sāmita ʻa e palōfita naʻe uiuiʻi ke ne fakafoki mai ʻa e ongoongoleleí.
-
Ko e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻa e Siasi moʻoni pē ʻe taha ʻa e Fakamoʻuí pea ʻoku tataki ia ʻe ha palōfita moʻui.2
Ko e fakamoʻoní ko ha ngaahi lea pē nai ia?
“ʻOkú ke fakahoko hoʻo fakamoʻoní ʻi he taimi ʻokú ke vahevahe ai hoʻo ngaahi ongo fakalaumālié mo e niʻihi kehé. …
“Ko e founga ʻe taha ʻokú ke vahevahe ai hoʻo fakamoʻoní ko hoʻo angatonú. ʻOku ʻikai ko hoʻo fakamoʻoni pē [kia Sīsū Kalaisí] ʻa e meʻa ʻokú ke lea ʻakí—ka ko ho ʻulungāngá foki” (Gary E. Stevenson ʻo e Kōlomu ʻo e Kau ʻAposetolo ʻe Toko Hongofulu Mā Uá, “Ko Hono Tanumaki mo Vahevahe Hoʻo Fakamoʻoní,” Liahona, Nōvema 2022, 112).
Ko e hā ʻa e mālohi ʻo e fakamoʻoni ʻoku haohaoá?
Naʻe manatu ʻa Palesiteni Pilikihami ʻIongi ki he mālohi ʻo e fakamoʻoni fakamātoato mo mahinongofua ʻo ha “tangata naʻe ʻikai ke pōtoʻi lea, pe talēniti ke lea ki ha kakai tokolahi, pea ko e meʻa pē ʻeni naʻá ne lava ke lea ʻakí, ʻʻOku ou ʻiloʻi ʻi he mālohi ʻo e Laumālie Māʻoniʻoní ʻoku moʻoni ʻa e Tohi ʻa Molomoná, pea ko Siosefa Sāmitá ko e palōfita ia ʻa e ʻEikí.ʼ Naʻe haʻu mei he tangatá ni ʻa e Laumālie Māʻoniʻoní ʻo ne fakamaamangia ʻa e mahino naʻá ku maʻú … ; Naʻa nau ʻaofia au, na‘a nau fakafonu au, pea na‘á ku ‘ilo‘i na‘e mo‘oni ‘a e fakamo‘oni ‘a e tangata ko ‘ení” (“Discourse,” Deseret News, Feb. 9, 1854, 4).
Fēfē kapau he ʻikai tali ʻe he kakaí ʻeku fakamoʻoní?
Naʻe vahevahe ʻe ha fefine kei talavou ʻene fakamoʻoní mo e kau ʻaʻahi ʻi he Temipale Sikuea ʻi Sōleki Sití ʻi he taimi naʻe fakafepakiʻi ai ia ʻe ha tangata ʻaki ha ngaahi fehuʻi fakafili.
Naʻe pehē ange ʻe he fefiné ni, “ʻOku ʻikai ke u ʻilo. Ka te u lava pē ʻo tala atu ʻa e meʻa ʻoku ou ʻiló.”
Naʻe fakahohaʻasi atu ia ʻe he tangatá: “ʻOua te ke fai mai hoʻo fakamoʻoní kiate aú.”
Naʻe pehē ange ʻe he fefiné, “Ko e meʻa pē ia ʻoku ou maʻú.”
Naʻe tali fakaʻita atu leva ʻe he tangatá, “Ka ʻoku ʻikai ko ha meʻa lahi ia, ko ia?”
Naʻe ʻosi ʻa e fetalanoaʻakí, ka naʻe taʻe-fakafiemālie eni ki he fefiné. Ka neongo iá, ʻi heʻene fakakaukau atu ki aí, naʻá ne fakatokangaʻi naʻe mahulu hake ʻene fakamoʻoní ʻi he “ʻikai ko ha meʻa lahí.” Naʻe mahuʻinga ʻaupito ia kiate ia. Naʻá ne tākiekina ʻa e fili kotoa pē ʻi heʻene moʻuí.
Ko e hā ha ngaahi founga te u lava ai ʻo vahevahe ʻeku fakamoʻoní?
ʻOku tau faʻa fakakaukau ke fai ʻetau fakamoʻoní ʻi he houalotu sākalamēnití ʻi he Sāpate ʻaukaí, ka ʻoku lahi mo ha ngaahi founga kehe ke vahevahe ai ʻetau ngaahi ongo fakalaumālié:
-
Fai ha tohi ki hoʻo fānaú pe makapuná ʻo vahevahe hoʻo fakamoʻoni kia Sīsū Kalaisi mo ʻEne ongoongolelei kuo fakafoki maí.
-
Tauhi hoʻo fakamoʻoní ʻi he “Ngaahi Manatu Melie” ʻa e FamilySearch ke fakamālohia ho hakó.
-
Tuku hake ha fakamatala ʻi he mītia fakasōsialé ki he mahuʻinga ʻo Sīsū Kalaisi kiate koé.
-
Vahevahe ʻi he ngaahi fakatahaʻanga ʻo e Sāpaté, ʻa e founga kuo faitāpuekina ai hoʻo moʻuí ʻe ha tefitoʻi moʻoni ʻo e ongoongoleleí ʻoku aleaʻi.