Kau Ākonga ʻa Sīsū Kalaisi ʻi he Siasí mo e Koló

ʻI heʻetau hoko ko e kāingalotu ʻo e Siasí, ko hotau faingamālie mo hotau fatongia ke “tuʻu ko e kau fakamoʻoni ʻo e ʻOtuá ʻi he taimi kotoa pē” (Mōsaia 18:9). ʻI he peesi 4 ʻo e makasini ko ʻení, ʻoku akoʻi ai ʻe ʻEletā Lānolo A. Lasipeni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻi heʻetau tuʻu ko e kau fakamoʻoni ʻo Sīsū Kalaisi ki he niʻihi ʻoku tau feohí ʻe lava ai ke hoko ha meʻa makehe ʻi hotau tukui koló. ʻI he peesi 16, ʻoku ou fakamatalaʻi atu te tau lava foki ʻo fakahoko ʻa e fatongiá ni ʻi he founga ʻoku tau fakamoʻoni ai ki he kāingalotu kehé fekauʻaki mo Sīsū Kalaisí pea mo e moʻoni ʻo Hono Siasi kuo fakafoki maí.

Te tau lava ʻo fakamoʻoni ʻi he loto-falala ki hono moʻoni ʻo e Siasi ʻo e ʻEikí kuo fakafoki maí pea mo hono kau takí ʻi heʻetau ʻiloʻi ʻoku ʻikai fiemaʻu ke haohaoa ʻa e Siasí, ko hono kau takí, pe ko hono kāingalotú kae toki lava ke moʻoni ʻa e Siasí. Ko e moʻoni, naʻe folofola ʻa e ʻEikí ko ʻEne taumuʻá ke “fakahaohaoa [ʻa] e kakai māʻoniʻoní” (ʻEfesō 4:12). ʻOku tali ʻe he Siasí ʻa e fānau ʻa e ʻEikí ʻoku taʻehaohaoa ka ʻoku nau fāifeingá. ʻOku tokoniʻi kitautolu ʻe he Siasí ʻo fakafou ʻi hono ngaahi akonakí, ngaahi ouaú, ngaahi fuakavá, mo e Fakalelei ʻa Sīsū Kalaisí kae ʻoua kuo “tau hoko kotoa pē ki he fakataha ʻi he tui, pea mo e ʻiloʻi ʻo e ʻAlo ʻo e ʻOtuá, ki he tangata haohaoá” (ʻEfesō 4:13), ʻa ia he ʻikai ke tau lavaʻi kakato ʻi he moʻuí ni.

ʻOku ou fakamoʻoni ʻoku tataki ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻe he ʻEiki ko Sīsū Kalaisí ʻo fakafou ʻi he kau palōfita mo e kau ʻaposetolo moʻuí; pea ko kinautolu ʻoku nau maʻu ʻa e ngaahi ouau ʻo e fakamoʻuí mo e hakeakiʻí pea tauhi ʻa e ngaahi fuakava ʻoku fekauʻaki mo iá, ʻe hakeakiʻi kinautolu ʻi he puleʻanga fakasilesitiale ʻo e ʻOtuá; pea ʻe fakamoʻoni ʻa e Laumālie Māʻoniʻoní ki he ngaahi meʻá ni ki he kau fekumi fakamātoato ʻo e moʻoní.

Fakaʻapaʻapa atu,

ʻEletā J. Devn Cornish

Fitungofulu Taki Māʻolunga Mālōlō