Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní

Naʻe ʻi ai Nai Haku Taimi ke Tokoni ai ki Hoku Kaungāakó?

Fai ʻe Leonardo José Rattia Verenzuela, Melita, Venesuela

Naʻá ku pehē naʻe ʻikai haʻaku taimi ke tokoni, ka naʻe tāpuakiʻi au ʻe he ʻEikí ʻi heʻeku feilaulaú.

Tā fakatātaaʻi ʻe Lee Montgomery / IllustrationX

ʻI he 1998, naʻe kamata ai ʻeku ako ʻi he ʻUnivēsiti ʻo e ʻAnitesí. Naʻá ku fuʻu fiemaʻu lahi ke maʻu hoku mataʻitohi mei he ʻunivēsití ʻaki ha maaka lelei. Ka naʻe faingataʻa ʻeku ngaahi kalasi ki he faihiá (criminology), pea naʻe faingataʻa ke u fakafeangai ki he ngāue ʻi he ʻunivēsití. Naʻá ku femoʻuekina foki ʻi heʻeku hoko ko ha tokoni ʻi he kau pīsopeliki ʻi hoku uōtí mo ngāue ʻi he poʻulí ke tauhi hoku fāmilí.

Naʻe taʻofi ʻe he veiveiuá mo e loto-hohaʻá ʻa ʻeku ngaahi fakaʻamu ʻi he ʻuluaki taʻu ko iá ʻi heʻeku maʻu ha maaka naʻe maʻulalo ʻaupito mei he ʻavalisi fakakalasí. ʻI he fakaʻosinga ʻo e taʻu fakaakó, naʻe fakalalahi ʻeku lotu ʻo kole ki he ʻOtuá ke tokoni mai ke mahino ʻa e ngaahi fakakaukau, tefitoʻi moʻoni, mo e founga ngāue takitaha.

Lolotonga ʻeku taʻu hono uá, ne u fetaulaki ai mo ha kaungāako ne teʻeki ke u fakatokangaʻi kimuʻa ko hono hingoá ko ʻĀseni. Naʻá ku ʻiloʻi kuo teʻeki ai foki ke ne fakatokangaʻi au—pe te ne toe lava ʻo sio mai kiate au koeʻuhí he naʻá ne kui. Naʻá ne haʻu ʻi ha ʻaho ʻe taha mo ʻene tokotokó mo ʻene meʻangāue fakaʻilekitulōnika maʻá e kakai kuí (braille tablet) ʻo kole tokoni mai. Naʻá ne pehē naʻá ku maʻu ha leʻo lelei pea naʻá ne fiemaʻu ke u lekooti ʻa e ʻū tohi fakahinohino akó koeʻuhí ke ne lava ʻo fanongo ki he ngaahi lēsoní.

Naʻá ne kole ki he niʻihi kehé, ka naʻe ʻikai ke nau tali. Ko e niʻihi naʻa nau tokoniʻi ia ʻi he taʻu kimuʻá, naʻa nau fakatoupīkoi ke toe tokoni kiate ia. Naʻá ku fakatoupīkoi foki mo au koeʻuhí ko e femoʻuekina ʻeku taimi-tēpilé mo e ʻikai sai e māká.

Neongo naʻe ʻikai ke u teitei loto-fiemālie ki heʻene kolé, ka naʻe ʻikai fuoloa kuó u lau mo toe lau ʻa e ʻū tohi fakahinohinó ke lekooti honau fakamatalá maʻa ʻĀseni. Naʻe aʻu ki ha taimi naʻá ma kaungāmeʻa, pea naʻe kamata ke u vahevahe ʻa e ongoongolelei ʻo Sīsū Kalaisí kiate ia. Naʻe aʻu ʻo u ʻoange ha Tohi ʻa Molomona maʻá e kakai kuí. Naʻá ne houngaʻia ʻi heʻeku tokoní ka naʻe ʻikai ʻaupito ke ne fie ʻilo lahi ange ki he Siasí.

Ka neongo iá, ʻi he hokohoko atu ʻeku lau mo lekooti ʻa e ʻū tohi fakahinohino akó, naʻe kamata ke fakalakalaka ʻeku maaka ʻavalisi ʻi he akó. Naʻa mo hoku toʻú naʻa nau fakatokangaʻi naʻe fakaʻau ke u hoko ko ha tokotaha ako lelei ange pea tupulaki mo ʻeku mahinó.

Hili ha taʻu ʻe valu mei heʻeku ʻosi mei he akó, naʻe ʻosi foki mo hoku kaungāmeʻa ko ʻĀsení mei he akó. Naʻe ʻikai ke ne fieʻilo ki he Siasí, ka naʻá ne tokoni ke mahino kiate au “ʻo ka mou ka ʻi he tauhi ʻo homou kāingá, ʻoku mou ʻi he tauhi pē ʻo homou ʻOtuá” (Mōsaia 2:17). Naʻá ne toe tokoniʻi foki au ke u ʻilo ko e taimi ʻoku ou tokoni ai ki he niʻihi kehé, ʻoku tāpuekina au ʻe he ʻOtuá mo fakatupulaki hoku ivi malavá.