“Naʻe Fakamaʻamaʻa ʻe Sīsū Kalaisi ʻEku Ngaahi Kavengá,” Liahona, Sune 2024.
Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní
Naʻe Fakamaʻamaʻa ʻe Sīsū Kalaisi ʻEku Ngaahi Kavengá
ʻI he ngaahi faingataʻa kotoa ʻi heʻeku moʻuí, naʻá ku ongoʻi ʻo hangē naʻá ku melemó ka ne taʻeʻoua ʻeku maʻu ha nonga mei hono lau ʻo e Tohi ʻa Molomoná.
Tā fakatātaaʻi ʻe Mariko Kowalski
ʻI ha ʻaho ʻe taha lolotonga ʻeku ngāue fakaetauhi ki ha fefine ʻi homau uōtí, naʻá ne talamai naʻá ne lau ʻa e Tohi ʻa Molomoná ʻi he taʻu kotoa pē. Naʻá ne fakamoʻoni foki ki he ngaahi tāpuaki maʻongoʻonga naʻe ʻomi ʻe he ngāue ko ʻení kiate iá. ʻOku ou fakamālō ki he fefine ko iá ʻi heʻene tā sīpingá.
Kimuʻa ʻi he ʻaʻahi ko iá, naʻe tuʻo taha pē ʻeku lau ʻa e Tohi ʻa Molomoná ke ʻosí, neongo naʻá ku ako maʻu pē ia ʻi heʻeku teuteu ki he ngaahi fatongia fakafaiakó. Hili ʻeku ʻaʻahí, ne u pehē ke u muimui ki he sīpinga ʻa e fefine ko ʻení. Ne u toe kamata ʻaki ʻa e 1 Nīfaí pea lau ʻo aʻu ki he ngataʻangá. Naʻá ne moʻoni! Naʻá ku fakatokangaʻi naʻe tāpuekina au ʻi ha ngaahi founga lahi, pea ʻoku ou tui pau, naʻe ʻi ai mo ha ngaahi founga kehe naʻe ʻikai ke u fakatokangaʻi.
Naʻe ʻikai fuoloa mei heʻeku fakakakato hono lau tuʻo ua ʻo e Tohi ʻa Molomoná, naʻe mavahe hoku husepānití mei homau fāmilí. Naʻe fakaʻau ke fakamafasia ʻaupito ʻa e ngaahi ngāue naʻe ngali taʻemalava ʻi heʻeku ngāue foʻoú, pea naʻe hoko ʻa e tuʻunga mahamahaki hoku fohá ke u ongoʻi ʻo hangē naʻá ku melemó.
Ka naʻá ku manatuʻi ʻeku lau ʻi he Tohi ʻa Molomoná fekauʻaki mo e founga naʻe hilifaki ai ʻe ʻAmulone ha ngaahi kavenga mamafa kia ʻAlamā mo hono kakaí. ʻI he taimi naʻe lotua ai ʻe he kakaí ha tokoní, naʻe fakahā ange ʻe he ʻEikí ʻokú Ne ʻafioʻi honau tūkungá pea te Ne fakahaofi kinautolu. Kae lolotonga iá, naʻá Ne folofola, “Te u fakamaʻamaʻa foki ʻa e ngaahi kavenga kuo hilifaki ki homou ngaahi umá, ke ʻoua naʻa mou ongoʻi ia ʻi homou tuʻá” (Mōsaia 24:14).
Naʻá ku ʻosi ako tuʻo lahi ʻa e vahe ko ia ʻa Mōsaiá kimuʻa, pea kuo tā tuʻo lahi ʻeku akoʻi ia ki ha niʻihi kehe ʻi he ngaahi kalasi ʻo e ongoongoleleí. Naʻá ku tui ki hono moʻoni ʻo e ngaahi veesi ko iá. Koeʻuhí naʻá ku maheni mo e ngaahi akonaki ʻi he Tohi ʻa Molomoná, naʻá ku ʻiloʻi ʻoku hā mai ʻa e moʻoni fakatāutahá ʻi he taimi ʻoku ou fakatatau ai ʻa e folofolá ki hoku ngaahi tūkunga fakatāutahá.
Ko ia ne u kamata lau ʻa e vahe ko iá ʻi he ʻaho kotoa pē ke maʻu ha mālohi mo fakamanatu kiate au naʻe tokanga mai foki mo e ʻEikí kiate au. Naʻe pau pē ke u kei foua ʻa e ngaahi ʻahiʻahí, ka naʻá Ne fakamaʻamaʻa ʻeku ngaahi kavengá.
Naʻe tokoni ʻa e ngaahi veesi ko ia ʻi he Tohi ʻa Molomoná ke u kātekina ha vahaʻataimi ʻo e faingataʻa lahi fakataautaha, ʻo ne ʻomi ai kiate au ha nonga mo ha ʻilo fakafiemālie ʻoku ʻafioʻi ʻe he ʻEikí ʻa ʻEne fānaú kotoa.