Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní

Ko e Meʻa Naʻe Akoʻi Mai ʻe ha Foʻi Mā Fekauʻaki mo e Ngāue Fakaetauhí

Fai ʻe Lecia Crider, ʻAlesona, USA

Ko e hā te u lava ʻo fafanga ʻaki hoku ʻofefiné ʻi he efiafí ni ʻe ʻaonga ki he faʻahinga meʻatokoni ʻoku sai kiate iá?

Ko ha taha feimeʻatokoni lelei ʻaupito hoku kaungāmeʻa ko Uenitií. Talu mei he ʻaho naʻá ne hiki mai ai ʻo nofo ofi mai ki homau fāmilí, kuó ne vahevahe mai maʻu pē ha meʻakai kiate kimautolu. ʻOku ʻi ai maʻu pē haʻane kumi ʻuhinga: “He ʻikai hao ʻeni ia ʻi heʻeku ʻaisí,” pe “Naʻe fuʻu lahi ʻeku meʻakai ne ngaohí!” Tatau ai pē pe ko e hā ʻokú ne talamai ʻi he taimi ʻokú ne ʻomi ai ʻene ngaahi foakí, ko e meʻa ʻoku ou fanongo maʻu pē ki aí ko e, “ʻOku ou ʻofa atu.”

Naʻá ku ongoʻi ʻene ʻofa ki homau fāmilí tautautefito ʻi he hili ha ʻaho ʻe taha naʻe faingataʻa ʻaupito. Ne toki ʻilo kimuí ni ʻoku fokoutua ha taha ʻo ʻeku fānaú ʻi he palopalema ʻo e uʻa kaí, pea ko e meʻa kotoa pē fekauʻaki mo e meʻakaí naʻe fakaʻau ke faingataʻa mo fakamafasia ia ʻi homau ʻapí.

ʻI ha pō ʻe taha naʻá ku fakataha ai mo hoku ʻofefiné mo ʻene timi faifaleʻí. Naʻe ʻoange kiate ia ʻi he fakatahá ni ha palani ki he maʻu meʻatokoní, pea naʻe fekauʻi au ke u ngaohi mo palani ha houa kai ʻe tolu mo ha meʻakai maʻamaʻa (snack) ʻe tolu maʻana ʻi he ʻaho kotoa pē. Naʻe pau ke feau ʻe he ngaahi houa kai mo e meʻakai maʻamaʻa ko ʻení ha ngaahi fakahinohino pau ki he maʻu meʻatokoní ʻa ia ʻe ala tokoni ke fakafoki hono mamafá.

Kiate au, naʻá ku ongoʻi lōmekina ʻi he ngāué ni. ʻOku ʻikai ko ha taha feimeʻatokoni lelei au, ko ia ko hono maʻu ha ngaahi fakahinohino pau mo e ʻamanaki ki hono feingaʻi hoku kiʻi ʻofefine ʻoku momoú ke kai ha meʻakai lahi peheé, naʻá ku mei tangi ai. ʻI heʻema fakaʻuli ʻo foki ki ʻapí, naʻe nofotaha hoku ʻatamaí ʻi ha foʻi fakakaukau ʻe taha: “ʻOku ʻikai ha meʻakai ʻe feʻunga ki heʻene kai maʻamaʻá ʻi he efiafí ni.”

ʻI heʻeku aʻu ki ʻapí, ne u hū fakatuotuai atu ʻi he matapaá ʻo nāmuʻi ha meʻa ifo ʻi he taimi pē ko iá. ʻI he funga kānita ʻi peitó, naʻe hili mai ai ha foʻi mā siaine naʻe ʻomi ʻe Uenitī lolotonga ʻema mavahé. Naʻe ʻi ai ha kēleni, ko ha fuaʻiʻakau, mo ha ngako—feʻunga lelei ʻaupito ia mo e kai efiafi maʻamaʻa naʻá ma fiemaʻú! Kae toe lelei angé, naʻe kai loto-fiemālie ia ʻe hoku ʻofefiné.

ʻI heʻeku tā kia Uenitī kimui ange ke fakamālō kiate ia ʻi he foʻi maá, naʻe ʻikai ke u vahevahe ange ʻa e talanoa puipuituʻa ko ʻení. Mahalo naʻá ne fifili pe ko e hā naʻá ku kiʻi tangi ai ʻi heʻene meʻaʻofá. Naʻe ʻikai ʻilo ʻe Uenitī naʻa mau faingataʻaʻia. Naʻá ne ngaohi pē ʻo “fuʻu lahi” ʻene mā siainé pea naʻe ʻikai ke ne loto ke mafu ia.

Hili ha ngaahi māhina siʻi mei ai, ʻi heʻeku fanongo ki ha tālanga fekauʻaki mo e hoko ko ha kau tauhi fuakavá, naʻá ku fifili pe ko e hā ʻa e ʻuhinga moʻoni ʻo e hoko ko ha tokotaha ʻoku tauhi fuakavá. Naʻe haʻu leva ki heʻeku fakakaukaú ʻa e meʻaʻofa mā siaine ʻa Uenitií.

ʻI he muimui ʻa Uenitī ʻi hono lotó ke ʻomi kiate kimautolu ʻa e maá he ʻaho ko iá, naʻá ne tangi fakataha ai mo kinautolu naʻe tangí mo fakafiemālieʻi ʻa kinautolu naʻe ʻaonga ki ai ʻa e fakafiemālié (vakai, Mōsaia 18:9), neongo naʻe ʻikai ke ne ʻiloʻi ʻa e kakato ʻo e talanoá. Pea naʻe ʻaonga lahi ʻaupito ia.