Fakaʻilekitulōnika Pē
Ko e Mālohi ʻo e Ngaahi Hiva ʻa e Palaimelí
ʻOku nofo ʻa e tokotaha naʻá ne fai ʻa e fakamatalá ʻi ʻAitahō, USA.
Naʻe tokoni ʻa e meʻa ne foua ʻe heʻeku taʻahiné ʻi ha ʻapi ʻo e kau toulekeleká ke u ʻiloʻi ʻa e lahi ʻo e ngaahi tokoni ʻe lava ke fai ʻe he ngaahi hiva ʻa e Palaimelí ke faitāpuekina ai e moʻui ʻa e tokotaha kotoa pē.
Ko e taimi naʻe fuofua ui ai au ke u hoko ko ha faihiva ʻi he Palaimelí, naʻá ku manavasiʻi ʻaupito. Neongo naʻá ku ʻosi tā piano mo hiva fakakulupu, ka naʻe teʻeki ai ke u tataki ha foʻi hiva ʻi heʻeku moʻuí. ʻI he ʻuluaki māhina ʻo hoku uiuiʻí, naʻá ku manavasiʻi ʻi he konga ko ia ʻo e Sāpaté koeʻuhí he naʻe ʻikai ke u ongoʻi feʻunga.
ʻI he taimi ko iá, naʻe ngāue ʻeku taʻahine taʻu 21 ko Kenatií, ʻi ha ʻapi ʻo e kakai mālōlō mei he Ngāue Fakakautaú (VA). ʻOku manako ʻa Kenatī ke hiva, pea naʻá ne faʻa fakahoko ia ʻi he ngāué. Naʻá ne hivaʻi ha ngaahi hiva ʻiloa ʻi he kai hoʻatā ʻa e kau nofo aí. Naʻá ne hivaʻi foki mo e ngaahi hiva fakaʻofisiale ʻo e ngaahi vaʻa fakakautau ne nau ngāue aí peá ne tali mo e ngaahi kole ke hiva ʻi he taimi maʻumeʻatokoni hoʻataá (kau ai ha himi faka-Kalisitiane naʻe ʻikai ke ne ʻilo ka naʻá ne ako ia maʻa ha taha naʻe ai).
Ko ha fefine ʻe taha naʻe nofo ai, naʻe ngaohikovia moʻoni siʻene moʻuí. Naʻe fakafepaki pea naʻe ʻikai ke ne tuku ke fafanga, kaukauʻi, pe teuteuʻi ia ʻe he kau tauhí. Naʻe fakafepaki ke ʻoua te ne fakaʻaongaʻi ʻa e faitoʻó mo ha faʻahinga sivi pē ki hono sinó.ivi fakatuʻasino pē. ʻI ha ʻaho ʻe taha, ʻi hano ueʻi fakalaumālie ʻeku taʻahiné, naʻá ne hivaʻi ai ʻene ngaahi hiva Palaimelí mei he Tohi Hiva ʻa e Fānaú. Naʻe nonga ʻa e fefiné ʻi he taimi pē ko iá. Naʻe hā mei hono fofongá ha maama ʻo e ʻilo. Naʻe ʻiloʻi ʻe he kau ngāué ʻe talangofua ʻa e fefiné ni kapau ʻe hivaʻi ʻe Kenatī ha ngaahi hiva Palaimeli. Naʻa nau lava ʻo teuteuʻi, kaukauʻi, mo fafanga ia pea ʻoange faingofua ange ʻene faitoʻó kae ʻikai fuʻu fakafepaki. Naʻe aʻu ʻo akoʻi ʻe Kenatī ha ngaahi hiva Palaimeli ʻe niʻihi ki he kau ngāue kehé koeʻuhí ke nau lava ʻo tokoni ki he fefine ko ʻení ʻi he taimi naʻe ʻikai ngāue ai ʻa Kenatií.
Hili ʻeku fanongo ki he ngaahi talanoa ʻeku taʻahiné, naʻá ku fakatokangaʻi ha ʻuhinga ʻe taha ʻoku mātuʻaki fuʻu mahuʻinga ai ʻa e uiuiʻi ʻo e faihiva ʻi he Palaimelí. Naʻe liliu ʻeku fakakaukaú ʻi he mahino kakato ange kiate au ko e hivá, ʻo tautautefito ki he hiva fakalotú, mahalo ko e meʻa pē taha ia ʻokú ne tokoniʻi ʻa e fānaú ʻi honau ngaahi faingataʻa lahi taha ʻi he moʻuí. Naʻá ku ai ia ko ʻeku taumuʻa ke akoʻi ki he fānaú ʻa e ngaahi hiva lahi taha ʻe lavá, fekauʻaki mo Sīsū Kalaisi. Mahalo he ʻikai manatuʻi ʻe he fānaú ha lea ʻi he Palaimelí pe houalotu sākalamēnití, mahalo he ʻikai ke nau manatuʻi ha ngaahi lēsoni pau, pea mahalo ʻe ʻi ai ha niʻihi ʻe hē atu mei he hala ʻo e fuakavá ʻamui ange, ka ʻoku ngalingali te nau manatuʻi ʻa e ngaahi hiva naʻe nau akó mo e ongo ʻoku nau maʻu mei he ngaahi hivá. ʻI he tuʻunga ʻo e fefiné ni, naʻá ne manatuʻi ʻa e ngaahi hiva ko iá neongo naʻe ʻikai ke ne manatuʻi hono fāmilí! Kātaki ʻo fakatokangaʻi ange hono mahuʻinga ʻo e uiuiʻi ko ʻení!