“Kakapa ke Māʻolunga Ange,” Liahona, Sune 2024.
Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní
Kakapa ke Māʻolunga Ange
Naʻá ku fifili pe ko e hā naʻe tuʻu ai ʻa ʻEmelī ʻi he halá ka ne u sio ki heʻene tokoniʻi ʻa e finemui naʻe ʻi mui ʻiate iá.
Laʻitā mei he tokotaha faʻu talanoá
ʻI he lolotonga ʻa e hoko hoku uaifí ko e palesiteni ʻo e Kau Finemui ʻi he uōtí, naʻá ne fakaafeʻi au ʻi he faʻahitaʻu māfana kotoa pē ki he nofo kemi ʻa e Kau Finemuí ke tokoni ʻi he ngaahi ʻekitivitī ki tuʻá. Lolotonga ha nofo kemi kimuí ni mai, naʻá ku tokoni ʻi ha hala ne taki ʻaki ʻa e maea ke luelue ai ʻa e kau finemuí lolotonga iá ʻoku haʻi honau matá.
Naʻe pau ke piki maʻu ʻa kinautolu naʻe lue ʻi he halá ki ha maea manifi naʻe haʻi ʻo mafao mei he fuʻu ʻakau ki he fuʻu ʻakau. Hili ʻenau aʻu ki he fuʻu ʻakau takitaha, naʻa nau fā takai ʻi he sino ʻo e fuʻu ʻakaú ki he konga ʻo e maeá naʻe fakatau ki he fuʻu ʻakau hokó. Naʻe ʻi ai ha ngaahi feituʻu faingataʻa ʻi he halá, kau ai ha ngataʻanga ʻo e maeá naʻe ʻikai toe hoko atu ki ha fuʻu ʻakau. Naʻá ku tokoniʻi ʻa e niʻihi naʻe kaú kapau te nau tūkia pe faingataʻaʻia ʻi ha kiʻi feituʻu fakafihi ʻi he vaeuaʻangamālie ʻo e halá.
ʻI he feituʻu ko iá, naʻe nonoʻo ʻa e maeá ki ha fuʻu ʻakau ʻo hangē ko e angamahení. Ka naʻe haʻi ʻa e maea naʻe fakatau ki he fuʻu ʻakau hokó ʻo kiʻi māʻolunga ange ʻi he maea naʻe haʻi mai ki he fuʻu ʻakau ko iá. ʻI he aʻu ki he taimi ko iá, naʻe ʻosi anga ʻa e kau finemuí ʻi he fā takai ʻi he sinoʻi ʻakau takitaha ke maʻu ʻa e maea hokó. ʻI heʻenau fāifeinga ke maʻu ʻa e maea māʻolunga angé, naʻá ku talaange, “Kakapa ke māʻolunga ange.”
Hangē pē ko e niʻihi kehe ʻi muʻá, naʻe ʻikai fuoloa kuo loto-foʻi ha finemui ko ʻEmelī ʻi heʻene feinga ke maʻu ʻa e maea māʻolunga angé. Hili ha sekoni nai ʻe 20, naʻá ku fanafana ange, “Kakapa ke māʻolunga ange.” Naʻe ʻikai fuoloa kuo maʻu ʻe ʻEmelī ʻa e maeá, ka naʻá ne kiʻi tuʻu ai.
Naʻe ʻikai ke hoko atu e fononga ʻa ʻEmelií, ka naʻá ne tafoki ʻo tokoni ki he finemui naʻe ʻi mui ʻiate iá, ko Kueni. Naʻe hiki fakalelei hake leva ʻe ʻEmelī ʻa e nima ʻo Kuení ki he maea māʻolunga angé koeʻuhí ke ne ʻilo ʻa e feituʻu ke maʻu ai iá. Naʻe hoko atu leva ʻa e fononga ʻa ʻEmelií, pea muimui atu ʻa Kueni.
Naʻe siʻisiʻi ʻa e kiʻi ngāue tokoni ʻa ʻEmelií, ka naʻá ne fakamanatu mai kiate au hotau fatongia mamafa ko e kau ākonga ʻa Sīsū Kalaisí ke tokoniʻi ʻa e niʻihi kehé ʻi he hala ʻo e fuakavá, tokoniʻi ʻa e fānau ʻa e ʻOtuá ke nau kakapa ke maʻolunga ange, pea “hiki hake ʻa e ngaahi nima ʻoku tautau ki laló” (Tokāteline mo e Ngaahi Fuakava 81:5).
Naʻe akoʻi ʻe ʻEletā Tieta F. ʻUkitofa, ʻi heʻene hoko ko e Tokoni Ua ʻi he Kau Palesitenisī ʻUluakí, “ʻI heʻetau hiki hake ʻa e niʻihi kehé, ʻoku tau toe kiʻi fakalaka hake ai ki ha tuʻunga ʻoku māʻolunga angé.” Naʻá ne toe pehē foki: “ʻI he taimi ʻoku tau ala atu ai ke faitāpuekina e moʻui ʻa e niʻihi kehé, ʻoku faitāpuekina foki ai ʻa ʻetau moʻuí. ʻOku hanga ʻe he ngāue tokoní mo e feilaulaú ʻo fakaava mai e ngaahi matapā ʻo e langí, pea fakaʻatā ke taumalingi hifo e ngaahi tāpuaki funganí kiate kitautolu” (“Fiefiá, Ko Ho Tukufakaholo,” Liahona, Nōvema 2008, 119).