Lototele e Faasoa Atu Mea e Sili Ona Ou Faatauaina

Saunia e Tannie M. Flammer

I le mulimuli ai i le faataitaiga a lo’u epikopo ma lona faletua, sa i ai sa’u sini e faasoa atu se Tusi a Mamona i malaga uma a le au lape tapuai sa ou alu ai.

I le tuputupu a’e ai, sa ou fiafia e matamata i le auala e aoina ai e matuamoa a Tinamatua a latou toloai i lalo o o latou apaau i taimi o afā ina ia saogalemu ma puipuia i latou. O lenei ata na sili atu ona taua ia te a’u ina ua uma ona [ou] faitau e uiga i ai i le Tusi a Mamona (tagai i le 3 Nifae 10:4–6). I le avea ai ma se talavou matua, sa ta’u mai e lo’u epikopo ma lona faletua, o e sa tele ni mea na la faimalaga ai mo le la pisinisi, sa la faasoaina atu se Tusi a Mamona i se tasi i malaga uma sa la faia.

Na faaosofia ai a’u i lena mea. Sa ou faamemelo ia i laua, ma o a la faataitaiga na ootia ai lo’u loto. Sa ou filifili afai ou te maua le avanoa e malaga ai i fafo atu o Iuta, ISA, o le a ou mulimuli i le la faataitaiga ma faasoa atu se Tusi a Mamona i taimi taitasi.

I le avea ai ma se tagata o le au lape tapuai mo le Iunivesite o Polika Iaga, sa ou malaga soo ai ma le au lape tapuai. A o le i oo i la’u malaga muamua, sa ou faatauina se Tusi a Mamona ma tusia ai la’u molimau. Sa ou manao e atiina a’e le lototele e faasoa atu ai mea e sili ona ou faatauaina i isi: o la’u molimau ma le Tusi a Mamona. Sa ou fia pei o lo’u epikopo ma lona faletua. Sa ou fia avea e faapei o Iesu Keriso Sa ou manao e fesoasoani e faapotopoto mai isi ma fesoasoani ia i latou e o mai ia te Ia.

Sa vave ona ou iloaina afai ou te tatalo a o le i faia malaga taitasi ina ia taitai atu ai i le tagata na manaomiaina, o le a faaali mai se tagata i le taimi sa’o ma le nofoaga sa’o mo au e avea ai le faasoaina atu o le Tusi a Mamona o se mea masani ma faigofie. O le tele o lo’u faataitaia, o le faigofie foi lea o la’u faasoa atu. Sa oo ina anoa atili au malaga mo a’u. Sa ou fiafia lava i taimi uma i le mauaina o le tagata faamanuiaina a le Tama Faalelagi i lenei molimau paia ia Keriso.

A ou malaga, sa ou mafaufau loloto, “O fea e tatau ona ou alu i ai e maua ai le tagata ua auina mai i ai au e le Tama Faalelagi i lenei taimi? O le a se mea e mafai ona ou fai atu ia te ia e faailoa atu ai le taua o le Tusi a Mamona ia te a’u?” Sa oo ina taulai atu o’u mafaufauga ma amioga i fafo atu o o’u lava manaoga ma faafiafiaga, ma sa ou lagonaina le alofa faateleina mo tagata uma sa ou feiloai i ai. Sa ou taumafai e tilotilo atu ia i latou e ala i fofoga o le Faaola. Sa ou tatalo mo i latou ia talia le meaalofa paia na auina mai a’u e le Tama Faalelagi e ofoina atu ia i latou.

Sa ou faanoanoa ina ua oo i le faaiuga o lo’u tausaga sinia. O le avea ma se tagata o le au lape tapuai mo le BYU o se miti i le olaga atoa mo a’u. Semanu ou te fiafia i le aafiaga ofoofogia e tapuai ai e tusa lava po o le a, ae o le avanoa e faasoa atu ai se kopi o le Tusi a Mamona i malaga faafiafia taitasi na faatamaoaigaina ai lo’u olaga i ni auala matagofie, e le i faamoemoeina.

O le faasoaina atu o le Tusi a Mamona o se auala taua ma faigofie e faaopoopo ai se isi vaega o le uiga i lo’u aafiaga i le iunivesite. Ou te iloa o tagata sa ou faasoaina atu i ai le Tusi a Mamona sa faapitoa ona taialaina ina ia mauaina. Ou te iloa foi i totonu o le ie lalaga ofoofogia o lo’u olaga, sa lalagaina ai e le Tama Faalelagi se alofa mutimutivale agamalu ma matagofie: Sa Ia faatagaina a’u ia ou lagonaina Lona alofa mo Ana fanau i se auala faapitoa i malaga uma sa ou faia.

Ina ua uma ona ou faauu, sa ou filifili e faaauau pea ona saili se tasi e mafai ona ou faasoa atu i ai la’u molimau. I le aluga o taimi, sa ou atiina a’e se tomai sili atu ma le mafanafana i le faasoaina atu o la’u molimau. Sa ou aoao e le toe fefe e faasoa atu. Ou te talitonu e mafai ona sili atu le to’afimalie o tagata uma e faasoa atu a latou molimau i le faataitai ma e ala i le ole atu mo se fesoasoani faalelagi.

O le filifili e mulimuli i faataitaiga a lo’u epikopo lelei ma lona faletua na atili anoa ai lo’u olaga i le tele o auala. Na aoaoina a’u ia iloa e silafia e le Alii tagata taitoatasi uma o Ana fanau. E alofa o Ia ia i tatou ma e naunau e faapotopoto i tatou uma i lalo o Ona apaau. Oka se faamanuiaga o le malamalama i le ata matagofie o loo Ia faaaogaina pe a Ia faamatalaina Lona faapotopotoina. Na te faapotopotoina i tatou e pei o se matuamoa e faapotopotoina ma puipuia ma le agaalofa lana toloa’i.

E alala le tusitala i Iuta, USA.