Ua Na’o Tusiga Faatekinolosi: Talavou Matutua
O Upumoni na Fesoasoani ia te Au e Faalagolago ai i le Mana o le Faaola e Suia ai Au
E nofo le tusitala i Samoa.
O le taliaina o Lona mana faamalolo e mafai ona fesoasoani ia i tatou e tuputupu ae ai ma suia.
Pe na e lagonaina ea ua tele taimi ua e faaletonu ai? E pei e leai se uiga o le toe amata ma toe taumafai, aua o le a e faia pea lava pea ia lava mea sese?
Ou te manatua se tasi aso sa ou lagona ai le leai o se faamoemoe ma le gaioi. Sa ou tagi i la’u uo mamae e uiga i se vaivaiga o loo ia te au. O se vaivaiga ou te lagona e pei lava ona ou i ai i taimi uma .
Sa ia taia au i lalo, ma o le mea moni, ou te lei manao lava e toe tu i luga. Sa ou galue agai i le mauaina o lo’u faaeega paia ma auauna atu i se misiona mo ni nai tausaga, ae o la’u tauiviga sa taofia ai a’u. Ou te lei lagonaina e pei lava ua ou agavaa e taumafai pea e avea ma se tagata o Le Ekalesia a Iesu Keriso o le Au Paia o Aso e Gata Ai.
O lena po, sa na ona ou manao lava e faamaamulu. Ae o le alofa ma le lagolago a la’u uo na faamanatu mai ai ia te au ni nai aafiaga e faatumauina ai le malosi o la’u molimau ma fesoasoani ia te a’u e faatuatuaina ai le mana o le Faaola e suia ai a’u.
Atonu o le a latou fesoasoani foi ia te oe.
Salamo—o le Ki i le Alualu i Luma
E tatau ona ou faamaoni—ou te lei talitonu i taimi uma i le folafolaga a Iesu Keriso e mafai ona Ia “faia lea o mea vaivai ia avea ma mea malolosi” (Eteru 12:27). Sa ou lagonaina e pei ua tele taimi ua ou faaletonu ai ma e le o avanoa Lana folafolaga o le faamagaloga mo a’u.
Ae o le aoao atili e uiga i le meaalofa o le salamo ua suia ai la’u auala e faatoilalo ai vaivaiga. Na aoao mai Peresitene Russell M. Nelson e faapea “o le salamo o le ki lea i le alualu i luma.” O le salamo e le o se mea tatou te faia i le taimi lava tatou te faaleleia ai i tatou lava ma ua saunia e agai i luma mai o tatou tauiviga; o le salamo o le auala tatou te valaaulia ai le mana o le Alii i o tatou olaga.
E masani ona ou lagonaina e silafia tonu lava e Satani le auala e faavaivaia ai a’u. Ae e pei ona aoao mai foi Peresitene Nelson: “Faamolemole aua le fefe pe faatuai ona salamo. E fiafia tele Satani i lou pagatia. Ia vave momotu. … E alofa le Faaola ia i tatou e le aunoa ae aemaise lava pe a tatou salamo.”
Ua umi se taimi na alu, ae ua iu lava ina ou aoao e faatuatuaina e finagalo le Faaola ia ou salamo. E finagalo le Tama Faalelagi ia ou toe foi atu e mau faatasi ma Ia e faavavau.
O le Malamalama i le Alofa Mama o Keriso
O valaaulia e le gata a le Faaola ia salamo na fesoasoani ia te au e vaai ai i isi mataupu faavae o le talalelei i se malamalama fou—e pei o le alofa mama. I le Ekalesia, tatou te faauigaina le alofa mama o “le ituaiga alofa aupito maualuga, silisili ona mamalu, sili ona malosi, ae le na o le alofa; o le alofa mama o Keriso.” Sa ou talitonu lava i taimi uma i le taua o le alofa mama, ae ou te manatu ou te le malamalama i le auala e amata ai ona atiina ae le alofa mama seia oo ina amata ona ou malamalama i le auala e faamagalo ai e le fuafuaga a le Faaola au agasala i le tele o taimi ou te salamo ai, o se faailoaga lea o Lona alofa atoatoa mo au.
Ma ina ua amata ona ou talitonu o le a ofoina moni mai e le Faaola ia te au avanoa e le gata e salamo ai ma o mai ia te Ia, sa amata ona ese la’u vaai i tagata o siomia ai au. Sa ou iloaina e mafai ona ou mulimuli i Lana faataitaiga e ala i le faatinoina o le alofa mama ia i latou o e faatiga ia te au. E mafai ona ou tuuina atu le faamagaloga ma le malamalama ia i latou o e na faamasinoina ma le amioletonu o’u tulaga le atoatoa.
Faavae mo Suiga
O nei mataupu faavae e lua—o le salamo ma le alofa mama—ua avea ma faavae o a’u taumafaiga e faataga Iesu Keriso e suia a’u. Ua amata ona ou vaai ia i nei vaega e lua o ni mataupu faavae e faafetaui ma fesootai.
Na aoao mai Peresitene Henry B. Eyring, Fesoasoani Lua i le Au Peresitene Sili, e faapea “o le lotofaafetai mo le faamagaloina o agasala o le fatu lea o le alofa mama.” Sa moni lenei mea mo a’u a o ou suia e ala i le salamo ma lagonaina le agaga faafetai mo le alofa ma le faamagaloga a le Atua. Ma o lenei ou te manao ia iloa e isi le alofa o le Atua e pei ona ou iloaina.
O lea la, i aso ou te le maua ai se uunaiga ma faaosoosoina ai e faamisi le lotu pe faataga mea taua e see ese atu, ou te manatua atonu e mafai ona ou faamalosia se isi tagata. Atonu e mafai ona avea a’u ma se faataitaiga ia i latou o loo siomia a’u o e o loo tauivi foi.
O le alofa ou te lagonaina mo lo’u Faaola ma le alofa mama ou te lagonaina mo i latou o loo siomia ai a’u, ua faatumauina ai lo’u malosi. E faamanatu mai ai ia te au le alofa mama o loo ia te Ia mo au. O loo ou galue pea i le faatoilaloina o o’u vaivaiga, ae ou te iloa o le faalagolago i Lona mana faamalolo o le a fesoasoani ia te au e faaauau ai pea ona tuputupu ae ma avea atili e faapei o Ia.