“O Le Galuega Sili a le Alii ma lo Tatou Avanoa Sili,” Liahona, Iulai 2024.
O Le Galuega Sili a le Alii ma lo Tatou Avanoa Sili
Pe a tatou alolofa, faasoa atu, ma valaaulia, o loo tatou galulue faatasi ma le Alii e fesoasoani i agaga faapelepele taitoatasi ia o mai ia te Ia.
O perofeta uma i lenei tisipenisione mulimuli, ma le maoae ua aoaoina tagata o Le Ekalesia a Iesu Keriso o le Au Paia o Aso e Gata Ai e faasoa atu le talalelei toefuataiina a Iesu Keriso. I lou olaga atoa, e tele faataitaiga e oo mai i lou mafaufau:
Na folafola mai e David O. McKay (1873–1970), le perofeta o lo’u talavou,“O tagata uma o le ekalesia o se faifeautalai.”
Na aoao mai Peresitene Spencer W. Kimball (1895–1985), “O le aso mo le tauaveina o le talalelei i nisi nofoaga ma tagata o loo i ai tagata iinei ma le taimi nei,” ma “e tatau ona tatou faalauteteleina a tatou laa” i le faasoaina atu o le talalelei i isi.
Na saunoa Peresitene Gordon B. Hinckley (1910–2008): “E Maoae la tatou galuega, e maoae lo tatou tiutetauave i le fesoasoani atu ia maua i latou e aoao. Ua tuuina mai e le Alii ia i tatou se poloaiga ina ia aoao atu le talalelei i tagata uma. O lenei mea o le a manaomia ai [a tatou] taumafaiga sili ona lelei.”
Ma sa aoao mai Peresitene Russell M. Nelson: “O le galuega faafaifeautalai o se vaega taua o le faapotopotoina tele o Isaraelu. O lena faapotopotoina o le galuega aupito sili lea ona taua o loo tupu i le lalolagi i le taimi nei. E leai se isi mea e faatusalia i le maofa tele. E leai se isi mea e faatusalia i le taua. O faifeautalai a le Alii—Ona soo—o loo auai i le lu’i aupito silisili, le mafuaaga aupito silisili, ma le galuega aupito silisili i luga o le fogaeleele i le taimi nei.”
Sa oo ina ou iloa lenei mea mo au lava ia o se faifeautalai talavou i le Misiona a Peretania. Ua sili atu ona ou mautinoa lena mea i le asō. I le avea ai ma se Aposetolo a le Alii o Iesu Keriso, ou te molimau atu o loo i ai avanoa i soo se mea e fesoasoani ai i isi ia o mai ia Keriso e ala i le faaalia o lo tatou alolofa, faasoa atu o tatou talitonuga, ma valaaulia i latou e auai faatasi ma i tatou ia lagonaina le olioli o le talalelei a Iesu Keriso.
E Agai i Luma le Galuega
Sa faamanuiaina au i le i ai i se tofiga i le Matagaluega a Faifeautalai o le Ekalesia i le taimi na faalauiloa mai ai le uluai kopi o le Tala’i La’u Talalelei i le 2004, ma faapea foi ina ua faalauiloa mai le lolomiga lona lua i le 2023. Ou te talitonu ua faamanuiaina e le Tala’i La’u Talalelei le galuega faafaifeautalai i se auala loloto.
O le Tala’i La’u Talalelei fou e aofia ai mea uma ua tatou aoaoina talu mai le 2004, taitaiga musuia mai uso uma o le Au Peresitene Sili ma le Korama a Aposetolo e Toasefululua, ma suiga na faia mo le faasoaina atu o le talalelei i se vaitau faatekinolosi. O nisi o nei suiga ua tulai mai ai se manuia maoae.
Ua matou iloa o le faasoaina atu o le talalelei i ni auala faigofie, masani, ma faalenatura e ala i mataupu faavae o le “alofa, faasoa atu, valaaulia” e matua faamanuiaina ai le malo. Sa faasoa mai e Iesu Keriso le talalelei i le ala lea na soifua ai o Ia i le lalolagi. Sa Ia faasoa mai Lona soifua ma Lona alofa ma valaaulia tagata uma e o mai ia te Ia.(tagai Mataio 11:28). Ina ia alofa, faasoa atu, ma valaaulia e pei ona Sa Ia faia o se faamanuiaga faapitoa ma se tiutetauave mo tagata uma o le Ekalesia.
Amata i le Alofa
I le Faatoaga o Ketesemane ma luga o le satauro, na tauave ai e Iesu Keriso i Ona lava luga agasala a le lalolagi ma mafatia i faanoanoaga uma ma “tiga ma puapuaga ma faaosoosoga o ituaiga eseese uma” (Alema 7:11). O lenei mea “na oo [ai] ia te [Ia], … o lē ua silisili i tagata uma, le gatete ona o le tiga, ma tafe toto ai i pu afu ninii uma” (Mataupu Faavae ma Feagaiga 19:18.) E ala i Lana Togiola ma le Toetu, ua fai ai e Iesu Keriso le faaolataga ma le faaeaga ia maua e tagata uma.
O le liliu atu i le Faaola ma mafaufau loloto i mea uma ua Ia faia mo i tatou o le a fatuina ai i totonu o i tatou se loto e faatumulia i le alofa mo Ia. Ona Ia liliu atu lea o o tatou loto i isi ma poloaiina i tatou ia alolofa ia i latou (tagai Ioane 13:34–35) ma faasoa atu Lana talalelei ia i latou (tagai Mataio 28:19; Mareko 16:15). Afai e mafai ona lagona e i latou o siomiaina i tatou, tatou te alolofa moni ma tausia i latou, atonu o le a tatala o latou loto i a tatou savali, e pei lava ona tatalaina e le Tupu o Lamonae lona loto e talia le talalelei ona o le alofa ma le auaunaga a Amona (tagai Alema 17–19).
A tatou faasoa atu le talalelei, ia tatou amata i le alofa. A o tatou aapa atu i isi i le alofa— a o manatuaina o i latou o ou uso ma tuafafine ma fanau faapelepele a lo tatou Tama Faalelagi—o le a matala avanoa mo i tatou e faasoa atu ai mea ua tatou iloa ua moni.
Ia Auai ma le Naunautai ma Faasoa Atu
E leai se tasi na sili atu ona tuuto i le faasoaina atu o le talalelei nai lo Peresitene M. Russell Ballard (1928–2023). I lana lauga i lana konafesi aoao mulimuli, sa ia molimau ai, “O se tasi o mea aupito mamalu ma le ofoofogia e mafai ona iloa e soo se tasi i lenei lalolagi—ua faaalia lo tatou Tama Faalelagi ma le Alii o Iesu Keriso i La’ua lava i lenei aso amulī ma na tula’i a’e Iosefa e toefuatai mai le atoaga o le talalelei e faavavau a Iesu Keriso.”
I lona soifuaga atoa, ma i le tele o atunuu i le lalolagi, sa auai ai ma le naunautai Peresitene Ballard i le faasoaina atu o lenei savali taua i tagata uma. Ua ia faamalosiau mai ia i tatou ia faia foi lea mea e tasi. Na aoao mai o ia e mafai ona tatou faasoa atu le talalelei “e ala i le avea ma … tuaoi lelei ma e ala i le manatu i isi ma le faaalia o le alofa.” O le faia o lena mea, e mafai ai ona tatou “faasusulu atu le talalelei i [o tatou lava [olaga], ma … [faa]susulu atu i [isi] faamanuiaga o loo ofoina mai e le talalelei.” Tatou te “molimau atu i mea ua [tatou] iloa ma talitonu i ai ma mea [tatou] te lagonaina.” Sa aoao mai Peresitene Ballard, “O se molimau mamā … e mafai ona momoliina e le mana o le Agaga Paia i totonu o loto o i latou o e ua naunau e taliaina.”
O le faasoaina atu o le talalelei toefuataiina a Iesu Keriso o le faanaunauga sili lea o le loto o Peresitene Ballard. E mafai ona tatou auai ma le naunautai—e pei ona sa i ai o ia—i le faasoaina atu o le talalelei i upu atoa ma galuega. Tatou te le iloa lava po o ai o loo saili mo le malamalama o le talalelei ae e le iloa le mea e maua ai (tagai Mataupu Faavae ma Feagaiga 123:12).
Tuuina Atu se Valaaulia Mai le Loto
I le fesoasoani atu i isi ia o mai ia Keriso, e mafai ona tatou valaaulia i latou ia lagonaina le olioli e aumaia e le Faaola ma Lana talalelei. E mafai ona tatou faia lenei mea e ala i le valaaulia o i latou e o mai i se gaoioiga, e faitau le Tusi a Mamona, pe feiloai ma faifeautalai. E mafai foi ona tatou tuuina atu se valaaulia mai le loto mo i latou e auai faatasi ma i tatou i le sauniga faamanatuga.
Tatou te auai i sauniga faamanatuga i vaiaso taitasi e “tapuai i le Atua ma aai ma feinu i le faamanatuga e manatua ai Iesu Keriso ma Lana Togiola.” O se taimi lelei lenei mo tagata e lagona ai le Agaga, faalatalata atili atu ai i le Faaola, ma faamalosia ai lo latou faatuatua ia te Ia.
A o tatou vaavaai mo auala e alolofa ai, faasoa atu, ma valaaulia, o a tatou fuafuaga ma taumafaiga e tatau ona aofia ai le fesoasoani i tagata ia auai i le sauniga faamanatuga. Afai o le a latou taliaina la tatou valaaulia ma auai i le sauniga faamanatuga, o le a sili atu ona latou faaauau i luga o le ala i le papatisoga ma le liuaina. Ou te talitonu ma lo’u loto atoa o le a oo mai le manuia tele pe a tatou valaauliaina isi e auai i sauniga faamanatuga ma fesoasoani ia i latou ia iloa faamanuiaga e mafai ona latou maua mai le auai faatasi ma outou.
O le a Ta’ita’ia i Tatou e le Alii
Tatou te le iloa lava po o a faamanuiaga ma luitau o le a tatou maua ao tatou alolofa, faasoa atu, ma valaaulia. O atalii o Mosaea “na o atu mai lea aai i lea aai, ma mai le tasi fale tapuai i le isi, … i totonu o sa Lamanā, e talai ma aoao atu le afioga a le Atua i totonu o i latou; ma sa faapea ona amata ona latou maua o le manuia tele.” E ala ia latou taumafaiga, “e faitau afe na aumaia i le malamalama o le Alii” ma le toatele “sa liua … [ma] e lei pauu ese lava” (Alema 23:4–6).
E ui o le a le avea lenei mea ma o tatou aafiaga i taimi uma, ae ua folafola mai e le Alii o le a Ia galue soosootau’au ma i tatou aua e taua agaga uma ia te Ia. A o tatou tuu atu lo tatou faalagolago i le Alii ma punouai i Lana auaunaga, o le a Ia taialaina i tatou i le auala e faasoa atu ai Lana talalelei i isi e ala i le alolofa ia i latou, faasoa atu o tatou olaga ma molimau ia i latou, ma valaaulia i latou e auai faatasi ma i tatou i le mulimuli atu ia te Ia.
“O le a tele lava [lo tatou] olioli” (Mataupu Faavae ma Feagaiga 18:15) pe a tatou faaaogaina avanoa o siomia ai oe e fesoasoani ai i le Alii o Iesu Keriso i Lana galuega sili o le aumaia o agaga ia te Ia.