“Aua Le Misia Se Misiona Sinia,” Liahona, Iulai 2024.
Matutua ma le Faatuatua
Aua Le Misia se Misiona Sinia
O a tatou feagaiga e valaaulia ai i tatou e auauna atu i le tasi ma le isi, tutu atu o se molimau a le Atua, ma faamafanafana i latou e manaomia le faamafanafanaga. O le auauna atu o se faifeautalai sinia o se tasi lea o auala e faataunuu ai nei valaaulia, faamanuiaina o o tatou lava olaga ma i latou tatou te auauna atu i ai.
E 34,000 faifeautalai matutua o loo auauna atu faamisiona po o misiona auauna atu i le taimi nei o e, e pei foi o o latou sui laitiiti, o loo mauaina le tele o le olioli i le faigamalaga. O tagata nofofua ma ulugalii e mafai ona auauna atu o ni faifeautalai matutua i ni tofiga eseese.
Ma e matuai tele le manaomia. I le konafesi aoao ia Oketopa 2023, na uunaia ai e Elder Ronald A. Rasband o le Korama a Aposetolo e Toasefululua ia tagata matutua atu e mafaufau i se misiona sinia. Sa ia fesili: “‘O le a lau mea o fai i lenei tulaga o lou olaga?’ E tele naua auala e mafai e faifeautalai matutua ona fai ai mea e leai se isi na te mafaia. O outou o se ‘au ofoofogia mo le lelei, ua poto masani i le Ekalesia, ma ua i ai i ni tulaga lelei e faamalosiau ai ma lavea’i fanau a le Atua.”
I le faamalamalama atu o le ala e valaauina ai faifeautalai matutua, na saunoa ai Peresitene Russell M. Nelson: “O avanoa mo faifeautalai matutua e eseese ma tele. O o latou valaauga e auauna atu e faia aloaia pe a maea ona iloiloina ma le agaga tatalo ua tuuina atu i lo latou talaaga faalegaluega, aafiaga o le gagana, ma gafatia faaletagata lava ia. Mai agavaa uma e auauna atu, “o se manao e auauna atu atonu e sili ona taua.” Sa ia faamatalaina foi saofaga a faifeautalai matutua “e le masuia.”
“O nisi o faifeautalai matutua e galulue i le ofisa o le misiona po o galuega taulamua a le BYU–Pathway po o galuega alofa o loo i ai se fausaga ua faamatalaina lelei,” na ta’ua ai e se faifeautalai sinia. “Sa ma auauna atu i le tele o na ituaiga o misiona e i ma’ua lava. O lea sa ma le mautonu ai ina ua valaauina i ma’ua i se misiona a le ATT (lagolago mo tagata o le ekalesia ma taitai). O le taimi lava na ma amata ai, sa ma fiafia moni lava i le fetuunaiga ma le fatufatuai o lena ituaiga o misiona na tuuina mai ai ia i maua e asiasi atu i tagata o le ekalesia ma faamalolosia paranesi i le lotoifale.
Fai mai se uso matua o loo auauna atu i se nofoaga autu mo tagata asiasi mai, “Ina ua maliu lo’u toalua, sa ou le mautinoa po o le a le mea e fai i lo’u taimi. O lea la ua ia te au ni mea e fai, nofoaga e alu i ai, tagata e vaai. E i ai tagata e faalagolago ia te au.”
“E le manaomia ona popole e tusa lava pe e te le i auauna atu a o e laitiiti,” na fai mai ai se tuafafine ina ua foi mai i le fale mai lana misiona sinia. “O se matafaioi fou mo tagata uma. Sa matou aoao uma faatasi e faalagolago i le Alii faapea foi le tasi ma le isi ma iloa ai ‘o mea laiti ma faatauvaa e faataunuu ai mea tetele’ [Alema 37:6].”
Faamanuiaga mo Faifeautalai
O misiona sinia e eseese lava e pei o faifeautalai matutua. E i ai ituaiga uma—e tofu ma ona lava luitau, olioli, ma faamanuiaga faaletagata lava ia. Ae e i ai ni nai mea masani mo soo se ituaiga o misiona sinia: suesueina anoa o tusitusiga paia, tatalo faifai pea ma le faatauanau, auaunaga punoua’i, taitaiga faifai pea mai le Agaga Paia, ma se avanoa tulaga ese e faia ai se eseesega.
“Ou te le i lagonaina lava se latalata atili atu i le Alii nai lo le taimi sa ma auauna atu ai o ni faifeautalai matutua,” sa fai mai ai se faifeautalai sinia. “Sa ou iloaina o nisi o mea sa le mafai ona ou puleaina, aemaise lava i le fale faatasi ma tamaiti ma fanau a fanau. O lea sa ou tuuina ai mea i aao o le Alii. Ma sa Ia faamanuiaina lo matou aiga. Matou te le i latalata lava i fanau a le ma fanau nai lo le asiasi atu ia i latou i vaiaso taitasi i le Zoom. Sa matou talanoa e uiga i mea semanu latou te le fiafia muamua i ai. E ui e le tupu i tagata uma, i lo matou tulaga, na toe foi mai se tasi o atalii i le lotu a o ma auauna atu, ma sa toe faaipoipo se isi atalii ma sa faamauina mulimuli ane i le malumalu.”
Sa fai mai se isi faifeautalai sinia, “O a matou suesuega faaletagata lava ia ma faalesoa o tusitusiga paia i aso taitasi na sili atu ona anoa aua sa matou sailia ni auala e faaaoga ai tusitusiga paia, ae le na o le faitauina. Sa le na ona ou alu mo le ‘maila’ e pei ona sa ou faia i nisi taimi ua tuanai. I la matou auaunaga, sa foliga mai sa ou faasino pea lava pea i se mau sa matou faitauina i lena aso po o lena vaiaso, o lea sa amata ai ona ou faamoemoe e faaaoga tusitusiga paia lata mai nei sa ou faitauina i aso taitasi. Sa itiiti lo’u le fiafia i a’u suesuega o tusitusiga paia, ma le faamoemoe o le a ou faasino atu i se mea sa ou faitauina i le aso.”
“O le auauna atu i se misiona ua tuuina mai ai ia te au se mea fou e fiafia ai o le olaga,” o le tala lea a se tuafafine matua. “Na tuuina mai ai ia te au se faamoemoega anoa, se naunau fou mo le ola ai, ma se mea e fai i tua atu o le tapolo po o le tausia o fanau a fanau.”
“O le auauna atu o se auala e lua itu,” na ta’ua ai e se isi faifeautalai matua. “Ina ua matou mafaufau—o sina manatu faatauvaa—e uiga i le tele o mea sa matou faia mo isi, sa le i tele so matou manuia. Ae ina ua matou iloaina le tele o lo matou aoaoina ma le tuputupu a’e o i matou lava, sa le gata ina matou suia ae sa foliga mai foi na sili atu le naunau o isi i mea sa matou fai atu ai ma faia. Sa matou lafo a matou falaoa i luga o le vai, ma sa pei na toe foi mai ua faapata.”
Sootaga Malolosi Atu
Pe a auauna atu tagata o ni faifeautalai matutua, latou te atiina a’e ni sootaga loloto lea e tumau i le olaga atoa. E toatele ua latalata atu i tagata o loo latou auauna atu i ai. Latou te atiina a’e foi ni sootaga malolosi ma isi faifeautalai ma taitai i le lotoifale. “Sa matou fatuina ni faauoga ma faifeautalai talavou, o isi ulugalii, ma tagata matou te lei feiloai lava i ai pe ana matou nonofo i le fale,” o le tala lea a se tasi o faifeautalai sinia. “O loo matou fesootai pea ma le tasi ma le isi. I se taimi sa ou manatu ai o le a tutusa aso uma, o le alu i se misiona na tuuina mai ai ia i matou se amataga fou ma ni uo fou e faasoa mai le malaga ia i matou.”
O misiona matutua e mafai ona fesoasoani i ulugalii e faamalolosia foi a latou faaipoipoga. A o litaea tagata pe faaitiitia le taimi e galulue ai, atonu e iloa e ulugalii e manaomia ona latou toe iloiloina faatasi se faamoemoega masani ona atonu o le a le toe tausiaina ni fanau i lo latou fale. Atonu foi ua latou masani io latou lava auala o mea e fai ma a latou lava taimi faatulagaina. O le matua po o le litaea e mafai ona suia ai lena mea. O le amataina o se aafiaga fou, fefaasoaai faatasi, pe o le auauna atu mai le aiga po o le taimi atoa i se misiona sinia, e mafai ona fesoasoani e fausia se faamoemoega fou mo se ulugalii ma faamalosia lo la faalagolago i le tasi ma le isi.
“E i ai se faaupuga ua leva e faapea i le litaea ’e te maua le afa o le tupe maua ma faaluaina le tane e pei o le taimi muamua,’” na fai mai ai se tasi o tuafafine ma ata. “O le auauna atu i se misiona i se nofoaga e mamao ese ai mai le aiga na mafai ai ona ma talanoa e ala i nei suiga i auala o le a ma le mauaina lava a o le i faia le ma misiona. Ina ua litaea lo’u toalua, sa na ona ma le fesootai ma ita i totonu pe a i ai ni a ma feteena’iga. I le taimi nei, nai lo le alu o le tagata lava ia ma le le amanaiaina o le tasi ma le isi, ma te le mananao ia i ai se aafiaga le lelei i le galuega a le Alii, o lea ma te talanoa ai i mea e faalavelave ia i maua.”
“Sa amata ona ma talanoa ma lo’u toalua i po taitasi e uiga i le alofa mutimutivale agamalu sa ma maua i aso taitasi a o auauna atu i le ma misiona,” sa fai mai ai se tasi o faifeautalai sinia. “E le gata ina fesoasoani ia i maua e taulai atili atu ai i le mea na tupu ae itiiti ia i maua lava, ae na tuuina mai ai foi ia i maua se avanoa e vaai ai i le lelei o siomia ai i maua e tusa lava pe le i sologa lelei vaega o le aso.”
“Ma talu ai o le mea mulimuli lea sa ma faia i po taitasi,” sa faaopoopo mai ai lona toalua, “sa faaitiitia ai lo ma o i le moega ma le atuatuvale nai lo le mea sa i ai mo le tele o tausaga. Sa fesoasoani foi ia te a’u e moe lelei ai!”
Faamanuiaga mo i Latou Latou te Auauna I Ai
O le olaga e i ai ona lugā ma lalō—o ona aso lelei ma aso leaga. E faapena foi misiona. Ae o le auauna atu i le Alii e tele ona taui taua, e le na o le mae’a ai o le misiona ae faapea foi i le taimi o le misiona. E pei ona fai atu lona tausoga o Moretekai ia Eseta, “E iloa foi e ai pe ua fai oe ma masiofo ona o se aso faapenei?” Eseta 4:14; faaopoopo le faamamafa). O le toe tepa i tua i la latou auaunaga, e toatele faifeautalai matutua ua lagonaina na tofia i latou i se galuega po o se eria na faapitoa ai lo latou agavaa e faataunuu se manaoga faapitoa.
Sa ou lagonaina le lelei mamana lea e mafai e se ulugalii matutua faamisiona ona faia e i latou lava ia a o ou nofo i Luisiana, ISA. E lei leva ona valaauina au e auauna atu o se fautua maualuga a le Siteki a New Orleans Louisiana, ae tofia au e lagolagoina le Paranesi a Port Sulphur. Sa na o ni nai uso perisitua na toaaga mai i le paranesi. O le tele o tulaga faafaiaoga ma faaleautaitai sa faatumuina e tamaitai o a latou tane e le o ni tagata o le ekalesia. Mai lea taimi i lea taimi, sa tofia ai faifeautalai matutua po o taitai o le siteki i le paranesi, ae sa faatapulaaina lo latou faamanuiaina i le aapa atu i nei aiga e le lolotu uma.
Ona tofia ai lea o se ulugalii matutua mai Wyoming, ISA, e lagolago le paranesi. Sa avea i laua ma ni faifaatoaga mo le tele o tausaga ma sa galulue i se fale gaosi sisi i le lotoifale e lata ane i lo latou fale. Ona o lo la talaaga ma aafiaga o le olaga, sa faigofie ai ona la fesootai atu i le toatele o tagata i Port Sulphur o e sa galulue i le pisinisi o le suauu. Sa faaaluina e le ulugalii matutua se taimi tele e fausia ai sootaga ma le auauna atu i aiga e le lolotu uma i le paranesi. Ona o le la auaunaga ma le alofa, i lo latou taimi i Port Sulphur sa matuai faamalosia ma faamanuiaina ai le paranesi e ala i la la auaunaga faamaoni. E toatele alii mai nei aiga e le lolotu uma na auai i le Ekalesia, na faamalosia le korama a toeaina ma le paranesi.
O faifeautalai matutua e faamanuiaina olaga—o i latou lava faapea foi ma isi’. Aua nei misia ni avanoa matagofie e auauna atu ai ma tuputupu a’e!