“O A Mea e Mafai Ona Tatou Tatalo ia Maua?,” Liahona, Iulai 2024.
Sau, Mulimuli Mai ia te A’u
O A Mea e Mafai Ona Tatou Tatalo a Maua?
I le Alema 33 ma le 34, ua aoaoina ai i tatou e mafai ona tatou tatalo i soo se mea, i soo se taimi, e faatatau i soo se mea. O nisi nei o faataitaiga o tagata o loo tatalo i ni tulaga eseese.
A o e faitauina nei aafiaga, mafaufau i nisi o auala na e tatalo ai “mo lafu o o outou fanua” ma “i totonu o o outou afeafe, ma o outou nofoaga lilo, ma i o outou vao” (Alema 34:25, 26).
Na oo Alma Richards o le Au Paia o Aso e Gata Ai i le au o le Olimipeka i le 1912.
Tatalo i le Olimipeka
O se tagata oso maualuga, o Alma Richards o se vaega o le au i le 1912 ma le vaega o le Olimipeka lea na tauva i Stockholm, Suetena. I le taimi o le tauvaga, sa pauu taitoatasi ai isi seia oo ina na o Alma ma le isi toatasi na totoe.
“A o sauni Alma e oso, sa faavavevave lona mafaufau. O ia lena, e avea ma sui o lona atunuu i le tauvaga afeleti aupito sili i le lalolagi. Ae sa ia lagona le vaivai, e pei o le lalolagi atoa ua i ona tauau. Sa mafaufau o ia i Iuta, lona aiga, ma lona nuu. Sa ia mafaufau i le BYU ma le Au Paia. Sa punou lona ulu, ma sa ia ole lemu atu i le Atua e tuu atu ia te ia le malosi. ‘Afai e sa’o le tatau ona ou manumalo,’ sa ia tatalo ai, ‘o le a ou faia le mea sili e fai ai se faataitaiga lelei i aso uma o lo’u olaga.’”
O le mauaina o le malosi mai le Alii, na oso ai Alma ma mamao lava mai le pa maualuga. Ina ua le manuia lana soa tauva na totoe, sa manumalo Alma i le pine auro.
Mulimuli ane, sa “taufaalili atu se uo ia te ia e uiga i le tatalo a o le i faia lana oso manumalo. ‘Ou te moomoo maimau pe ana e le ata,’ sa tali lemu atu ai Alma. ‘Sa ou tatalo i le Alii e aumai ia te a’u le malosi e ova ai i luga o lena pa, ma sa ou ova atu ai.’”
Tatalo i se Tulimanu o le Auala
I le 1898, o Inez Knight ma Jennie Brimhall o uluai tamaitai nofofua e toalua na valaauina o ni faifeautalai tamaitai mo Le Ekalesia a Iesu Keriso o le Au Paia o Aso e Gata Ai. E lei leva ona taunuu i a laua misiona i Egelani, ae o loa tamaitai e toalua e talai i Oldham, o se tamai taulaga gaosi mea e lata i Livapulu.
Sa tatalo Inez Knight ma Jennie Brimhall mo se fesoasoani i la la’ua auaunaga faafaifeautalai i Egelani.
Taumatau: ata pue mai faaaloaloga a Jennifer Whatcott Hooton
Sa faapotopoto uso e toalua, o le la peresitene o le misiona, ma isi faifeautalai i se tasi afiafi. “Sa latou faataali‘oli‘o i se tulimanu pisi o le auala, faia se tatalo, ma usu ni viiga seia oo ina siomia i latou i se motu o tagata e toatele.” Sa matuai faamanuiaina a la taumafaiga ma “na faasilasila ai e le peresitene o le misiona o le a faia se fonotaga faapitoa i le aso e sosoo ai, ma sa ia valaaulia tagata uma e o mai ma faalogo i le talaiga mai “tuusao a tamaitai Mamona.’”
Tatalo mo Femalagaaiga
O Sahr mai Bo, Sierra Leone, na malaga i se uila afi laupasese i se eria maotua e ave le tele o fualaau ma vai faafomai e manaomia i ona matua matutua. Sa ia nofo mo se umi e lei fuafuaina e fesoasoani i ona matua e lipea lo la taualuga, lea na faaleagaina i se matagi. E oo atu i le taimi na uma ai, ua amata ona pogisa.
Ona o le leva o le afiafi, sa le ono mafai ai ona sau se uila afi la’u pasese. Sa amata ona popole Sahr. A aunoa ma se uila afi la’u pasese, sa feagai o ia ma se malaga savali lea o le a le gata ina umi ae atonu foi e lamatia. O le nofo ai i le fale o ona matua sa le o se filifiliga ona sa i ai sana sifi i le taeao po i le galuega i le taeao na sosoo ai. E le gata i lea, sa lei manao o ia e tuua na o lona aiga talavou i le po.
O le tatalo mo se uila afi laupasese sa foliga mai e fai si ese, ae sa ole atu Sahr i le Atua e fesoasoani ia te ia e taunuu i le fale. I ni nai minute mulimuli ane, na sau ai se uila afi la’u pasese, faatoa tuu ese atu lava se tasi i lena eria e masani lava ona filemu. Sa oso ma le agaga faafetai Sahr, ma le lagonaina o le faamanuiaina o le a mafai ona i ai i le fale ma tele le taimi e tausia ai ana tautinoga faalegaluega ma tausia le saogalemu o lona aiga.
Tatalo mo se Suiga o taimi Faatulagaina
Sa tulimatai atu Uso Miguel Troncoso mai Santa Cruz, Atenitina, e faalogo atu ia Elder Carlos H. Amado o le Fitugafulu o saunoa atu i lana siteki. Ae sa faatulagaina Elder Amado e lauga i se afiafi o se Aso Lua, ma o Uso Troncoso, o se faiaoga o le aoga maualuga, sa tatau ona faiaoga i se vasega a le aoga i lena po. I le naunau ai e auai i le fonotaga, sa tatalo ai o ia ma lona aiga mo se fesoasoani.
Fai mai Uso Troncoso e uiga i lona aafiaga:
“O le aso a o lumanai le konafesi, sa ou lagona ai le uunaiga e talanoa i le puleaoga e uiga i le vave tuua i le 20 minute. … Ae ou te lei fai atua se upu, sa ia fesili mai ia te au pe ou te mafaufau e sui lau vasega o le Aso Lua e amata ai i le lua itula e muamua atu nai lo le mea e masani ai. …
“Oka se faamanuiaga mo i matou. Sa matou taunuu i le sauniga i le telē o le taimi ma lagonaina le Agaga i le i ai o se tasi o soo o le Alii. … E le gata i lea, sa matou mauaina se molimau o se aiga e silafia e le Tama Faalelagi o matou manaoga ma faafofoga mai i a matou tatalo.”