O Se Tala Manuia Faafaifeautalai: 60 Tausaga i le Faiga

Saunia e Christy Monson

O se aafiaga fiafia mo a”u le faalogo atu o se fatu o le talalelei na totoina i tausaga ua mavae na fua mai ai ni fua.

Ata

fatu i le eleele ma se laau toto ua fua mai

Ata na tusia e Carolyn Vibbert

Ou te fiafia lava i taimi uma i le Mataupu Faavae ma Feagaiga 18:10: “Ua tele le taua o agaga i le silafaga a le Atua.” Ma o nisi taimi e manaomia ai le toatele o i tatou e galulue faatasi i le faasoaina atu o molimau e aumai ai agaga i le Faaola (tagai 2 Korinito 13:1).

Sa faamanatu mai ia te a’u lenei manatu matagofie o le galuega faafaifeautalai tuufaatasi ina ua ou mauaina se imeli i se tasi aso. O se uso na fai mai o ia o le atalii o le peresitene o le misiona i Wichita, Kansas, sa mafaufau pe o a’u o le faletua o Robert Monson. Sa faaauau pea ona fai mai le uso sa ia sailia Elder Monson o lē sa auauna atu i le Misiona a Setete Tutotonu i le 1959. O lo’u toalua lena.

Sa ia faamatala mai ia te a’u e uiga i ni alii talavou se toalua o e na musuia talu ai nei e ulufale atu i se fale mautotogi. Sa la tu’itu’i le faitotoa muamua ma maua ai se tamaitai matua o lē sa valaauliaina i laua e toe foi mai i le aso na sosoo ai. Sa la faatulagaina se taimi.

Ina ua la toe foi mai mo le taimi faatulagaina, sa la iloa ai o lenei tuafafine matua sa i ai se fusi tolu tuai (Tusi a Mamona, Mataupu Faavae ma Feagaiga, ma le Penina Tau Tele) na tuuina atu e faifeautalai ia te ia i le 1959. Sa ia faitauina i le tele o taimi ma iloa ai e moni aoaoga o loo i ai. E lei auai o ia i le Ekalesia i lena taimi ona sa le manao lona toalua ia te ia e auai i le lotu pe papatisoina. Na maliu talu ai nei lona toalua, ma sa ia tatalo ina ia mafai ona ia toe maua faifeautalai. I lana fusi tolu sa i ai igoa o faifeautalai e toalua mai le 1959: o Robert Monson ma Granade Curran, o lo’u toalua ma lana soa.

I le aluga o nai vaiaso na sosoo ai, sa aoao ai lenei tamaitai e uiga i le ata o le faaolataga ma faamanuiaga o le malumalu. Na maliu lana tama i le 22 o ona tausaga, ma sa fiafia o ia i le ono toe faatasia ai ma ia. Ina ua valaaulia o ia e faifeautalai ina ia papatiso, sa ia taliaina ma le fiafia le la valaaulia.

Ua maliliu uma lo’u toalua ma lana soa, o Elder Curran, ae e mafai ona ou vaai faalemafaufau ia i laua o auai i lenei papatisoga matagofie mai talaatu o le veli.

A o faamatala mai e le atalii o le peresitene o le misiona ia te a’u le tala, sa faamanatu mai ia te a’u e le galo i le Faaola soo se tasi o i tatou. E faatasi pea o Ia ma i tatou pe afai tatou te faatagaina o Ia i o tatou olaga. O loo faamatala mai i le Feagaiga Fou le tala ia Sakaio, o lē sa a’e i se laau o le sukamoru e vaai ai i le Faaola (tagai Luka 19:1–10). E oo lava i luga o le laau, sa maua Sakaio e le Faaola, o lē sa talosaga e talisua i lona fale. E faapena foi, sa tatalo se uso matua ma faatalitali mo faifeautalai e tu’itu’i i lona faitotoa, ma sa la faia. E silafia i tatou uma lava e le Faaola. “Aua ua sau le Atalii o le tagata e saili ma faaola i lē [ua] leiloa” (Luka 19:10).

E lua soa faifeautalai—o le tasi ua silia ma le 60 tausaga talu ai ona sosoo ai lea ma se tasi talu ai nei—na aumaia lenei tuafafine ia Iesu Keriso ma faamalosia ai a laua lava molimau ma maua ai le olioli i le Alii. Ua faalotomaualaloina a’u ona e mafai ona avea a’u ma se tagata matamata i lenei tala, ma lagonaina le olioli o tagata uma e aafia i le aumaia o lenei tamaitai i le Faaola (tagai Mataupu Faavae ma Feagaiga 18:15).

E alala le tusitala i Iuta, ISA.