Ua Na’o Tusiga Faatekinolosi

O Manatu e 3 mo le Fausiaina o le Maufetuunai Faalelagona

By Derek Hagey and Glenn Schiraldi

Auaunaga Faaleaiga, Faufautua o le Maufetuunai

O nei manatu faigofie e tolu e mafai ona fesoasoani ia te oe e amata ai—pe faaauau ai—le fausiaina o le maufetuunai faalelagona.

o tamaitai e toatolu o loo tutu faatasi ma talie

E leai se tuai tele ona amata—pe faaauau—le galue i lou maufetuunai faalelagona. E pei ona aoao mai Elder Neil L. Andersen o le Korama a Aposetolo e Toasefululua, o le Atua “na faamalosia lou agaga ma mafai ai ona e tumau i asiosio o le olaga.” Ae afai e faigofie ona e faanoanoa i luitau i lou olaga, lea e mafai ona tupu ia i tatou uma mai lea taimi i lea taimi, o ni nai tomai nei e mafai ona e faataitaia e maua ai le maufetuunai sili atu i lou olaga:

1. Faamalosia lau sootaga patino ma le Tama Faalelagi ma Iesu Keriso. Auai i faiga faaleagaga e pei o le tatalo ma le suesueina o tusitusiga paia e fesoasoani ia te oe e te lagona ai le latalata atili atu i le Tama Faalelagi, ma manatua lou faasinomaga e faavavau o Lona atalii/afafine. Talitonu ia Iesu Keriso, maua le malosi e ala mai ia te Ia e ala i Lana Togiola, ma lagona Lona alofa mo oe. Saili le malosi e ala i au feagaiga ma le mana o le perisitua latou te aumaia i lou olaga a o e ola agavaa.

2. Atiae ni mafutaga malolosi. Fausia ni sootaga anoa lea e mafai ona e lagona ai le fesootai atu i isi tagata o e faamalosia oe i le ala o le feagaiga. Ma ia manatua o lou taua ua i ai ma e faavae i lou faasinomaga o se atalii po o se afafine o le Atua, ae le o manatu o isi e uiga ia te oe. A sauni e fegalegaleai ma isi, faataitai le manatunatuga puupuu lenei mai ia Elder Gary E. Stevenson o le Korama a Aposetolo e Toasefululua: “Oka, vaai mai ia te au! E ofoofogia a’u! O a’u o se atalii/afafine o le Atua! Na te silafia au! E alofa o Ia ia te a’u! Ua faameaalofaina a’u—faameaalofaina i le Agaga Paia e fai ma a’u soa tumau!” Ona manatua lea o uiga matagofie ua uma ona faamanuiaina ai oe e le Atua, ma ia e malolo ma avea ma oe lava ia.

3. Faataitai le mafaufau faaselesitila. Pe a oo ina faigata mea uma, e masani ona faatapulaaina o tatou vaaiga, ma amata ona tatou taulai atu i le taimi o le faanoanoa o i ai nei. O le “mafaufau selesitila,” e mafai ai ona tatou manatua o le tauiviga o loo i ai nei ua na o sina taimi puupuu lava.

Na faasoa mai e Peresitene Russell M. Nelson “O mea tonu lava o le a faia lou olaga faaletino ma mea silisili, e mafai ona avea ai e mafai ona avea ma mea tonu e tasi o le a faia lou olaga i le faavavau atoa i le mea sili e mafai ona i ai!” O le asō, ina ia fesoasoani ia te oe ia agavaa mo faamanuiaga silisili ua i ai i le Tama Faalelagi mo oe, ou te valaaulia oe ia fai le masani o le “mafaufau faaselesitila”! …

“Pe a e faia ni filifiliga, ou te valaaulia oe ia faia se vaaiga mamao—o se vaaiga e faavavau.”

Punaoa Faaopoopo

Ina ia aoao atili e uiga i le atiina ae o le maufetuunai faalelagona, lesitala i le kosi o le ola tutoatasi ”Mauaina o le Malosi i le Alii: Maufetuunai Faalelagona” (talanoa i taitai o lau uarota po o le paranesi mo nisi faamatalaga).

Ina ia aoao e uiga i nisi o aoga o le faaaluina o se taimi e mafaufau loloto ai ma toe mafaufau ai i o tatou olaga, faitau le “O Le Mana o Taimi Filemu.”

Mo se fesoasoani i le talanoa atu i lau fanau e uiga i le maufetuunai faalelagona, tagai i le “6 Manatu mo le Talanoa e uiga i le Maufetuunai Faalelagona ma Tamaiti.”

Faamatalaga

1. Neil L. Andersen, “O Asiosio Faaleagaga,” Liahona, Me 2014, 18.

2. Tagai i le Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai, 3.5, 3.6, Potutusi o le Talalelei.

3. Gary E. Stevenson, “Uunaiga a le Agaga,” Liahona, Nov. 2023, 45.

4. Russell M. Nelson, “Mafaufau Faaselesitila!” Liahona, Nov. 2023, 117.

5. Russell M. Nelson, “Mafaufau Faaselesitila!,” 117, 118.