“O La’u Savali mai le Atua,” Liahona, Iulai 2024.
O Leo o le Au Paia o Aso e Gata Ai
O La’u Savali mai le Atua
Sa leai sa’u molimau o le Tusi a Mamona seia oo ina fetalai mai le Alii ia te a’u e ala i le tusi a Helamana.
Ata pu’e mai faaaloaloga a le tusitala
Ina ua valaaulia au e se uo O Le Ekalesia a Iesu Keriso o le Au Paia o Aso e Gata Ai i le 2020, sa ou ioe ma le musuā. I le taimi muamua, ou te le i lagonaina o le nofoaga lea e i ai, ae sa faaauau pea ona ou auai i sauniga faamanatuga. Sa iu ina ou papatiso.
Peitai, ou te le i malamalama, i le mataupu o le i ai o se molimau e pei ona ta’ua e isi tagata o le Ekalesia. Sa matou faitauina faatasi ma tamaitai faifeautalai ni fuaiupu faatusi paia, ae ou te le i tatalaina lava e a’u lava ia le Tusi a Mamona. E ui i taumafaiga maoae a tagata o le Ekalesia e faafeiloai a’u ma faatumauina lo’u toaga, sa le’i pine ae amata ona ou tuai mai i le lotu, faamisi sauniga, ma toe foi atu i se tulaga faalelalolagi.
Ona oo lea i se tasi aso ina ua ou lagonaina se suiga faafuasei ma se loto atuatuvale. Sa ou lagonaina sa ou matua le mautu lava, faalelalolagi, ma tetee i mea a le Atua. Sa ou iloaina ou te le o i ai i le ala sa’o. A o ou i ai i lenei lagona, sa ou tepa atu i tusitusiga paia i luga o lo’u moega.
Sa ou valaau atu i le Atua e fai mai se tala ia te a’u. Sa ou faia sina tatalo laitiiti ma faatalitali e faalogo i soo se mea. Sa ou manaomia sina mafanafana ma le manino.
Ona ou faalogoina lea o se mea. Ou te le iloa pe na sau le leo mai totonu o lo’u mafaufau po o totonu o o’u taliga, ae sa ou faalogo i upu “Helamana 3:27.” Sa ou iloaina o le tusi a Helamana sa i ai i le Tusi a Mamona, o lea sa ou aveina ai tusitusiga paia ma alu i le lisi o anotusi e su’e ai lena tusi.
O le mea na sosoo ai sa ou faitauina o se savali mai le Atua sa faapitoa ia te a’u lava mo lena taimi o lo’u olaga: “Ua faapea ona mafai ona tatou vaai ai e alofa mutimutivale le Alii ia i latou uma o e e valaau atu i lona suafa paia, ma le faamaoni o o latou loto.”
O lenei fuaitau na suia ai la’u vaaiga e uiga i a’u faatinoga ma e uiga i le Tusi a Mamona. Sa ou iloaina o a’u amioga ma le le faamaoni i le Atua sa sese ma e tatau ona ou valaau atu ia te Ia ma salamo. Ou te iloa o le a le faafitia lava a’u e le Atua i Lona alofa mutimutivale ma faamanuiaga pe afai ou te faamaoni i le valaau atu ia te Ia ma mulimuli ia te Ia.
O le auala lena na oo mai ai la’u molimau e uiga i le Tusi a Mamona—o se tusi sa ou le faaalia ai se fiafia i le faitauina. Ou te iloa o loo soifua le Atua, ma e talanoa mai o Ia ia i tatou i le asō, ma e moni le Tusi a Mamona.