“Talanoaga Faaleaiga e uiga i le Pule i le Ola,” Liahona, Iulai 2024.
Talanoaga Faaleaiga e uiga i le Pule i le Ola
I le avea ai ma matua, tatou te mananao e saunia a tatou fanau mo so o se tulaga lamatia e ono feagai ma i latou. E ui atonu e le lelei le talanoa e uiga i ai, ae o le pule i le ola o se tasi lea o na tulaga lamatia.
O le olaga faaleaiga e pei o se tafaoga faatafefea i vai tafe malolosi. A o tufa atu e aiga ia ofu ma pulou faaola, e pei lava matua o taiala o le vaitafe o e na ui atu i lenei ala muamua. E manaomia e fanau i tatou e lapataia i latou i āu malolosi po oalā o i luma atu. Afai e mamao i lalo ifo o le vaitafe atonu o i ai se afu faataumaoi, pe o le a tatou lapataia ea a tatou fanau e uiga i ai? Pe o le a tatou faatonuina ea i latou i le auala e ’alo ai ma le mea e uli ai e faafeao ai lo latou ala, pe tatou te faatali seia latou taupeupe mai le tofē e lapataia ai i latou?
I le avea ai ma matua, atonu tatou te le toafimalie i le talanoaina o se autu e le lelei e pei o le pule i le ola, ae e mafai ona tatou fesoasoani e puipui ma saunia a tatou fanau a o le’i i ai ni o latou mafaufauga matautia.
E mafai e matua ona fesoasoani i fanau ia aoao ia malolosi faalelagona ma ia iloa le mea e mafai ona latou liliu i ai pe a latou manaomia se fesoasoani faalelagona. Na aoao mai Reyna I. Aburto, o lē sa avea muamua ma Fesoasoani Lua i le Au Peresitene Aoao o le Aualofa e faapea “e mafai ona aofia ai le logoina e uiga i gasegase faalelagona, mauaina o punaoa e mafai ona fesoasoani e taulima ai nei tauiviga, ma iu ai ina aumaia i tatou lava ma isi ia Keriso, o le Fomai Sili.”
O Se Faafitauli Taua e Talanoa e Uiga i Ai
O nisi o pule i le ola e tupu e aunoa ma le iloaina o ni faailoga. Mo nisi e na o faailoga ma’ale’ale, po o nisi taimi e le mafaaseseina ia faailoga. E le mafai ona tatou iloa ma le mautinoa mea o loo mafaufau i ai a tatou fanau, o lea e manaomia ai ona tatou saunia i latou a o talavou—ina ne’i taofimau o latou mafaufau i manatu o le pule i le ola.
Na faamautinoa mai e Sister Aburto, “E taua le talanoa atu e uiga i nei faafitauli i a tatou fanau, aiga, ma uo i o tatou aiga, uarota, ma alalafaga.”
Na aoao mai Elder Dale G. Renlund o le Korama a Aposetolo e Toasefululua: “E tofu i tatou uma ma tagata o le aiga, uo pele, po o e masani ua oo i mafaufauga o le pule i le ola, taumafai e pule i le ola, pe ua pule foi i o latou ola. … O le tele o uarota ma siteki [ma aiga] e mafaufau e faia se talanoaga e uiga i le puipuiga mai le pule i le ola pe a uma ona pule i le ola se tasi. O la’u fesili o le—aisea e faatali ai? Aisea e le faia ai nei loa? Ona o loo i ai se tasi i le uarota po o le siteki o loo i ai ni mafaufauga e pule i le ola.”
Sa ou nofo i lalo ma la’u lava fanau i ni nai tausaga ua mavae ina ua mavae se faalavelave na tupu i le lotoifale. Sa ou lagonaina le faamalosia e faasoa atu ia i latou e ala ia Iesu Keriso, o loo i ai lava i taimi uma se auala e agai ai i luma. E leai se mea e mafai ona latou faia, pe le faia foi, o le a avea ai le pule i le ola ma tali. I lo latou matutua agamalu, sa leai se mafuaaga ou te mafaufau ai ua lamatia i latou, ae sa ou iloa e tele atu mea e mafai ona ou faia e saunia ai la’u fanau mo le taulimaina o ni mafaufauga matautia, e ono pule i le ola.
O Le Talanoa e uiga i le Pule i le Ola e Taofia ai le Pule i le Ola
Ua faailoa mai e le taiala o punaoa a le Ekalesia mo le puipuiga o le pule i le ola: “O le talanoa e uiga i le pule i le ola o le a le mafai ai e se tasi ona taumafai e pule i le ola. O le mea moni, o le tatala o le talanoa e uiga i le pule i le ola o se auala manuia e fesoasoani e puipuia ai le pule i le ola.”
E tusa ai ma le saunoaga a John Ackerman, PhD, o le pule o le puipuiga o le pule i le ola i le Falemai o Tamaiti i le Atunuu Atoa, “O le fatuina o se avanoa saogalemu e talanoa ai e uiga i le pule i le ola e mafai ona faasaoina ai le ola o se tamaitiiti.” O le mea moni, na ia faaopoopo mai, “afai sa tauivi se tamaitiiti ma ni mafaufauga o le pule i le ola, ma le iloaina o se tagata matua popole ua naunau e faia se talanoaga e le taofiofia e masani lava o se toomaga.”
“O le talanoa e uiga i le pule i le ola i auala talafeagai e fesoasoani moni lava e taofia ai nai lo le faamalosiauina,” na aoao mai ai Sister Aburto. Na maliu lona tamā i le pule i le ola. Mo le tele o tausaga, sa ia aloese mai le talanoa e uiga i lona maliu faatasi ma lona aiga. Peitai, ua ia aoaoina talu mai lena taimi le taua o le talanoa ma le faamaoni ma le manino. Ua ou talanoaina saoloto nei ma la’u fanau le oti o lo’u tamā ma molimauina le faamalologa e mafai e le Faaola ona tuuina mai i itu uma e lua o le veli.”
O talanoaga e le taofiofia e uiga i le pule i le ola e mafai ona faamalosia ai fanau e o mai i o latou matua ma isi tagata matutua faatuatuaina nai lo le taumafai e faatautaia mafaufauga e pule i le ola e i latou lava, pe afai e tulai mai.
O tamaiti e laiti pe a ma le ono pe fitu ua lipotia mai mafaufauga o le pule i le ola. “Sa masani ona faapea … sa lei talitonu le au faitofa ma tagata sailiili ma matua o tamaiti laiti e i lalo ifo o le 10 po o le 11 sa i ai ni mafaufauga o le pule i le ola,” o Dr. Ackerman ua saunoa mai ai. “Ua tatou iloa e le moni lena mea.” Ua ia faailoa mai e oo lava i tamaiti laiti e mafai ona faafesootaia manatu o le pule i le ola ma lagona e pei o se avega, i ai i tiga faalelagona, po o le oo i le leai o se faamoemoe.
Na faamautinoa mai e Sister Aburto: “O le iloaina pe faapefea ona faailoa faailoga ma auga ia i tatou lava ma isi e mafai ona fesoasoani. E mafai foi ona tatou aoao e iloa ai le le saʻo po o auala o mafaufauga le lelei ma le auala e suitulaga ai i [mafaufauga] sili atu ona sa’o ma maloloina.”
O le Pule i le Ola e Sili Atu Ona Tupu Soo Nai lo le Mea Tatou te Mafaufau i ai
I le lalolagi atoa, e toeitiiti lava tasi le oti i le pule i le ola e tupu i le tai 40 sekone, ma o le mafuaaga lona lua lea o le oti i le lalolagi mo tagata e 15–24 tausaga. I se suesuega talu ai nei na faia i le faitau afe o talavou i Iuta, ISA, sa iloa ai e tagata sailiili mai le Iunivesite o Brigham Young e tusa ma le 12 pasene o talavou o le Au Paia o Aso e Gata Ai sa manatu mamafa i le pule i le ola, ma e 4 pasene na faia se taumafaiga.
Mo le matalalaga, i se vaega e 25 tupulaga talavou, e toa 3 o i latou, o loo talanoa faafuainumera, ua manatu mamafa i le pule i le ola, ma ua faia e se tasi se taumafaiga e pule i le ola.
Afai e mafai ona tatou fesoasoani i a tatou fanau ia maua le lagolago latou te manaomia ae latou te le i oo i le tulaga o le faalavelave—pe a liua manatu i se fuafuaga—atonu o le a mafai ona tatou fesoasoani ia i latou e suia le ala a o lei tuai.
O Fea e Amata Ai
A o laiti lava, e mafai ona amata malamalama tamaiti i lagona, ae e mafai ona tatou tuuina atu ia i latou le gagana e faamatala sa’o ai o latou lagona. O le laasaga muamua atonu o le fesoasoani i se tamaitiiti laitiiti e fausia lana vaogagana faalelagona. E mafai ona tatou aoaoina tamaiti ia malamalama i eseesega i le va o le ita, faanoanoa, le fiafia, ma isi mea faapena. Afai e mafai e le tamaitiiti ona faamatala mea o loo ia lagonaina, e mafai ona tatou galulue faatasi mai iina. I se auala e talafeagai ma le matutua, e mafai ona tatou talanoaina o latou lagona malolosi ma tamaiti e tai ono tausaga ma fesoasoani ia i latou ia iloa ma talanoaina nei lagona.
O nei talanoaga i le amataga o le a fesoasoani foi i matua e faamasani ai i lagona masani o a latou fanau. O le toatele o tamaiti e o atu i luga ma lalo i le manuia faalelagona. O se mea masani lena. O le faia o ni talanoaga vave ma le tele o taimi ma fanau laiti e mafai ona tuuina atu ai i matua se fua o lagona e iloatino ai eseesega i le va o tulaga masani o le lugā ma lalō o manatu faatamaitiiti matautia.
O talanoaga e puipuia mai ai e uiga i le pule i le ola e pei lava o isi aoaoga faamasani mo matua o loo puipuia e tuuina atu. E mafai ona tatou saunia tamaiti ma le autalavou mo le avanoa e aafia ai i manatu o le pule i le ola i le ala lava e tasi e mafai ona tatou saunia ai i latou mo le auala e ave ai se taavale ma le mea e fai pe a tupu se faalavelave faafuasei. “Tatou te mananao e saunia a tatou fanau ia malamalama i le mea e mafai ona tupu faalelagona ma mea latou te ono vaaia ia latou uo,” o le tala lea a Dr. Ackerman.
Faaauauina o le Talanoaga
A o matutua tamaiti, o talanoaga tatou te faia ma i latou o le a matutua foi. E mafai ona tatou faia ni fesili e tatala ai avanoa ona faataga lea o tamaiti e tali ma le faamaoni. Uunaia tamaiti ia faamaoni i o latou lagona faigata. Ua faaalia i sailiiliga o le taulimaina o lagona faigata e ono faaitiitia ai lo latou malosi ma le umi.
E ala i fesootaiga faigofie e uiga i le atuatuvale, pule i le ola, po o lagona o le lotovaivai, e aoao ai e tamaiti e mafai ona latou faasoa mai o latou mafaufauga faamaoni ma e saogalemu faalelagona ia i tatou. “Latou te maua foi le savali manino e te popole tele ia i latou, ma o lo latou fiafia ma le soifua manuia e taua ia te oe,” o le tala lea a se tasi o faufautua o le soifua maloloina faalemafaufau.
O lo tatou alolofa ma le lagolago mo a tatou fanau e mafai ona faataitai ai le alofa o le Tama Faalelagi mo i tatou taitoatasi. “E alofa lo outou Tama Faalelagi ia te outou—outou taitoatasi,” na aoao mai ai Peresitene Thomas S. Monson (1927–2018). “E le suia lava lena alofa. … Ua i ai iina mo outou pe a outou faanoanoa pe fiafia, lotovaivai pe tumu i le faamoemoe. Ua i ai iina le alofa o le Atua mo outou e tusa lava pe tou te lagona pe le lagona e alagatatau mo outou lea alofa. E i ai lava iina i taimi uma.”
I le taimi lava na uma ai ona ou talanoaina le pule i le ola faatasi ma la’u lava fanau, sa fesili mai lo’u atalii e iva tausaga pe mafai ona ia talanoa faalilolilo mai ia te a’u. Sa ia ta’u mai e uiga i taimi na ia mafaufauina ai e pule i lona lava ola, ma le auala o le a ia faia ai. Semanu e le mafai lava ona ou moemiti sa ia maua nei mafaufauga. Sa ou opoina o ia, faafetai atu ia te ia mo lona toa i le ta’u mai ia te au, ma fai atu ia te ia e tusa lava po o le a se mea sa ia faia pe mafaufau i ai, sa faapelepeleina o ia ma manaomia i lo matou aiga. Ma sa ou tautino ia te a’u lava e vaavaai atu ia te ia mo nisi faailoga o le manatu e pule i le ola po o se gasegase faalemafaufau.
O le Pule i le Ola E Le o le Tali Lea
O nisi talavou atonu e fefefe faapea o le pule i le ola ua na o le pau lea o lo latou auala e alu ese ai mai le leai o so latou faamoemoe. Ua faamautinoa mai e Peresitene Jeffrey R. Holland, le Sui Peresitene o le Koarama o le Toasefululua: “Po o le a lava le tele o mea sese e te lagona sa e faia … , po o le a foi le mamao ese mai le aiga ma le Atua e te lagona ua oo i ai lau malaga, ou te molimau atu e te lei malaga lava i se mamao e le mafai ona aapa atu i ai le alofa faalelagi. E le mafai ona e magoto ia maualalo ifo nai lo le malamalama le gata o le Togiola a Keriso e aapa atu ai ia te oe.”
E faaopoopo atu i le talanoa atu i a tatou fanau laiti, e mafai ona tatou talanoa i le autalavou i le mulimuli ai i le faataitaiga na tuuina mai e Peresitene Holland: “I so o se tasi o a tatou talavou o loo tauivi, po o a lava ou atugaluga po o faigata, o le oti e ala i le pule i le ola e iloagofie lava e le o le tali lea. O le a le faamatuueseina ai le tiga o loo e lagona pe o e manatu loo e faapogaiina. I se lalolagi ua matua manaomia ai le malamalama uma e mafai ona ia maua, faamolemole aua ne’i tuuitiitia le malamalama faavavau na tuuina e le Atua i lou agaga a o le’i i ai lenei lalolagi. … Ia aua ne’i faatama’iaina se ola lea na tuuina mai e Keriso Lona soifua ina ia faasaoina ai. E mafai ona e onosaia faigata o lenei olaga faitino aua o le a matou fesoasoani ia te oe e onosaia. E te malosi atu nai lo le mea o e manatu ai. O loo maua le fesoasoani, mai i isi aemaise lava mai le Atua. E alofagia ma taua ma manaomia oe. Matou te manaomia oe!”
E mafai e oe ma lou toalua ona talanoa po o afea se taimi lelei e amata ai ona talanoa e uiga i ai—a o lei oo i se faalavelave, pe afai e i ai, e oo mai. E mafai ona e sailia ma le agaga tatalo le Agaga e fesoasoani e taiala le taimi ma upu o talanoaga ma lau fanau.
E le nafa lava i tatou ma le filifiliga a se isi tagata e faamuta se ola, ae e i ai mea e mafai ona tatou faia e fesoasoani ai e puipuia. E pei ona aoao mai Peresitene Holland:
“Na afio mai le Alo Pele e Toatasi o le Atua e tuuina mai ia i tatou le ola e ala i le faatoilaloina o le oti.
“E tatau ona tatou tuuto atu i tatou lava atoatoa i lena meaalofa o le ola ma taufetuli e fesoasoani atu ia i latou o i se tulaga lamatia e lafoai lenei meaalofa paia.”