“O Se Sauniuniga Matagofie mo le Olaga,” Liahona, Iulai 2024.
O Se Sauniuniga Matagofie mo le Olaga
O mea e aoaoina e alii talavou ma tamaitai talavou i se misiona o le a faamanuiaina ai o latou olaga e faavavau.
Mai lava i lo’u laitiiti, sa faagaeetia lava au i taimi uma i le naunautai o faifeautalai. I se tasi o sauniga faamanatuga i la’u paranesi laitiiti i Minas, Iurukuei, sa tuuina mai ai e se faifeautalai lana molimau ma faailoa mai ona lagona e uiga i lana misiona. Sa tumau pea ana upu i lo’u mafaufau ma lo’u loto.
“I se tasi aso,” sa ou fai ifo ai ia te a’u lava, “O le a ou auauna atu i se misiona.”
I se taimi mulimuli ane, i le avea ai ma se ositaulaga, sa ou maua ai le avanoa e o faatasi ma faifeautalai i lesona. O se aafiaga e le mafaagaloina le avea ma se faifeautalai i le 16 o o’u tausaga!
Ina ua atoa lo’u 18, sa toe foi mai ni nai tagata talavou mai la’u paranesi mai a latou misiona, e aofia ai lo’u tuafafine o Ana, o lē sa toe foi mai mai se misiona i Atenitina. Sa ootia foi lo’u loto i o latou aafiaga ma molimau.
A o latalata mai lo’u aso fanau lona 19, sa ou manao e tuuina atu lo’u igoa e alu atu ma folafola atu le talalelei a le Faaola ma auauna atu i Lona tovine (tagai Mataupu Faavae ma Feagaiga 75:2). Sa ou sauni ma auina atu a’u pepa o le misiona. Ina ua taunuu mai lo’u valaauga, sa ou tatalaina le tusi na sainia e Peresitene Spencer W. Kimball ma faitau o le a ou auauna atu i le Misiona a Iurukuei/Parakuei. O le a ou auauna atu i lo’u lava atunuu! Sa ou fiafia mo le avanoa e folafola atu ai “tala fiafia o le olioli tele, o le talalelei tumau-faavavau lea” (Mataupu Faavae ma Feagaiga 79:1).
Sa ou taunuu atu i le ofisa o le misiona ina ua mavae ona ou malaga mo le lua itula i le pasi i Montevideo, Iurukuei. Sa vaetofia a’u e le peresitene o le misiona o se faifeautalai mo Le Ekalesia a Iesu Keriso o le Au Paia o Aso e Gata Ai ma tofia a’u i se soa. E oo atu i lena aoauli, ua amata ona ma tu’itu’i i faitotoa.
I le amataga, sa i ai taimi sa le malie ai le misiona e pei ona ou mafaufauina o le a i ai. O le mea e faafetai ai, sa i ai sa’u soa usiusitai ma galue malosi o lē sa fesoasoani ia te a’u ia iloa le olioli o le leiloa o a’u lava i le galuega a le Alii. O lana faataitaiga na faamanuiaina ai a’u i la’u misiona atoa.
Ae o a’u tapenapenaga e avea ma se sui o le Faaola o Iesu Keriso ua leva ona amataina.
Na Amata Lava i se Kilipa o le Fusiua.
Ia Ianuari 1962, ina ua ono o’u tausaga, sa taunuu faifeautalai i le faleoloa o maataua a lo’u tamā ma saili e suia se kilipa o se fusiua a se tasi o i laua na leiloa. A o i ai iina, sa la faalogo i se tasi o taina le kitara. Ina ua la fesili e uiga i ai, sa valaaulia i laua e lo’u tamā e o mai i totonu ma feiloai i lana uo.
I le taimi o le latou talanoaga, sa fesili atu lo’u tamā ma lana uo i faifeautalai pe la te taina le kitara. Sa fai mai se tasi o faifeautalai na te tata laitiiti. Sa pasi atu e le uo a lo’u tamā lana kitara ia te ia ma fai atu ia te ia e ta. Sa amata ona ia taina ni pese a o pese lana soa.
O le sailiga faigofie a faifeautalai mo se kilipa fusiua na taitai atu ai i le feiloai atu o lo’u aiga i le talalelei a Iesu Keriso. Sa avea i matou ma ni uo lelei ma faifeautalai ma amata ona faalogo i lesona. Sa totoina le fatu o le talalelei, ma sa amata ona tupu, muamua i lo’u tina, o Elsa, ma o’u tuafafine, o Ana ma Stella, ona sosoo ai lea ma a’u.
Talu mai lena aso, na faatupulaia se fiafia mo le galuega faafaifeautalai i lo’u aiga. Sa ou auauna atu i se misiona, sa auauna atu o’u atalii i ni misiona, ma o lenei ua amata ona saunia fanau a le ma fanau ma auauna atu i ni misiona, ma fatuina ai se augatupulaga lona tolu o faifeautalai.
E le faigofie i taimi uma le avea ma se faifeautalai. E manaomia ai sauniuniga a o le i saunia se alii po o se tamaitai talavou e alu i le galuega faamisiona. O iina e mafai ai e matua, aiga, ma taitai o le Ekalesia ona avea ma faataitaiga lelei ma galulue o se au e saunia le autalavou a o laiti lava.
O se tasi o auala e fesoasoani ai ia i latou e saunia o le faasoa atu lea o tomai aoga ia i latou. O tomai e pei o le sefeina o tupe, tataina ma auli lavalava, su’isu’i, faaiila seevae, kuka, talanoa i isi, ma le auauna atu i isi o le a fesoasoani ia i latou i a latou misiona. O le auai i le seminare ma le inisitituti e fesoasoani foi i lena sauniuniga ma le viia mea latou te aoaoina i le aiga ma i a latou korama ma vasega.
O la tatou lagolago e tatau ona faaauau a o latou i ai i a latou misiona. E matagofie le faalogo atu i aafiaga matagofie ua maua e a tatou faifeautalai toeitiiti lava o aso uma. E mafai foi ona avea i tatou ma se vaega o na aafiaga e ala i le aapa atu ia i latou o loo latou aoaoina. Mo se faataitaiga, o le tina o se tasi o faifeautalai sa aoaoina lo matou aiga na faafesootaia lo’u tina ma tusi atu ia te ia mo le tele o tausaga, ma fesoasoani i lo’u tina ia tumau i luga o le ala o feagaiga.
A o tatou fesoasoani i faifeautalai i le lumanai e saunia, e tatau ona tatou manatua o le galuega faafaifeautalai e sili atu nai lo se tu masani i le Ekalesia—o se valaaulia ma se poloaiga mai le Alii (tagai Mataio 28:19). I le amataga, sa aoaoina Atamu ma Eva i le talalelei. Ona la aoao atu lea o le talalelei i a la fanau (tagai Mose 5:6–12). “Ma sa faapea ona amata ona talai atu o le Talalelei, mai le amataga, ina ua folafola atu e agelu paia ua auina atu mai luma o le Atua” (Mose 5:58).
O loo faaauau pea lenei talaiga i se autau e silia ma le 71,000 faifeautalai. Ae e tele atu isi tatou te manaomia, nisi e toatele, i luga o laina pito i luma—o se autau a faifeautalai ma tagata o le ekalesia.
O Mea e Mafai Ona Tatou Aoaoina i a Tatou Misiona
A o ou i ai i la’u misiona, sa ou masani i le galuega faafaifeautalai ma amata ona mafaufau loloto atili e uiga i le ma savali. Sa ou lagonaina i taimi uma e moni le talalelei, ae sa ia te au se manao malosi ia iloa e moni. Sa ou tatalo, anapogi, suesue, galue, ona faatalitali lea mo se tali.
I le taimi o se lesona i se tasi aso, sa ou faasoa atu le tala ia Iosefa Samita i le Uluai Faaaliga:
“Na ou vaai ai i se malamalama faaniutu i luga ae tonu o lou ulu, e sili atu le pupula nai lo le la, ua alu ifo malie lava seia oo mai ia te aʼu. …
“Ina ua oo mai le malamalama i oʼu luga, sa ou vaaia ni Tagata e toalua, o lo laua pupula ma le mamalu e lē mafaamatalaina, o tutu mai i oʼu luga aʼe i le ea. Sa fetalai mai le tasi o i la’ua ia te a’u, ma ta’u mai ia te a’u lo’u igoa, ma fetalai mai, a o tusi ane i le tasi—O Lo’u Atalii Pele lenei. Faalogo ia te Ia!” (Iosefa Samita—Talafaasolopito 1:16–17).
I lena taimi, sa mafai ona ou lagonaina le faamautu mai e le Agaga Paia ia te aʼu e moni mea sa ou aoaoina atu. Sa vaai moni le Perofeta o Iosefa Samita i le Tama ma le Alo, ma o le Tusi a Mamona o le afioga a le Atua ma, faatasi ai ma le Tusi Paia, o loo molimau mai e uiga i lo tatou Faaola. Oka se filemu na aumaia e lenei mea i loʼu agaga. E oo lava i le tele o tausaga mulimuli ane, o loo faamafanafanaina pea loʼu loto.
O laʼu misiona sa pei lava o le mauaina o se tikeri o le matuaofaiva faaleagaga. O mea e aoaoina e alii talavou ma tamaitai talavou i se misiona o le a faamanuiaina ai o latou olaga e faavavau. Faatasi ai ma le tele o mea, ua latou aoaoina:
-
Auala e suesue ai, tatalo, aoao atu, ma faaaoga mataupu faavae o le talalelei i aso taitasi.
-
Auala e nonofo ai ma se soa i le 24 itula i se aso.
-
Auala e tausia ai lo latou soifua maloloina.
-
Auala e fuafua ai
-
Auala e faaleleia ai tomai faaletaitaiga.
-
Auala e fesootai lelei ai i isi tagata.
-
Auala e saili ai, faalogo, ma taialaina ai e le Agaga Paia.
O alii talavou ma tamaitai talavou o e auauna atu i misiona o le a faamalosia ma saunia e feagai ma luitau o le olaga a o faaauau pea ona latou faaaogaina mea sa latou aoaoina a o latou i ai i a latou misiona.
O Le Aso Lenei
Na aoao mai lo tatou perofeta pele, o Peresitene Russell M. Nelson:
“E le’i i ai lava se taimi i le talafaasolopito o le lalolagi [i lo le taimi nei] ua sili atu ona taua patino le iloa e uiga i lo tatou Faaola ma le fitoitonu i le agaga o tagata soifua uma. Mafaufau i le vave tele o le a fo’ia ai fetaua’iga faatauma’oi i le lalolagi atoa—ma feteenaiga i o tatou olaga patino—pe afai tatou te filifili uma e mulimuli ia Iesu Keriso ma gaua’i atu i Ana a’oa’oga.”
O le asō o le aso lea mo i tatou e faaali atu ai le tagata ma le lototele ma faasoa atu le talalelei a Iesu Keriso. O le asō o le aso lea mo o tatou tagata talavou e saunia ai e auauna atu i le autau a le Alii i se misiona faafaiaoga po o se auaunaga. E manaomia oe e le lalolagi! E i ai tulivae e faamalolosi, lima e sisii ae, ma le upumoni e talai atu (tagai i le Mataupu Faavae ma Feagaiga 81:5).
Tau ina ia uunaia i tatou e le valaaulia lenei mai le Alii e faatino ma sii aʼe le tagavai o le upumoni i le mana:
“Faauta, Ou te fai atu ia te outou, o loʼu loto ia tatau ona outou o atu …
“Ma sii i luga o outou leo e pei o le leo o se pu, ma talai atu le upumoni e tusa ma faaaliga ma poloaiga ua Ou tuu atu ia te outou.
“Ma o lea, afai tou te faamaoni, o le a faapaleina outou i le viiga, ma le mamalu, ma le tino ola pea, ma le ola e faavavau” (Mataupu Faavae ma Feagaiga 75:3--5).