Ua Na’o Tusiga Faatekinolosi: Talavou Matutua
3 Auala e Faaogatusa ai Lou Olaga ma le Finagalo o le Atua
E mafai faapefea ona tatou iloa le mea e finagalo le Tama Faalelagi tatou te faia?
Alu i le Aiga, saunia e Yongsung Kim
Mo nai tausaga ua mavae atu, sa ou mafaufau ai:
“O le a le finagalo o le Atua mo lo’u olaga?”
“E faapefea ona ou faaogatusa lo’u loto ma Lona finagalo?”
Sa ou sailia tali o nei fesili mo se taimi umi lava—ma ou te manatu lava ou te lei mauaina uma. Ae ua ou mauaina ni upumoni se tolu e fesoasoani ia te au ia ou malamalama ai i le auala e faafoeina ai lo’u olaga i le ala e finagalo ai le Tama Faalelagi ia te au.
1. Ia Tausia le Agaga ia te Oe
O se vaega taua o le mulimuli i mea e finagalo le Tama Faalelagi tatou te faia o le saili ma faalogo i uunaiga a le Agaga Paia. E mafai ona fetalai mai le Agaga ia i tatou i le tele o auala, ae o lo tatou tiutetauave le ola agavaa mo Lana mafutaga ma aoao pe faapefea ona Ia fetalai mai ia i tatou lava.
Ia te au lava ia, e fetalai mai le Agaga e ala i o’u mafaufauga, ae o nisi taimi e mafai ona faigata ona iloa le eseesega i le va o o’u lava lagona ma le taitaiga a le Atua.
O le mea e tasi ou te fiafia e fai o le mafaufau loloto lea pe o lelei ou manatu. E pei ona aoao mai le perofeta o Moronae, “O mea lelei uma e sau mai le Atua” (Moronae 7:12). Afai o loo ta’u mai e se manatu ia te au e fai se mea lelei mo se isi tagata, valaaulia au e fesootai ma le Tama Faalelagi, pe uunaia au ia avea atili e faapei o Iesu Keriso, ou te iloa e mai le Agaga Paia.
O lea aso ma lea aso, ou te taumafai ai e faatumauina lenei soa tumau faatasi ma au, faalogo mo Ana valaaulia, ma ia naunau e faatino i luga o na valaaulia. E fesoasoani lenei mea ia te au e faaogatusa ai lo’u olaga ma le Tama Faalelagi.
Na faamanatu mai e Peresitene Henry B. Eyring, Fesoasoani Lua i le Au Peresitene Sili: “Ua auina atu le Agaga Paia i tagata faamaoni o le Ekalesia a Iesu Keriso. Ia, o le a tulaga ese ou aafiaga, ma o le a taialaina e le Agaga i le ala e sili ona fetaui lelei i lou faatuatua ma le gafatia e maua ai faaaliga mo oe ma mo i latou e te alofa ma auauna i ai.”
2. Manatua Lou Faasinomaga Paia—ma Fesoasoani i Isi ia Manatua o Latou Faasinomaga
Ua fetalai mai le Tama Faalelagi ma Iesu Keriso ia “alofa atu i lou tuaoi e pei o oe lava ia te oe”—o le poloaiga sili lona lua lena (tagai i le Mataio 22:39). E mafai ona tatou lagonaina le alofa ma le agaalofa mo i tatou lava ma isi pe a tatou iloa ma faamamaluina lo tatou faasinomaga paia.
E finagalo le Tama Faalelagi ia tatou vaai ia i tatou lava mo le mea ua tatou i ai—o Ana fanau pele e i ai gafatia e le gata. Ona e alofa o Ia ia i tatou, o lea e finagalo ai o Ia ia tatou alolofa i isi ma fesoasoani e faamanatu atu ia i latou po o ai moni i latou.
Ua faamanatu mai ma le alofa e Elder Gerrit W. Gong o le Korama a Aposetolo e Toasefululua ia i tatou: “O le faatuatua, auaunaga, ma le ositaulaga e sili atu ai lo tatou latalata atili atu i lo tatou Faaola. O le tele o le agaalofa, faamaoni, ma le le manatu faapito o a tatou auaunaga ma osigataulaga o loo ia te Ia, o le tele foi lea o lo tatou amata malamalama i le agaalofa ma le alofa tunoa togiola a Iesu Keriso mo i tatou.”
Ou te manatu afai e mafai ona tatou vaai ia i tatou lava e pei ona silasila mai le Tama ia i tatou, e faigofie atu ona tatou vaai i Lona aao i o tatou olaga.
3. Faatuatua i Lana Taimi
O se vaega taua o le faia o mea i le ala a le Atua o le faatuatuaina lea o Lana taimi. Ou te iloa e i ai taimi i o tatou olaga o le mea mulimuli tatou te mananao e fai o le faatalitali. Atonu o loo tatou faamoemoe mo faamanuiaga, e aofia ai le sailia o se toalua, lava o tupe e faatau ai se fale, mauaina o se galuega e totogi lelei, faamalologa a le o le faaletino po o le mafaufau, po o le anoanoai o isi.
Ae o nisi taimi e le oo mai ai nei faamanuiaga pe a tatou mananao ai. O le mea moni, o nisi taimi, o le olaga e ono i ai se lagona e foliga mai o loo tatou feoai solo i se toafa tele, lea ua matutu ai faamanuiaga.
Ae peitai, a tatou faatalitali i le Tama Faalelagi, e mafai ona tatou vaai i le tala ia sa Iareto i le Tusi a Mamona (tagai i le Eteru 2). A o latou malaga atu i le laueleele folafolaina, sa le’i finagalo le Atua ia latou faatali i le vao (tagai i le fuaiupu 7). Na ia mana’o ia i latou ina ia latou o pea. E faapena fo’i ona lē finagalo le Tamā tatou te tutu i o tatou vaomatua faafaatusa. E finagalo o Ia ia tatou agai pea i luma ma le faatuatua seia oo ina tatou ausia o tatou faamanuiaga folafolaina.
E finagalo o Ia ou te faaauau pea i le faatuatua, tausi Ana poloaiga, ma faatalitali ma le onosai ia te Ia.
Atonu e i ai taimi tatou te le malamalama ai pe aisea e tatau ai ona tatou onosaia nisi o luitau po o le mafuaaga foi e tatau ai ona tatou faatalitali i Lana taimi. O se mea ua ou aoaoina e faapea, o mea uma lava, e tusa lava po o le a le faigata, e mafai lava ona mo lo tatou manuia pe afai tatou te faaauau pea ona latalata atili atu i le Tama Faalelagi (tagai i le Mataupu Faavae ma Feagaiga 122:7).
Ou te iloa a o tatou taumafai e fai mea i le ala a le Tama Faalelagi, e mafai ona tatou maua le mafutaga a le Agaga Paia ma lagonaina Lona alofa i aso uma. Afai tatou te faalagolago i le Tama Faalelagi, e oo lava i taimi faigata, e mafai ona tatou maua le malosi tatou te manaomia. Afai o loo e feagai ma se mea faigata, tootuli ma talanoa atu ia te Ia. Ou te iloa o le a faafofoga mai le Tama Faalelagi ia te oe ma tuuina atu ia te oe le faamafanafanaga ma le taitaiga e te manaomia.
Atonu e le mavae atu ou puapuaga pe a uma ona tatalo, ae o le a tuuina atu e le Tama ia te oe le malosi e faaauau ai—ma o le a Ia i ai faatasi ma oe i lena ala.