“Faamolemole, Fesoasoani ia te Ia,” Liahona, Iulai 2024.
O Leo o le Au Paia o Aso e Gata Ai
“Faamolemole, Fesoasoani ia te Ia”
O talafaasolopito o aiga ma galuega sui o le malumalu na fesoasoani ia te a’u e faatoilalo ai lagona o le toilalo ma le tuuatoatasi.
Ata pu’e o le Malumalu o Manila Filipaina na pueina e Russell Sun De La Cruz
I se tasi aso i le galuega, sa ou lagonaina le lotonutimomoia ma le tuuatoatasi. Sa ou talitonu ua ou toilalo i o’u tuaa ona o le tele o mea sese sa ou faia. Sa ou aioi atu i le Tama Faalelagi mo le malosi.
I se vaiaso pe lua mulimuli ane, na sau ai se tuafafine ia te a’u ina ua tuua le lotu ma fesili mai pe o a’u o Jenny Casama. Sa ia faailoa mai o ia ia te a’u o Michelle (Mich) Bautista, o se tasi o o matou faufautua o malumalu ma talafaasolopito o aiga i le uarota. Sa ia faamatala mai sa i ai sana miti lea na o mai ai ni tamaitai se toatolu sa laei papa’e ma faaiu ia Casama ia te ia mo se fesoasoani. Sa latou aioi atu ia Sister Bautista, “Faamolemole fesoasoani ia te ia.”
Sa malamalama Sister Mich sa talosagaina o ia e nei tamaitai e fesoasoani i lo latou tausoga—o a’u—ia aoao atili e uiga i galuega o le malumalu ma talafaasolopito o aiga.
Sa fai mai Sister Mich ia te a’u, “Sei o ta vaai pe mafai ona ta maua na tamaitai i lau gafa o le aiga.”
I luga o le uepisaite o le FamlySearch, sa ma maua ai faamaumauga mo lo’u tinamatua o Damasa Casama; o lona uso o Emiliana Casama; ma le tina o lo’u tinamatua o Eugenia Casama. E aunoa ma se masalosalo, sa ma iloaina o i latou o tamaitai i le miti. Sa oo mai ia te a’u se lagona matagofie o le filemu, ma sa ou lagonaina le faatumulia o le alofa o o’u tuaa i lena lava taimi. Sa ma fetagisi ona o le fiafia sa ma lagonaina i o ma loto. Sa ou lagonaina sa latou popole tele ia te a’u, ma o le taui, sa ou maua ai se lagona loloto o le alofa mo i latou.
Ona ou iloaina lea o lo’u tiutetauave e fesoasoani ia i latou ma isi o’u tuaa ia maua sauniga o le malumalu. Sa faatalitali o tatou tuaa—o nisi mo se taimi umi—mo i tatou i le lalolagi e faatino nei sauniga paia mo i latou.
Mulimuli ane i lena tausaga, sa papatisoina a’u i le malumalu mo nei tuaa e toatolu. Ou te molimau atu i le matagofie o le galuega o talafaasolopito o aiga ma le mana na te aumaia i lo’u olaga.
E pei ona saunoa Peresitene Russel M. Nelson: “A o i ai i galuega o le malumalu ma talafaasolopito o aiga le mana e faamanuia ai i latou o i tua atu o le veli, o loo i ai foi le mana lava lea e faamanuia ai e o soifua. O loo i ai se uunaiga faamama ia i latou o loo faia lea galuega. O loo latou fesoasoani moni lava e faaeaina o latou aiga.”
Ou te iloa e moni le Ekalesia ma e le mafai ona faaatoatoaina i tatou e aunoa ma o tatou tuaa.