Sa Moomoo Lo’u Agaga Ia i Ai Iina

Saunia e London Brimhall, Mekasini a le Ekalesia

O se tala faatusipaia e sili ona fiafia i ai na oo mai o se tali i lo’u faananau ia latalata atu i lo’u Tama Faalelagi ma Lona Alo.

Ata

Afio Mai Faalua o Iesu Keriso

O Le Afio Mai Faalua, saunia e Harry Anderson

Sa ou sau i le malumalu i se tasi aso ma se fesili i lou loto: “Tama Faalelagi, o a mai a’u i le talalelei?”

O o’u vaivaiga na lagonaina faapitoa le mamafatu i lena vaiaso. E pei o Nifae, sa ou lagonaina le mamafatu o agasala lea na faigofie ai ona lofituina a’u. Ae, e pei foi o Nifae, sa ou iloa le ou te faalagolago i ai. (Tagai i le 2 Nifae 4:18–19.) Sa ou faamoemoe o le faaaluina o le taimi ma le Alii i Lona maota i lena taeao o le a fesoasoani e tapunia ai le mamao sa ou lagonaina.

Sa ou faalogologo ma le toto’a i le sauniga o le faaeega paia ma lagona le faafetai mo le malosi ma le malamalama na ofoina mai ia te a’u. Ae a o ou ulufale atu i le potu selesitila, sa lagonaina pea le mamafatu o lo’u loto. E mafai faapefea ona ou iloa le mea sa ou tu ai ma le Alii?

Sa ou nofo ma mafaufau loloto mo ni nai minute ona, lagonaina lea o le le aoga, ma amata ona ou tu i luga. Ae sa i ai se mea na toe tosoina a’u i lalo, ma ou magoto ifo ai i le nofoa. “Ou te le fia alu ese,” sa ou mafaufau ai.

Sa ou tilotilo solo i le potu ma vaaia ai se atavali masani o Iesu Keriso o siomia e agelu, ma sa faaloaloa mai Ona aao ia te a’u. Na oo mai i lo’u mafaufau upu o se mau e sili ona ou fiafia i ai: “Sa moomoo lo’u agaga i le fia i ai iina” (tagai Alema 36:22).

E masani ona ou mafaufau loloto i le taua o lena fuaiupu i le tala a Alema. Na muamua atu, ona o ana agasala, o le mafaufau i le tu ai i luma o le Atua na faatumulia ai Alema i le “mata’u tele e le mafaamatalaina” (Alema 36:14). Ae ina ua uma ona liliu atu ia Keriso, sa ia vaai i le Atua o siomia e agelu, ma sa “moomoo lona agaga i le fia i ai iina.” O lenei faatusatusaga faaletusitusiga paia na taia ai lava a’u i taimi uma i le matagofie. O le taumafaiga laitiiti a Alema e vaai atu i le Alii sa i ai se aafiaga tele i lona loto.

Sa ou iloaina ou te lei lagonaina le saunia e tuua le potu selesitila aua, e pei o Alema, sa moomoo lo’u agaga i le fia i ai iina—i totonu o le malumalu i lena aso ma mulimuli ane faatasi ma le Tama Faalelagi ma Iesu Keriso i lo’u aiga faalelagi. Sa faaaoga e le Agaga Paia la’u tala faatusi paia e sili ona ou fiafia i ai e ta’u mai ai ia te a’u sa silafia e le Atua lo’u loto. Sa faamanatu mai ia te a’u e ui lava i o’u vaivaiga, ae sa taliaina e le Alii a’u taumafaiga e latalata atu ia te Ia. Sa Ia silafia sa ou moomoo i le fia i ai iina.