Sau, Mulimuli Mai ia te A’u

Alema 22

O Le A Se Mea E Te Ositaulagaina ina ia Iloa ai le Atua?

o se alii o loo savalivali i le matafaga

O le ola ai i le talalelei e masani ona manaomia ai le ositaulaga. Ua poloaiina i tatou e le Tama Faalelagi ina ia lafoai o tatou faanaunuga masani ina ia maua se mea e sili atu: o se malamalama i le Atua ma faamanuiaga e le mafaatusaina ua Ia ofoina mai.

Na faaalia e le tama o Lamonae lona naunau e ositaulaga ina ua ia tatalo, “Afai o loo i ai se Atua, ma afai o oe o le Atua, sei e faailoa mai oe lava ia te a’u, ma o le a ou lafoai ese a’u agasala uma ina ia ou iloa oe, ma ia mafai ona faatuina o au mai le oti, ma faaolaina i le aso gataaga’ (Alema 22:18; faaopoopo le faamamafa).

Na aoao mai Peresitene Russell M. Nelson e faapea o le faatoilaloina o le lalolagi ma le faalatalata atili i le Tama Faalelagi ma Iesu Keriso e aofia ai le “filifili e aloese mai soo se mea e aveesea ai le Agaga” ma le “naunau e ‘lafoai’ e oo lava i a tatou agasala e fiafia i ai.”

Fesili e Mafaufau i ai

O agasala e sili ona fiafia i ai e mafai ona faigata ona iloa ona e masani ona tatou tauamiotonuina i latou pe faatagaina i latou ia avea ma ni uiga masani. Mafaufau e faaalu sina taimi e mafaufau loloto ai i agasala “e sili ona fiafia i ai” o loo taofia ai oe mai le latalata atili atu i le Tama Faalelagi ma Iesu Keriso.

• O a nisi o au agasala e sili ona fiafia i ai?

• O a laasaga e mafai ona ou faia e faatoilalo ai nei agasala?

• O a ni mea faalavefau o le a ou feagai ai i la’u taumafaiga?

• E mafai faapefea e le ositaulagaina o nei agasala ona fesoasoani ia te au i vaega o loo ou tauivi ai?

Faamanuiaga

E faaopoopo atu i faamanuiaga na sailia e le tama o le Tupu o Lamonae, e taua o le toetu ma le faaolataga, ua lisiina e Peresitene Nelson nisi faamanuiaga e oo mai mai a tatou taumafaiga ia avea atili e faapei o Iesu Keriso ma tumau ai i luga o le ala o feagaiga. E aofia ai:

• Suiga o le loto ma le natura

• Alofa Mama

• Lotomaualalo

• Agalelei

• Lotoalofa

• Amio pulea

• Filemu

• To’a

• Olioli

• Malologa

• Malosi faaleagaga

• Faaaliga faaletagata lava ia

• Faateleina o le faatuatua

• Auaunaga a agelu

• Vavega

Afai e faigata ia te oe ona ositaulagaina ni agasala patino, aua le fiu. Ua faamanatu mai e Peresitene Nelson ia i tatou “o le manumalo i le lalolagi e mautinoa lava e le faapea o le atoatoa i lenei olaga, e le faapea foi o le a suia faavavega ai ou faafitauli—aua o le a le mafai. Ma e lē faapea o le a e le toe faia lava ni mea sese. Ae o le manumalo i le lalolagi o lona uiga o le a faateleina lou tetee atu i le agasala.”

A o tatou faia le taumafaiga e lafoai a tatou agasala e pei o le tamā o le Tupu o Lamonae, o le a tatou iloa ai o le iloaina o le Atua e aoga pea lava pea le ositaulaga. O le faia o lena mea, o le a avea ai o tatou olaga taitoatasi ma se mea e sili atu nai lo le mea e mafai ona tatou faia e i tatou lava.

Faamatalaga

1. Russell M. Nelson, “Manumalo i le Lalolagi ma Maua le Malologa,” Liahona, Nov. 2022, 96.

2. Tagai Russell M. Nelson, “Manumalo i le Lalolagi ma Maua le Malologa,” 97, 98.

3. Russell M. Nelson, “Manumalo i le Lalolagi ma Maua le Malologa,” 96.