Mai le Pogisa i le Fiafia

Saunia e Helen Hughes, Durham, Egelani

A o o’u toe ta’ua upu o sauniga o le malumalu i lo’u mafaufau, sa tupu se mea ofoofogia.

Ata

lima o loo piilima i luga o se tusi

I le 1988, sa matou o ai ma isi faiaoga Peretania e faiaoga i se aoga i Sudan. Sa fiafia tamaiti, ma sa vave ona matou masani i le nonofo ai i se atunuu tau atia’e. Peitai, sa iu ina avea lo matou pule o se taitai saua sa faasalaina so o se tasi na ia iloaina e tetee ia te ia i so o se itu. Sa ita o ia ia te a’u mai le aso na ou tu atu ai mo se tasi sa ia sauaina.

I se tasi aso na ia valaauina ai a’u i totonu o lona ofisa. Mo le silia ma le afa itula, sa ia faatūtū mai ia te a’u ituaiga uma o sauaga ma taufaamata’u i upu. Sa ou tuua le potu i se tulaga o le faate’ia. E leai so’u manatua o le auala na ou onosa’ia ai i le taimi atoa o totoe o le aso aoga. O le afiafi atoa lava sa le mafai ona ou aveese ana upu leaga mai lo’u mafaufau.

I le taimi e moe ai, sa ou nofo i luga o lo’u moega ma faitau tusitusiga paia. Ona ou tootuli lea ma tatalo faatauanau mo se faamafanafanaga ma se toomaga, ae sa leai se mea na ou lagonaina. Sa ou oso i le moega ae sa le mafai ona ou moe. Sa faalua ona ou tu i luga, faitau, tootuli, ma tatalo, ae sa le i manuia.

“Oi, ia,” sa ou mafaufau ai, “E le tali mai i taimi uma le Tama Faalelagi i a tatou tatalo i auala ma taimi tatou te mananao ai.” Sa iu ina ou tauivi ma se po leaga ma lē maua se moe.

Ae a o ou toe taoto i lalo, sa ou mafaufau, “E toe tasi lava le mea e mafai ona ou faia.” Sa amata ona ou toe faia upu o sauniga o le malumalu ia te a’u lava ia i lo’u mafaufau. A o o’u faia lenei mea, sa tupu se vavega ofoofogia. Sa tafe ese atu mai ia te a’u le pagatia ma le pogisa atoa, ma sa tafe mai le filemu ma le olioli sili ona matagofie ma faatumulia ai lo’u tagata atoa.

Sa ou tu a’e ma tatalo, ma tuuina atu le faafetai tele i le Tama Faalelagi. Ona ou toe foi lea i le moega ma moe. O le aso na sosoo ai, lea sa tatau ona tumu i le fefe ma le faanoanoa, o le aso sili lea ona fiafia na ou faaaluina i se vasega o tamaiti.

Sa ou iloaina sa finagalo le Alii ou te mafaufau loloto i sauniga o le malumalu. I le Au Paia na sopo’ia laufanua valevalenoa ina ua uma ona maua o latou faamanuiaga i le Malumalu o Navu, sa saunoa ai Peresitene Polika Iaga (1801–1877), “Ia tuu le afi o le feagaiga na e faia i le Maota o le Alii, ia mu i o outou loto, e pei o le afi e le matineia.” A o mu a tatou feagaiga o le malumalu i o tatou loto ma mafaufau, o le a tatou maua foi le malosi, filemu, ma le mafanafana.