E Na o Tusiga Faaeletonika: Aoaoga a Taitai o le Ekalesia mai Ala o Faasalalauga Faaagafesootai
Saolotoga Faalelotu mo Faatuatuaga Uma ma Tagata
Tagai poo a mea na aoao mai e le perofeta soifua ma isi taitai o le Ekalesia i luga o ala o faasalalauga faaagafesootai e uiga i le Togiola a Iesu Keriso.
E tofu tagata uma ma le aia tatau e filifili ai lo latou faatuatua pe leai foi se faatuatua. Ma e manaomia i tatou uma e fesoasoani e puipuia le saolotoga o tapuaiga.
“O le tapuaiga a se tasi e le faatonuia atu e isi,” na aoao mai ai Peresitene Russell M. Nelson. “E le i muai fuafuaina. O se filifiliga patino ma paia, e tuu i le totonugalemu o le mamalu faaletagata.
“O le mea lea, e tatau ona faaaoga le faaeteete e faamautinoa ai o loo tumau moni lava le faavaeluatai o le malo i mataupu tau tapuaiga, e le gata i le auaunaga i upu ma faamaoniga faaletulafono, ae faapea foi i le faaaogaina e le faaituau o le tulafono. E masani lava ona saili e tagata taitoatasi ma faalapotopotoga ni mea e fiafia i ai nai lo isi, ae e le tatau i le malo ona gauai atu i na faanaunauga. O le faailogalanu i le lagolagoina o se tasi o lotu, o le faaaogaina o faaupuga e le faalelotu e pei o le ‘aganuu’ po o le ‘talafaasolopito,’ o le faailogalanu lea i isi. Afai e faatagaina e le Setete le puleaina e soo se tasi o faalapotopotoga faalelotu nai lo le isi, o taunuuga o le faailogalanu, e faatagaina ai le le tutusa o le taulimaina ma le faanoanoa ai o le faasaina o isi sosaiete faalelotu.”
E mafai ona e aoao atili e uiga i le saolotoga faalelotu mai nei savali o le konafesi aoao ma i le religiousfreedom.ChurchofJesusChrist.org. E mafai foi ona e aoao atili mai mea na faasoa mai e taitai o le Ekalesia e uiga i lenei autu i luga o ala o faasalalauga faaagafesootai i upusii nei:
O Se Ulugalii Lototoa i le Aao o le Alii
“O le aso lenei o le Aso o le Saolotoga o le Lalolagi, lea e faamanatu ai le pau o le Pa o Perelini ma le faaiuga o le pulega faakomunisi i Europa Tutotonu ma Sasae. O se aso e manatua ai le lototoa o alii ma tamaitai totoa o e na tau, ma faaauau pea ona tau, mo le saolotoga i le lalolagi atoa.
“O se tasi o na ulugalii lototoa o Olga ma Jirí Snederfler, o e na tuuina atu le taitaiga ma le lagolago i tagata o Le Ekalesia a Iesu Keriso o le Au Paia o Aso e Gata Ai i Siekisolovakia sa i ai muamua e ui lava i tulaga lamatia ma ositaulaga patino. Sa tofia au e fesoasoani i le Ekalesia ia maua le aloaiaina aloaia i lena atunuu, ma semanu e le mafai ona faia pe ana leai le lototele ma le faatuatua o le au Snederflers e mulimuli ai i le Faaola.
“Faatasi ai ma la latou fesoasoani i le avea ai ma tagatanuu o Siekisolovakia, sa mafai ai ona matou faamautuina fonotaga ma taitai o le malo ma talosaga mo se aloaiaina ina ia mafai ai e o matou tagata o lena atunuu ona tapuai faaaliali, nai lo le faalilolilo. O le a le galo lava ia te au se fonotaga taua se tasi ina ua folafola mai e Josef Hromadka, le lagolago fou o le uluai faifeau o le Ripapelika o Siekisolovakia, ia i tatou o le a oo mai lenei aloaiaina.
“O lena lava aso, na matou malaga atu ai i le Mauga o Karlstein, lea na faapaiaina ai e Elder John A. Widtsoe le atunuu mo le talaiga o le talalelei i le aso 24 o Iulai, 1929. O iina, sa ou faia ai se tatalo o le agaga faafetai mo le faalavefau a le Alii e fai ma sui o le Au Paia i Siekisolovakia. A o ou mafaufau ia Olga ma Jirí Snederfler, ua faamanatu mai ia te au o le tele o le lototoa i le lalolagi e tele lava ina le vaaia ma e masani ona faaaoga e le Alii mea e le mafai ona ausia.”
Peresitene Russell M. Nelson, Facebook, Nov. 9, 2021, facebook.com/russell.m.nelson.
4 Fautuaga e Fatu ai le Lotogatasi mo le Saolotoga o Tapuaiga
“O le saolotoga faalelotu e feagai ma luitau ogaoga i le salafa o le lalolagi ma e manaomia ai le lotogatasi i lotu e fetaiai ma nei luitau. Sa ou tuuina atu ni fautuaga se fa o le a fesoasoani ia i tatou e fatu ai lenei lotogatasi:
-
Ia iloa tatou te manaomia le tasi ma le isi ma e i lalo uma o le tulafono
-
Uunaia le faapalepale faalelotu
-
Ia faailoa atu i le lalolagi le lelei e faia e lotu
-
Tuufaatasia ma maua ni tulaga tutusa e puipuia ai ma faalauiloa ai le saolotoga o tapuaiga
“Pe a aoao tagatanuu e nonofo faatasi ma le faaaloalo—e ui lava i eseesega taua faalelotu—e sili atu foi ona latou nonofo filemu ma isi o e e i ai ni o latou eseesega taua faalelalolagi. O le mea moni, o lotu e faamalosia ai le lalolagi mo tagata uma—mo e talitonu ma i latou e leai se faatuatuaga.”
Peresitene Dallin H. Oaks, Facebook, 20 Iulai, 2023, facebook.com/dallin.h.oaks.
Malamalama Sili Atu ma le Talisapaia e le Tasi o le Isi
“I le avea ai ma tagata O Le Ekalesia a Iesu Keriso o le Au Paia o Aso e Gata Ai, matou te talitonu o tagata uma lava o uso ma tuagane. Na aoao mai Iesu Keriso o poloaiga silisili e lua o le alofa i le Atua ma ia alofa atu i isi.
“Sa ma talanoaina talu ai nei ma Elder Gerrit W. Gong le auala e mafai ai e le Au Paia o Aso e Gata Ai ma Musalemi ona malamalama lelei le tasi i le isi i auala, faamaoni, faia mea tonu ma le moni. E aofia ai le vaai atu i tala atu o mea sesē, faaupuga masani, po o mea lautele.
“A o tatou feiloai ma taitai Mosalemi i le salafa o le lalolagi, tatou te talanoa e uiga i le puipuia o le saolotoga faalelotu. E manaomia e tagata o le faatuatua ona tutu faatasi mo le faapalepale ma le mamalu o tagata o talitonuga faalelotu uma. E pei o nisi o Musalemi i le Iunaite Setete po o soo se nofoaga i le lalolagi, ua lagonaina e le Au Paia o Aso e Gata Ai aafiaga o sauaga ma le faavasegaina. Tatou te auai faatasi ma tagata lelei i soo se mea i le tausalaina o na amioga.
“I nisi taimi, e i ai taimi e faia ai e ni nai tagata o le Ekalesia ni faamatalaga sese pe saua e uiga i Musalemi. O lea faaituau ua mafua ai ona lē amana’ia e le to’atele le agalelei ma le amiolelei o le to’atele o tagata Musalemi uma. E faamoemoe, o le malamalama sili atu ma le talisapaia o le tasi ma le isi o le a fesoasoani ia i tatou ia sili atu ona agalelei ma sili atu ona sa’o i mea tatou te tautatala ai ma lagona e uiga i le tasi ma le isi.”
Elder David A. Bednar, Facebook, 19 Ian, 2023, facebook.com/davida.bednar.
O Le Taua Tele o le Faatuatua i Sosaiete
“Ou te matua popole lava ona o faamanuiaga loloto e tafe mai i uunaiga faalelotu e masani ona vaaia e tetee atu i mea e sili ona faatauaina i lo tatou lalolagi. Ua ou faasino atu ni faamatalaga i faamanuiaga e leiloloa pe a tatou logonoa i musika o le faatuatua.
“… E le gata e tatau ona tatou puipuia lo tatou gafatia e tautino atu la tatou lava aoaoga faalelotu ae ia puipuia ai foi le aia tatau o tapuaiga taitasi e faatautaia ai ana lava aoaoga faavae ma tulafono,” o lana saunoaga lea.
“O lo’u faamoemoe o mea uma tatou te aoao atu ma a tatou faataitaiga, e mafai ai ona tatou fesoasoani e toe faatuina le taua loloto o le faatuatua i lo tatou lalolagi.”
Elder Quentin L. Cook, Facebook, 28 Iuni, 2021, facebook.com/quentin.lcook.
O se Faatasiga o Faatuatuaga
“O la’u aioiga ia galulue faatasi lotu uma e puipuia le faatuatua ma le saolotoga faalelotu i se auala e puipuia ai tagata o faatuatuaga eseese faapea foi i latou e leai se faatuatuaga. O Katoliko, Evagelia, Iutaia, Musalemi, Au Paia o Aso e Gata Ai, ma isi faatuatuaga e tatau ona avea ma se vaega o se tuufaatasiga o faatuatuaga e fesoasoani, galue o se malutaga, ma faalauiloa atu le saolotoga o tapuaiga i le lalolagi atoa.
“O le tali atu faalelotu e aoga i le lalolagi. E tele galuega lelei e musuia ai e lotu tagata o le faatuatua e faia mo isi. O taumafaiga agaalofa a faalapotopotoga e faavae i tapuaiga e mafai ona faia ai mea e sili atu nai lo mea e mafai ona faia e isi. O la’u tatalo patino lava ia mafai ona tatou siitia faatasi le talisapaia o le faatuatua ma le tali atu mo le Atua a o tatou puipuia le saolotoga faalelotu.”
Elder Quentin L. Cook, Facebook, 16. Ian, 2022, facebook.com/quentin.lcook.
Le Taunuuga o le Tele o Sa’olotoga e Faapelepele i Ai
“O le saolotoga faalelotu e puipuia ai e le na o e talitonu, ae o tagata uma. O le a’a lea e lagolagoina ma fafagaina ai le tele o isi saolotoga faavae, tulaga faatauaina, ma oloa faaagafesootai. A aunoa ma ni puipuiga malolosi mo le saolotoga o tapuaiga, o le tele o mea tatou te faapelepele i ai e uiga i o tatou sosaiete faatemokarasi, e aofia ai aia tatau faaletagata ma le mamalu faaletagata, o le a amata ona matutu ma faaumatia, e pei o fugalaau e tipi mai o latou aa. O le taunuuga o le tele o saolotoga faapelepele ma le faatemokarasi agalelei lava ia, ua liliu atu i le malosi o le saolotoga o tapuaiga.
“Ou te faamautu atu le mamalu faaletagata e faavavau o tagata taitoatasi o se atalii pele o le Atua. Ou te faamautu atu e tofu i tatou taitoatasi ma se natura paia ma se taunuuga. E lē na o ni faalavelave faafuase’i i le vateatea malulu ma lē popole. Ua lauiloa ma alofagia i tatou e se Atua e silafia mea uma ma alofa uma lava.
“Ou te faamautu atu foi ua ia i tatou taitoatasi le aia tatau e faaaoga ai le faitalia o amioga mama—le aia tatau o le filifiliga e ola ai i o tatou olaga e tusa ai ma le upumoni e pei ona tatou malamalama ai. O le mea moni, o se tasi o faamoemoega autu o le malo o le faamautuina lea o le saolotoga o tagata uma e faaaoga ai le faitalia o amioga mama.”
Elder D. Todd Christofferson, Facebook, 29. Nov, 2021, facebook.com/dtodd.christofferson.
Se Aogā i Sosaiete Uma
“O le saolotoga o tagata ma faalapotopotoga faalelotu e faagaoioia e tusa ai ma o latou faatuatuaga ma talitonuga e taua tele i le soifua manuia o le lalolagi. E lē gata e aogā lotu i tagata talitonu ae o tagata uma lava, e aofia ai ma ē e lē talitonu.
“O le lotofuatiaifo faalelotu e uunaia ai uiga mama ma mausa o le avea ma tagatanuu lelei e manaomia mo se sosaiete saoloto: faamaoni, tiute, amio mama-pulea o le tagata lava ia, ositaulaga mo aiga ma atunuu, agaalofa ma le auauna atu i isi, ma le faamau faalemalo.”
Elder D. Todd Christofferson, Facebook, 16. Ian, 2022, facebook.com/dtodd.christofferson.
Le Sa’olotoga e Lauolaola Ai
“Ua musuia au i mea uma tatou te faasoa atu i le tele o lotu i le lalolagi atoa, aemaise lava se tautinoga i le Atua ma le alofa mama. O le lotu moni e uuna’ia ai i tatou e fesoasoani i ē e mana’omia le fesoasoani. E leai se fesiligia e manaomia i tatou e le lalolagi ma lo tatou manao e ‘fai mea lelei,’ ma le folafolaga o le a faatasi le Atua ma i tatou.
“I lona talafaasolopito atoa, ua faamamafa mai ai e Le Ekalesia a Iesu Keriso o le Au Paia o Aso e Gata Ai e faapea, o le puipuia o faatuatuaga uma—e oo lava i faatuatuaga laiti, ma toalaiti—e taua tele. Pe a lagona e tagata le mautinoa o le a puipuia pea o latou talitonuga, o le a latou aapa atu i isi i ni auala taua. Pe a tuuina atu i tapuaiga le saolotoga e lauolaola ai, e faatino e tagata talitonu i soo se mea ni faatinoga faigofie ma o nisi taimi o ni faatinoga lototoa o auaunaga.
“Ou te faamoemoe o le a faamamaluina ma faamemelo i ai le agalelei lautele e uunaia e tu ma aga masani o le faatuatua. Tau ina ia tatou faafetai mo le avanoa e faia ai se eseesega. O le lelei o tapuaiga, le aapa atu i tapuaiga, ma faatinoga lototoa o le alofa lea e musuia e lotu e na o le faateleina lava pe a tatou puipuia le saolotoga faalelotu.”
Elder Ronald A. Rasband, Facebook, 13. Set, 2021, facebook.com/RonaldARasband.
Puipuia o Faatuatuaga Uma
O le alofa i lou tuaoi ua le na o se manatu lelei lea mea, o le poloaiga sili lona lua. O ou tuaoi o lou toalua ma le aiga, tagata o le uarota, paaga faigaluega, i latou e potu faatasi, o i latou o lo tatou faatuatuaga, o i latou e manaomia se lima fesoasoani, ma; o le mea moni, o tagata uma lava.
“Ua musuia au i mea uma tatou te faasoa atu i le tele o lotu o le lalolagi—aemaise lava se tautinoga i le Atua ma le alofa mama.
“O le tapuaiga moni e uunaia ai i tatou e fesoasoani ia i latou o loo manaomia le fesoasoani, o se tasi lea o mafuaaga e taua ai le puipuia o faatuatuaga uma.”
Elder Ronald A. Rasband, Facebook, 18. Ian, 2022, facebook.com/RonaldARasband.
Iosefa Samita ma le Saolotoga o Tapuaiga
“I lenei tausaga o le maliu o Iosefa Samita, ou te faafetai ai mo mea uma na ia faia e faatuina ai le Ekalesia a Keriso i le lalolagi. E le gata ina sa ia aafia vavalalata i le toefuataiga o upumoni o aoaoga faavae i le lalolagi; sa ia lagolagoina foi aia tatau a le Au Paia e faaaoga ai o latou talitonuga faalelotu.
“Sa ia talosagaina malo, feiloai ma le peresitene o le Iunaite Setete, ma sa faafia ona faafalepuipuiina ona o lona faatuatua. A o lei faia le filifiliga faaperesitene i le 1844, sa ia tusi atu i sui tauva e toalima mo le peresitene e vaai pe i ai se tasi o i latou o le a fesoasoani i le Au Paia e toe maua mai a latou meatotino i Misuri. E leai se tasi na te fesoasoani.
“Faatasi ai ma le faamalosiauga a taitai o le Ekalesia, na folafola atu ai e Iosefa Samita lona tauva mo le peresitene. O lana tulaga na aofia ai le toe suiga i le faavae o le tulafono, suiga i falepuipui, toe suiga i teugatupe, ma le aveesea o le nofo pologa. Sa ia mafaufau i luma ma lagolagoina le mamalu faaletagata o fanau uma a le Atua ma a latou aia tatau o le filifili o le tagata lava ia. O ia o le uluai sui faaperesitene o le I.S. na fasiotia.
“Ou te faamemelo ma alofa ia Iosefa Samita, o le na tuuina atu ana mea uma mo le Alii ma Lana Ekalesia. O lona fasiotiga na faamaonia ai le uiga o lona tauva mo le peresitene: o le saolotoga faalelotu ma le filifili o le tagata lava ia e manaomia ona puipuia mo tagata uma.”
Elder Dale G. Renlund, Facebook, 27 Iuni , 2021, facebook.com/DaleGRenlund.
O Le Silisili Ese o le Mamalu o le Tagata
“Sa faamamaluina au e faasoa atu nisi o manatu e uiga i le silisili o le mamalu faaletagata i le Konekaresi i le lalolagi atoa o Talanoaga Faalelotu ma Aganuu i Atenitina i lenei vaiaso.
“Sa ou faasoa atu o le mamalu e faatatau i le iloaina po o ai i tatou o ni tagata soifua. O le sailiga mo le uiga tupito, pe o se tagata po o se nuu, o se aia tatau paia. I le avea ai ma fanau a se Tama Faalelagi alofa, tau ina ia tatou taulimaina le tasi ma le isi i le mamalu e finagalo o Ia tatou te saili i ai.
“O le mamalu e i ai sona amataga paia. O lo tatou tofi e āu i ai tagata uma. E maua e tagata uma le mamalu i le na o le avea ai ma tagata, e tusa lava po o le a le lotu, ituaiga, itupa, po o le atunuu. O loo ta’ua i le Tautinoga Lautele o Aia Tatau a Tagata o le mamalu o le ‘faavae lea o le saolotoga, faamasinoga tonu ma le filemu i le lalolagi.’ O le mea lea, ua ia i tatou le aia tatau i le ola, saolotoga, saogalemu, puipuiga tutusa o le tulafono, ma le saolotoga o mafaufauga, tautala, ma tapuaiga. O aia tatau e mafua mai i le mamalu, ma o le mamalu e mafua mai i aia tatau. E fafagaina uma e le tasi le isi i se faiga faaletulafono ma faaleaganuu. E tatau ona tatou vaaia se ata o i tatou lava i le tasi ma le isi—o a tatou miti, faamoemoega, tiga, ma faanoanoaga. A lē faia faapea, e avea i tatou ma tagata ese ma tagata aumau. Tatou te iloa lo tatou mamalu i le fesootai atu i isi.”
Elder Ulisses Soares, Facebook, 9 Iuni, 2023, facebook.com/soares.u.