Mauaina o le Mapusaga ia Iesu Keriso

O le masina lenei i la tatou suesuega o le Sau, Mulimuli Mai ia te A’u, tatou te faitau ai e uiga i se aafiaga faapitoa ma le tulaga ese: o le Keriso toetu o loo asiasi atu i Amerika ma valaaulia sa Nifaē e ‟o mai ia te a’u, ina ia outou tuu mai o outou lima i lo’u itu, ma ina ia outou tagotago foi i tulaga o fao o i o’u lima ma o’u vae, ina ia outou iloa ai o A’u o le Atua o Isaraelu, ma le Atua o le lalolagi uma, ma sa fasiotia mo agasala a le lalolagi” (3 Nifae 11:14).

E pei ona sa Ia faia i sa Nifaē, ua valaaulia i tatou taitoatasi e Iesu Keriso e o mai ma maua se aafiaga patino ma Ia ma atiina a’e se sootaga o le feagaiga ma Ia. Ou te matuā faafetai lava ona e alofa o Ia ia i tatou i lenei auala ma e finagalo e faatasi ma i tatou. Ona o Ia, e lē tuua ai lava na o i tatou. I la’u tusiga, ou te faasoa atu ai ‟sa tatau ona tatou faipaaga ma le Alii i se auala mamana e ala i a tatou feagaiga” (itulau 44). A o tatou o mai ia te Ia e ala i a tatou filifiliga i aso taitasi e tausia feagaiga paia, ua tatou fausia se sootaga ma Iesu Keriso lea o le a aumaia ai Lona alofa ma le mapusaga i o tatou olaga ma olaga o ō tatou aiga.

E faamanatu mai ia i tatou Iesu Keriso e ala i le ofuina o le ofusa o le malumalu pe a uma ona faaeeina i tatou, o le faamalamalama mai lea a Peresitene Jeffrey R. Holland i lana tusiga ‟O Le Ofusa o le Perisitua Paia” (itulau 4). Ua ia faasoa mai le folafolaga a le Au Peresitene Sili e faapea, o le tausia o a tatou feagaiga ma le ofuina o le ofusa o le a tatou maua ai le puipuiga ma le mana o le Faaola.

Ou te molimau atu e alofa lo tatou Tama Faalelagi ma le Faaola ia te outou ma na afio mai Iesu Keriso mo lenei lava faamoemoega: e aumai ia i tatou le mapusaga o loo tatou sailia. O Iesu Keriso o le mapusaga.

Ma le faamaoni lava,

Kristin M. Yee

Fesoasoani Lua i le Au Peresitene Aoao o le Aualofa