Liahona
E Mafai Faapefea ona Ou Faamalosia La’u Molimau i le Perofeta?
Setema 2024

“E Mafai Faapefea ona Ou Faamalosia La’u Molimau i le Perofeta?,” Liahona, Sete. 2024.

Sau, Mulimuli Mai ia te A’u

Helamana 7–16

E Mafai Faapefea ona Ou Faamalosia La’u Molimau i le Perofeta?

E mafai e le konafesi aoao ona fesoasoani ia i tatou e faamalolosia a tatou molimau i perofeta soifua.

Peresitene Russell M. Nelson o loo saunoa atu i le pulelaa

I le tusi a Helamana, o loo molimau mai ai le perofeta o Samuelu le sa Lamanā ia Iesu Keriso ma tuuina atu lapataiga ma valaaulia i sa Nifaē (tagai Helamana 13–14). I o tatou aso tatou te maua ai foi le avanoa e faalogo ai i lapataiga mai lo tatou perofeta ma isi taitai o le Ekalesia. O le ua’i atu i a latou valaaulia e fesoasoani tatou te mulimuli ai i le ala o feagaiga.

O le konafesi aoao o se avanoa sili lea e faalogo ai i upu aupito lata mai mai o tatou taitai musuia ma faalatalata atili atu ai ia Iesu Keriso. O nisi nei o auala e mafai ona e mafaufau e faaaoga ai le konafesi aoao e faalautele ai lau molimau i perofeta soifua:

  1. A o lei faia le konafesi aoao, mafaufau loloto ma le agaga tatalo pe aisea e taua ai ia te oe le i ai o se perofeta. Mafaufau e tatalo ina ia maua le faamautinoaga mai le Agaga o le Peresitene o i ai nei o le Ekalesia o le perofeta, tagatavaai, ma talifaaaliga a le Atua i le lalolagi i aso nei. “O le iloa e ala i faaaliga o loo i ai se perofeta soifua i le lalolagi e suia ai mea uma.”

  2. Suesue i le uiga o le lagolago ma siilima i le perofeta ma le Au Pulega Aoao. I le taimi o le sauniga o le aoauli o le Aso Toonai, auai i le lagolagoina o i latou i o latou valaauga.

    alii i le Maota Autu mo Konafesi o loo sii le lima taumatau mo le palota lagolago

  3. “O le mana o le Agaga Paia e mafai ona outou iloa ai le moni o mea uma lava” (Moronae 10:5). A o e faalogologo i savali mai taitai o le Ekalesia, ia gauai atu i le Agaga o molimau atu e moni a latou upu.

  4. O se tasi o matafaioi autu a le perofeta o le molimau atu lea ia Iesu Keriso ma aoao i tatou ia “vaai ae i luga ma le faatuatua i le Alo o le Atua” (tagai Helamana 8:13–16). Atonu e te manao e matau mea ua aoao mai e le perofeta ma isi failauga e uiga i le Faaola.

  5. “E ala mai ia [Peresitene Russell M. Nelson], ua tatou maua ai valaaulia e le mafaitaulia ma ua folafola mai ai faamanuiaga mamalu pe afai tatou te faatotonugalemuina o tatou olaga i lo tatou Faaola.” Mafaufau e fai se lisi o valaaulia na tuuina mai e le perofeta ma isi failauga i le taimi o le konafesi. Toe tagai i tua i lena lisi e fesoasoani ia te oe e taumafai ai ia avea atili e faapei o Keriso.

  6. Manatua le valaaulia a Peresitene Nelson: “Ou te apoapoai atu ia te outou ia suesue e le aunoa i savali o lenei konafesi—pe faisoo foi—i le isi ono masina o sosoo ai nei.” A o e faalogologo pe toe faitau i savali, faailoga mea e tulaga ese ia te oe.

  7. Ua valaaulia i tatou e Peresitene Nelson ia “saili ma faamoemoe i ni vavega.” A o e usitai i le fautuaga a le perofeta ma faia ni suiga i lou olaga, ia gauai atu i faamanuiaga e te maua ma vavega e te vaaia (tagai Helamana 16:4–5).

A o e mulimuli i nei laasaga e atiina ae ai lau molimau i se perofeta, tagatavaai, ma talifaaaliga, ia utuvai mai lou faatuatua ia Iesu Keriso ma se Tama Faalelagi alofa. Ua tuuina mai ma le alofa e le Atua ia i tatou perofeta e taialaina i tatou e toe foi atu ia te Ia—o perofeta o e avea ma Ona fofoga e faaali mai Lona finagalo i le lalolagi. (Tagai Mataupu Faavae ma Feagaiga 1:38; 21:5–6.) Afai tatou te filifili e mulimuli i fautuaga a Ana auauna, ua tatou filifili e mulimuli ia te Ia.