O Leo o Le Au Paia o Aso E Gata Ai

Na Aumaia e le Tusi a Mamona ia te A’u le Filemu

Saunia e Américo Chantre Fernandes, Cape Verde

Sa oo ina ou malamalama o le Tusi a Mamona sa manaomia e suia lo’u olaga ma aumaia a’u ia latalata atili atu ia Iesu Keriso.

Ata na tusia e Allen Garns

I le faaiuga o le 2013, sa amata ona asiasi mai ni alii talavou se toalua o loo ofuina ni ofutino papae ma fusiua faalua i le vaiaso i lo’u tuafafine. Sa ou iloa i le taimi lava lena e o mai i se lotu. Mo a’u, o le avea ai ma se vaega o se ekalesia e le o i ai i au fuafuaga, o lea sa ou filifili ai e aua le talanoa atu ia i laua.

I la asiasiga taitasi, sa ou mautinoa ia ou le i ai i le fale pe a la taunuu. Peitai, sa i ai se mea faapitoa, na tosina atu i ai lo’u mafaufau. Sa laua tauaveina i taimi uma se tusi lanumoana. Ou te lei vaai muamua lava i ai, ma sa foliga mai sa ese lava ia te a’u.

I se tasi aso i le potu malolo, sa amata ona ta’u mai e lo’u tuafafine ia te a’u e uiga i le tusi. Na faafuasei lava, ona taunuu mai nei alii talavou e toalua. Ae paga lea, sa le mafai ona ou lafi mai ia i laua. Sa la vaai mai ia i ma’ua ma le tusi lanumoana—o le Tusi a Mamona—ma amata ona fesili mai po o le a se mea na ou iloa e uiga ia Iesu Keriso.

A o ou faalogologo atu i faifeautalai mai lena aso, sa faagaeetia au i le auala na la faafesootaia ai a la aoaoga i le Tusi a Mamona. O se taunuuga, na amata ona itiiti le ese o le tusi lanumoana ia te a’u.

Sa i ai pea ni o’u masalosaloga matuia e uiga i ai, ae sa amata ona ou faitauina. Sa oo ina ou malamalama o le Tusi a Mamona e le o se sui mo le Tusi Paia ae sa manaomia e suia lo’u olaga ma ou latalata atili atu ai ia Iesu Keriso. Sa ou aoaoina o le Tusi a Mamona e totonugalemu i le Faaola. O ona aoaoga na fesoasoani ia te au e iloa ai po o ai o Ia ma po o ai foi le Tama Faalelagi.

Sa vave ona fesoasoani le Tusi a Mamona ia te a’u ia avea ma se tagata e sili atu ona lelei, o se soo moni o Iesu Keriso. Sa fesoasoani foi ia te au e faaleleia ai o’u uiga faaalia a o ou feagai ai ma luitau o aso taitasi. Mai lo’u aafiaga i le suesueina, ou te iloa e fesoasoani i tagata ia o mai ia Keriso ma ola i le talalelei (tagai Moronae 10:32). E uunaia ai i tatou e mulimuli i aoaoga a Keriso ma faaaoga i o tatou olaga i aso taitasi. Ua aumaia ai ia i tatou le malamalama o i tatou o atalii ma afafine o le Atua. Na te aumaia le filemu.

Ina ua mavae ni nai vaiaso o feiloaiga ma faifeautalai ma le faitauina o le Tusi a Mamona, sa papatisoina a’u. Ou te tuuina atu la’u molimau ma lo’u loto atoa e moni le Tusi a Mamona ma o le faitauina e aumaia ai le faamoemoe ma le malamalama i taimi sili ona pogisa, e fesoasoani ia i tatou e lagona ai le alofa ma le puipuiga a le Alii. Ou te faafetai i le i ai o le Tusi a Mamona i lo’u olaga.