E Mafai Faapefea ona Ou Saunia e Talia le Faaola?

O auala nei e fa e mafai ona e talia ai le Faaola i lou olaga.

Sa manaomia e sa Nifaē ona saunia i latou lava e talia faaletino le Faaola i o latou luma. O le a se mea e mafai ona tatou aoao mai i la latou faataitaiga e fesoasoani ai ia tatou talia faaleagaa le Faaola i o tatou olaga?

Ata

tagata o loo faitauina tusitusiga paia

Mafaufau Loloto i Mea a le Atua

I aso la: Ina ua lagona e le perofeta o Nifae le “lofituina,” sa ia mafaufau loloto “i mea na faaali mai e le Alii ia te ia” (Helamana 10:2–3).

I le asō: O le manatuaina o mea na faia e le Atua mo i tatou, i taimi lelei ma taimi leaga, o le a tatou maua ai le malosi ma le lototele e faalatalata atu ai ia te Ia ma faafetaiaia le lumanai ma le faatuatua.

Na fautua mai Peresitene Henry B. Eyring, Fesoasoani Lua i le Au Peresitene Sili, matou te manatunatu i aso taitasi ma tusifaamaumau o matou lagona uunai. Fai mai a ia: “Atonu e te tatalo ma mafaufau loloto, ma faia ni fesili: Pe na auina mai e le Atua se savali mo na o au lava ia? Pe sa ou vaaia Lona aao i lo’u olaga po o olaga o la’u fanau?”

O faapefea ona e vaaia le alofa, musumusuga, po o faamanuiaga a le Atua i lou olaga i le asō?

“Ave i o Outou Luga le Suafa o Keriso”

I aso la: Sa toa Mamona i le tautino atu faapea o ia “o se soo o Iesu Keriso” (3 Nifae 5:13).

I le asō: Ua fautuaina mai e Elder Jonathan S. Schmitt o le Fitugafulu e mafai ona tatou taulai atu ia Iesu Keriso e ala i le tauaveina i o tatou luga o Ona faalagiga eseese. Mo se faataitaiga, o Iesu “ua tutusa lava o ia ananafi, i le asō, ma le faavavau” (1 Nifae 10:18). Ua fautua mai Elder Schmitt e mafai ona tatou tauaveina i o tatou luga lenei faalagiga e ala i le ola ai pea i le talalelei.

O a isi suafa po o faalagiga o Iesu Keriso e mafai ona e mafaufau i ai ma faatatau ia te oe lava?

Ata

Ata vitio o le Tusi Paia o le Faaola

Faataga le Faaola e Faapotopoto Outou ia te Ia

I aso la: I le 3 Nifae 10:4–6, ua faatusa e Iesu Keriso o Ia lava i se matuamoa o loo ofaofataiina lana toloai. O se ata matagofie lenei aua o loo Ia valaau mai pea ia i tatou ia o mai ia te Ia ina ia mafai ona Ia puipuia ma faafaileleina i tatou. Ae e tatau ona tatou filifili e o mai ia te Ia. Na ia fetalai, “Ua faafia ona ou manao e faapotopoto mai outou e pei ona ofaofatai mai e se matuamoa lana toloai, ae outou le mananao i ai” (fuaiupu 5).

I le asō: O loo faaauau pea ona faapotopoto i tatou e Iesu i aso nei, ae e tatau ona tatou faatagaina i tatou lava ia faapotopoto atu ia te Ia. Pe o e faatagaina oe lava e faapotopoto i le Faaola ma maua le puipuiga faatasi ma Ia, pe o e musu ma tumau i le oo atu i mea matautia?

O le a le valaaulia o loo tuuina atu e le Faaola ia te oe, ma o le a le mea e tatau ona e faia e talia ai?

Vaavaai atu i le Lagi

I aso la: Na manaomia e sa Nifaē ni taumafaiga se tolu e logona ai le siufofoga o le Atua. “Ma sa latou toe faalogoina le leo i le taimi lona tolu, ma sa latou tatala atu o latou taliga e faalogo i ai; ma sa faasasaga atu latou mata i le mea na sau ai lea leo; ma sa latou tetepa taulai faasasaga atu i le lagi, i le mea na sau ai le leo” (3 Nifae 11:5).

I le asō: O se tasi auala e mafai ai ona tatou “tetepa taulai faasaga atu i le lagi”o le, i le fuaitau a Peresitene Russell M. Nelson, “mafaufau faaselesitila.” Ua ia faamalamalama mai o se tasi o vaega o le mafaufau faaselesitila o le “mafaufau faaleagaga.”

O le a se mea e mafai ona e faia ina ia mafaufau atili ai faaleagaga ma “tetepa taulai atu i le lagi”?