O Se Uunaiga Faaleagaga o le Foafoaga

Saunia e Stephan Seable, Oregon, ISA

O le Togiola a Iesu Keriso sa i ai se uiga loloto atu mo a’u a o ou vaneina le tala ia Aperaamo ma Isaako.

Ata

o se alii i se nofoa faataavalevale o loo tilotilo atu i se faatagata vane

Ata na pueina e Christina Smith

O le valiina ma le vaneina o se tasi lea o auala ou te faailoa atu ai lo’u agaga faafetai mo le matagofie o le lalolagi. Mo a’u, o faatufugaga e amata i se uunaiga faaleagaga o le foafoaga.

“O Le Tamaitiiti o le Feagaiga”

Ina ua litaea se uo ma sauni e siitia ese atu, sa ou faia se faatagata mo ia e ta’ua O Le Tamaitiiti o le Feagaiga. O se faatagata o Aperaamo o loo siiina le pepe o Isaako. Talu mai lena taimi, ua ou faia se faasologa o isi faatagata e faaautu ia Aperaamo ma Isaako. O mea na e sili ona ou fiafia i ai ma o nisi o a’u galuega e sili ona taua.

O faatagata a Stephan Seable e faaalia ai Aperaamo ma Isaako o ana faatagata ia e sili ona fiafia i ai. Latou te faamanatu atu ia te ia le alofa o le Tama mo Lona Alo e Toatasi na Fanaua. I le itu taumatau mamao o i ai lana faatagata e ta’ua O Le Tamaitiiti o le Feagaiga.

O le tasi e sili ona mamana ia te a’u o le aoaoina lea e Aperaamo o lona atalii mai taaiga o tusitusiga. O Aperaamo o loo mau i lona lava ogavae ma tepa ae i luga ma se foliga tiga ma se uunaiga mai le Alii e tatau ona ia ositaulagaina lona atalii e toatasi. O loo fusi e Isaako ia Aperaamo ae le malamalama pe aisea ua le tali atu ai lona tamā ia te ia.

I lenei faatagata na saunia e Uso Seable e ta’ua o le Ave Lou Atalii, Lou Atalii e Toatasi, na maua ai e Aperaamo se uunaiga mai le Alii e tatau ona ia ositaulagaina lona atalii o Isaako.

O le isi vaega o loo faagasolo ua faaalia ai le toalua o i laua o loo fauina se fatafaitaulaga. Ua fesili Isaako po o fea o i ai le taulaga, ma ua tali atu Aperaamo o le a saunia e le Alii. I se faatagata talu ai, sa tuuina atu ai ia Aperaamo se mamoe i laau filifili ma ta’u atu i ai e le manaomia ona ia ositaulagaina lona atalii. O loo opoina e Aperaamo ia Isaako, ma uu mau o ia. (Tagai i le Kenese 22:1–13.)

Ua opo mai e Aperaamo ia Isaako i lenei faatagata na saunia e Uso Seable e taua o le Ua Mae’a le Suega.

O le mea e sili ona taua e uiga i lenei tala o se faailoaga, po o se faatusa, o le taulaga a le Alo o le Atua. O lo tatou Tama oi le Lagi, o lē e alofa i Lona Alo Pele e Toatasi, na filifili foi e ositaulaga ia te Ia ae sa lei faasaoina o Ia i le taimi mulimuli. I upu a Elder Neal A. Maxwell (1926–2004) o le Korama a Aposetolo e Toasefululua, “Sa leai se mamoe po’a i le laau filifili i Kalevaria e faasaoina ai o Ia, lenei Uo a Aperaamo ma Isaako” (“O, Le Togiola Paia,” Liahona, Ian. 1982, 8).

Ae, sa faatagaina e le Tama Lona Alo filifilia (tagai Mose 4:2) e faatino le Togiola mo i tatou ina ia mafai ai e i tatou uma ona toe foi atu i le aiga e toe nonofo faatasi ma i Laua pe afai tatou te mananao i ai ma ola agavaa mo lena faamanuiaga (tagai Ioane 3:16–17).

Ua ta’u mai e lo’u aafiaga ia te a’u o loo aofia le Atua i o tatou olaga. Ua tatou i ai ia “maua le olioli” (2 Nifae 2:25), ae tatou te maua le poto masani e ala i mea tatou te mafatia ai. E pei ona mautinoa e tutupu mea lelei, e i ai lava, e ui i lea, “se faafeagai o mea uma” (2 Nifae 2:11). Peitai, o loo i ai iina le Atua mo i tatou, ma e mafai ona tatou faatoilaloina soo se mea tatou te mafaia, e tusa lava po o le a le mea e oo mai ia i tatou. O le a tatou iloa ai e mafai ona tatou onosaia a tatou tofotofoga a o tatou taumafai pea e alolofa, auauna atu, ma avea atili ma ni tagata agaalofa— e pei o lo tatou Faaola.

Ou te faafetai mo le talalelei, lo’u aiga, ma tagata agalelei uma i le Ekalesia. Po o fea lava na ma o i ai ma lo’u toalua, o Kathleen, i ni misiona i le lalolagi atoa, sa ma maua le Au Paia o e alolofa le tasi i le isi ma auauna atu, faamanuia, ma ositaulaga mo le tasi ma le isi. E alofa le Tama Faalelagi ia i tatou, ma o i tatou o Ana fanau. E leai se isi mea e sili atu ona taua nai lo le faamaoni ia te Ia ma Lona Alo, o ē faamaoni ia i tatou.