Russell M. Nelson: O Se Perofeta mo o Tatou Aso

Saunia e Peresitene Dallin H. Oaks

Fesoasoani Muamua i le Au Peresitene Sili

Peresitene Dallin H. Oaks

Faatasi ai ma se perofeta e taialaina i tatou i nei aso e gata ai, o i tatou moni lava o ni tagata faamanuiaina.

Peresitene Nelson o loo faafeiloai atu i tagata

Ua faafeiloai e Peresitene Russell M. Nelson tagata i se faigalotu i Sigapoa i le aso 20 Novema, 2019.

Ina ua faitioina e se faifaatalanoaga Le Ekalesia a Iesu Keriso o le Au Paia o Aso e Gata Ai o “se ekalesia e faafoeina e alii matutua,” sa tali atu Peresitene Gordon B. Hinckley (1910–2008), “Pe le matagofie ea le i ai o se tagata matua i le ulu, o se tagata o le faamasinoga e le o lelea solo i matagi uma o aoaoga faavae?”

O Peresitene Russell M. Nelson, o le perofeta soifua aupito matua ua auauna atu i lenei tisipenisione, o se tamalii ese lava. Na te faamaeaina lona tausaga lona 100 i le aso 9 o Setema, 2024. O ia o se taitai o le agaalofa ma le agalelei tulaga ese, vaaiga mamao ma le mataalia, mafanafana ma le atamai.

Ou te alofa ia Peresitene Nelson. Ua 60 tausaga o avea i ma’ua o se uo ma se uso a Aposetolo mo le 40 tausaga. Talu mai Ianuari 2018, ua faamanuiaina lava au e auauna atu i lalo o lana taitaiga i le Au Peresitene Sili o le Ekalesia.

Na valaauina e taitai le Ekalesia toefuataiina a Iesu Keriso ma avea ma ona faiaoga silisili, ua silafia e Peresitene Nelson le Faaola, o lana perofeta o ia. E ala atu i se seneturi o le soifua ma le aoaoina, ua matua lelei lava o ia i auaunaga iloga faapolofesa ma faamiliteli. Faatasi ai ma lona aiga toatele, sa avea o ia ma se taitai o aiga agaalofa ma mataalia. E ala i valaauga o le Ekalesia, e aofia ai le ono tausaga ua mavae i le avea ai ma perofeta a le Alii, sa avea ai o ia ma se taitai o faataitaiga lelei i le Ekalesia toefuataiina a le Alii.

Peresitene Russell M. Nelson

E ala atu i se seneturi o le soifua ai, ua aoaoina ma faatinoina e Peresitene Nelson ia ki i le fiafia i lenei olaga ma i le olaga a sau—o le mea ua ia ta’ua o “lesona aupito sili ona taua o le olaga.”

Ua Ia aoaoina i tatou e tatau ona tatou “amata ma le taunuuga i le mafaufau.”

E fiafia o ia i le maota o le Alii. I le aluga o ona tausaga o se Peresitene o le Ekalesia, ua ia fofogaina mai ai ni malumalu fou se 153—pe tusa ma le afa o le aofaiga atoa e 335 o malumalu o le Ekalesia ua fausiaina, o loo fausiaina, pe ua fofogaina mai i lenei tisipenisione.

Ua ia aoaoina i tatou o lo tatou fauina uma o malumalu o le aumaia lea o le malumalu, ma faamanuiaga o feagaiga o le malumalu, e latalata atili atu i le toatele o fanau a le Atua. O le fuafuaga lena a le Atua.

Ua aoao mai Peresitene Nelson, “Ua ou aoaoina o le fuafuaga a le Tama Faalelagi mo i tatou e maoae, ma o mea tatou te faia i lenei olaga e taua moni lava, ma o le Togiola a le Faaola o le mea lea e mafai ai ona tupu le fuafuaga a lo tatou Tama.” O se malamalama i lena fuafuaga, na ia saunoa ai, “ua aveesea ai le mealilo mai i o tatou olaga ma masalosaloga ma lēmautonu mai o tatou lumanai. Ua faataga ai tatou taitoatasi e filifili pe faapefea ona tatou ola iinei i le lalolagi ma pe o fea o le a tatou ola ai e faavavau.”

I le avea ai ma Au Paia o Aso e Gata Ai, o i tatou moni lava o ni tagata faamanuiaina ina ua taitaia e le auauna lotomaualalo a le Alii, o Peresitene Nelson, o lē ua tuuto atu i le sauniaina o le lalolagi mo le Afio Mai Faalua o lo tatou Faaola ma le Togiola, o Iesu Keriso. Tau ina ia faaauau pea ona tatou tatalo mo, molimau atu, lagolago, ma faafetai i le Atua mo lo tatou perofeta—Peresitene Russell Marion Nelson.

Faatasi ai ma aoaoga aupito sili ona taua a Peresitene Nelson o loo i ai mea nei:

Ua Ia apoapoai mai ia i tatou ia faaaoga le igoa sa’o O Le Ekalesia a Iesu Keriso o le Au Paia o Aso e Gata Ai.

Ua Ia fautuaina i tatou i le ala e faamuamua ai le Atua i o tatou olaga.

Ua Ia uunaia i tatou ia “mafaufau faaselesitila.”

Ua Ia aoaoina i tatou i se vaaiga mamao faateleina o le faapotopotoina o Isaraelu i itu uma e lua o le veli.

Ua Ia musuia i tatou ia alualu i luma i luga o le ala o feagaiga, ma ua ia valaaulia ma le alofa i tatou e toe foi atu i lena ala pe afai ua tatou se ese.

Ua Ia apoapoai mai O tagata o le Ekalesia i soo se mea e mulimuli i se mamanu e faatotonugalemu-i-le-aiga, ma lagolagoina-e-le-Ekalesia o le aoaoina o le talalelei.

Faamatalaga

1. Gordon B. Hinckley, i le David A. Bednar, “Ua Filifilia e Molimau Atu i Lo’u Igoa,” Liahona, Nov. 2015, 128.

2. Russell M. Nelson, “Mafaufau Faaselesitila!,” Liahona, Nov. 2023, 117.

3. Russell M. Nelson, “A’o Tatou Agai Faatasi Atu i Luma,” Liahona, Ape. 2018, 7.

4. Tagai i le Russell M. Nelson, “Taulai Atu i le Malumalu,” Liahona, Nov. 2022, 121.

5. Russell M. Nelson, “Mafaufau Faaselesitila!!,” 117.

6. Tagai Russell M. Nelson, “O Le Igoa Sa’o o le Ekalesia,” Liahona, Nov. 2018, 87–89.

7. Tagai i le Russell M. Nelson, “Ia Faamuamua le Atua,” Liahona, Nov. 2020, 92–95.

8. Russell M. Nelson, “Mafaufau Faaselesitila!,” Liahona, 117–20.

9. Tagai i le Russell M. Nelson, “Auai o Tuafafine i le Faapotopotoina o Isaraelu,” Liahona, Nov. 2018, 69; tagai foi Russell M. Nelson ma Wendy W. Nelson, “Faamoemoe o Isaraelu” (faigalotu a le autalavou i le lalolagi atoa, 3 Iuni, 2018),

10. Tagai i le Russell M. Nelson, “Sau, Mulimuli Mai ia te A’u,” Liahona, Me 2019, 91; tagai foi Russell M. Nelson, “A o Tatou Agai Faatasi Atu i Luma,” 7.

11. Tagai i le Russell M. Nelson, “Malelega Amata,” Liahona, Nov. 2018, 6–8.