Faafetai mo se Perofeta

O loo faafeiloa’i atu Peresitene Russell M. Nelson i le Au Paia o Aso e Gata Ai i Kona, Hawaii, i le aso 16 o Me, 2019, i le taimi o lana malaga taamilo i le Pasefika.

Mātua Pelē,

O le masina lenei ua faamanatu ai e Peresitene Russell M. Nelson lona 100 o ona aso soifua. O loo faamamafa mai i mataupu o lenei lomiga le auala e faasino atu ai i tatou e ia ma isi perofeta ia Iesu Keriso.

O se tasi o auala e mafai ai e le autalavou ona mulimuli i le perofeta o le tali atu lea i lana valaaulia ia auai e lē aunoa i le seminare ma faitau tusitusiga paia i aso taitasi. Ua Ia folafola mai faamanuiaga matagofie ia i latou o e faia lea mea, e aofia ai le aoao e maua faaaliga patino, mauaina o tali i fesili faigata o le olaga, ma le iloaina o le Faaola. Pe ua faalogo lau fanau talavou i lenei valaaulia faaperofeta? Asiasi i le seminary.ChurchofJesusChrist.org e saili ai nisi faamatalaga.

Talanoaga o le Talalelei

Manatua Au Feagaiga

I le tusiga a Peresitene Jeffrey R. Holland i le itulau e 4, tatou te aoao ai pe faapefea e le tausia o a tatou feagaiga ma le ofuina o le ofusa o le perisitua paia pe a uma ona faaeeina i tatou ona maua ai le puipuiga ma faatumauina ai lo tatou latalata atu i le Agaga. E mafai ona e faasoa atu i lou aiga se upusii mai le tusiga ma talanoa e uiga i le auala e avea ai le ofuina o le ofusa ‟o se faailoaga i fafo o se tautinoga o i totonu.” O a isi faaupuga i fafo tatou te faia e faaalia ai la tatou tautinoga ia avea ma soo?

Tausi Poloaiga

Sa talosagaina e Elder Isaac K. Morrison ia Peresitene Nelson mo se sāvali patino mo lona toalua ma lana fanau. O le tali a le perofeta o le ‟Tausi poloaiga.” (Tagai i le itulau e 20.) Atonu e te fesili atu i lau fanau: Mata e eseese faapefea ni au filifiliga pe ana faapea e nofo le perofeta i se laulau faatasi ma oe ma fai atu ia te oe e tausi poloaiga?

Mulimuli i le Perofeta

E atoa le 100 tausaga o Peresitene Nelson i le masina lenei! Ua faasoa mai e Peresitene Dallin H. Oaks nisi o lesona na ia aoaoina mai le perofeta (tagai i le itulau 12). O a ni mea ua aoaoina e lau fanau mai le perofeta? Pe na i ai se lauga po o se faigalotu na tulaga ese ia i latou? Faasoa Atu Ou Manatu. E mafai ona e matamata i se sāvali faavitio mai ia te ia.

Mea Mālie Faaleaiga i le Sau, Mulimuli Mai ia te A’u

Lagonaina o Le Siufofoga o le Atua

3 Nifae 11:5

I le 3 Nifae 11, tatou te faitau ai i le auala na lē mafai ai e sa Nifaē ona faalogo i le siufofoga o le Atua seia oo ina liliu atu o latou mata i le leo ma tatala o latou taliga.

Tu faafesagai ma se tasi. Toe faasaga ese ina ia lē tilotilo atu le tasi i le isi.
O le tasi tagata o le failauga, ae o le isi o le tagata faalogo. Fai atu i le tagata faalogo e pupuni ona taliga.
Tuu atu i le failauga e fai se fasifuaitau i se leo filemu, e pei o le ‟O loo o’u taumafai ia avea faapei o Iesu.”
Vaai pe mafai e le tagata faalogo ona ta’u mai le mea o loo fai mai ai le failauga.
Fai atu nei i le tagata faalogo e aua le toe pupūnia ona taliga ma liliu atu i le tagata o loo tautala.
E toe fai mai foi e le failauga le fuaitau lava lea e tasi.

Talanoaga: Pe na faigofie atu ona faalogoina le leo pe a faafesagai le tagata faalogologo ma le failauga? Faitau le 3 Nifae 11:5. E mafai faapefea ona liliu atu ou mata ma tatala ou taliga i le siufofoga o le Atua i le asō?