O Leo o le Au Paia o Aso e Gata Ai

Sa I Ai i le Atua se Mea e Sili Atu mo i Matou

Saunia e Ronald Baa, Northern Mindanao, Filipaina

Ina ua aoaoina a’u e faifeautalai o a’u o se atalii o le Atua, sa ou iloa e tele atu faamanuiaga ua ia teuina mo a’u ma lo’u aiga.

Ata pu’e mai le tusitala

Sa ou ola ae i se tamai nuu maotua i Filipaina. Sa matitiva lo’u aiga. I Filipaina, afai e leai sau tupe, e le mafai ona e alu i le aoga. E ui lava i lena mea faalavefau, ae sa avea au ma se alii talavou naunautai.

Sa ou fai atu i o’u matua ou te manao e avea ma se fomai po o se faiaoga po o se isi ituaiga o galuega faapolofesa, ae sa la fai mai lava ia te au e aua le toe moemiti. Sa leai se matou tupe mo au e alu ai i se iunivesite. Sa mananao o’u matua ia ou le tagisā ma aua le faanoanoa i lo’u olaga.

“O le avea ma se tagata faigaluega faapolofesa e le mo i tatou,” sa la fai mai ai. La te lei talitonu o loo i ai se mea e sili atu ona lelei sa teuina mo lo matou aiga nai lo mea ua uma ona matou maua.

Ae o le taimi lena matou te lei auai i Le Ekalesia a Iesu Keriso o le Au Paia o Aso e Gata Ai.

Sa matou nonofo mamao ese mai soo se aai, ae na maua i matou e faifeautalai ma faaauau pea ona toe foi mai. Sa latou faia le tele o osigataulaga e aoao ai lo’u aiga, ae sa latou suia o matou olaga e faavavau.

Ina ua matou auai i le Ekalesia, sa ou aoaoina o au o se atalii o le Atua ma se gafatia e tuputupu ae ai ma aoao ma avea ai (tagai Mose 1:39; “O Le Aiga: O Se Folafolaga i le Lalolagi,” Potutusi o le Talalelei). Faatasi ai ma le malamalama o le talalelei, sa ou iloa ai ua oo i le taimi e siitia ai le tulaga o lo’u aiga. Ua le na o i matou o ni tagata matitiva mai se tamai nuu—o i matou o ni atalii ma ni afafine agavaa o le Atua ua tatau i ai ni faamanuiaga ua Ia folafola mai i Ona soo faamaoni.

Sa aumaia e faifeautalai le talalelei i lo’u olaga, na aumaia e le talalelei musika i lo’u olaga, ma sa aumaia e musika ia te a’u se sikolasipi e auai i le iunivesite. Sa ou maua se faailoga o le aoga tulagalua ona sosoo ai lea ma se faailoga i musika, ma se faailoga autu i le taitaiga o le aufaipese. O lea la ua ou faiaoga i musika i le Iunivesite o Liceo de Cagayan ma faatautaia le Liceo U High School Glee Club. Ou te taitaia foi se aufaipese a tagata o le Ekalesia. O la matou misiona o le faasoa atu lea o le upumoni a le Atua e ala i musika.

O le faauu mai le iunivesite na ou maua ai se olaga fou. Ou te le iloa po o fea o le a ou i ai i le asō e aunoa ma le talalelei a Iesu Keriso.

E manaomia e tagata uma le avanoa e aoao ai, e pei ona sa ou faia, ua i ai so latou Tama Faalelagi ma ua Ia faamanuiaina i latou i le gafatia e tuputupu ae ai ma aoao ma avea ai.