Fia Sefulu Tausaga o Auaunaga Tuuto: Aoaoga Filifilia a Peresitene Russell M. Nelson

I le taimi nei ua 100 tausaga le matua, ua auauna atu Peresitene Nelson i le 40 tausaga o se Aposetolo. O nisi nei o ana aoaoga mai lona taimi o se Peresitene o le Ekalesia.

vaaiga eseese mai le soifuaga o Peresitene Russell M. Nelson

Amata ma le Taunuuga i le Mafaufau

“I le taunuuga lea tatou te tauivi uma i ai ina ia faaeeina i le mana i totonu o se maota o le Alii, faamauina o ni aiga, faamaoni i feagaiga e osia i totonu o se malumalu lea e agavaa ai i tatou mo le meaalofa silisili a le Atua—le ola e faavavau. O sauniga o le malumalu ma feagaiga tou te faia iina o le ki lea i le faamalosia o lou olaga, lau faaipoipoga ma le aiga, ma lou tomai e tetee atu ai i osofaiga a le fili. O lou tapuai ai i totonu o le malumalu ma lau auaunaga iina mo ou tuaa o le a faamanuiaina ai oe i le faateleina o faaaliga faaletagata lava ia ma le filemu, ma o le a faamalosia ai lou tuuto e tumau i luga o le ala o feagaiga.”

“Ao Tatou Agai Faatasi Atu i Luma,” Liahona, Ape. 2018, 7)

Salamo i Aso Taitasi.

“E leai se mea e sili atu ona saoloto, sili atu ona malualii, pe sili atu ona taua i lo tatou alualu i luma faaletagata lava ia nai lo se taulaiga masani i aso taitasi i le salamo. O le salamo e le o se mea e faa-tasi ona tupu; ae o se faagasologa. O le ki i le fiafia ma le filemu o le mafaufau. Pe a vaavaalua ma le faatuatua, e tatala e le salamo lo tatou faitotoa e maua ai le mana o le Togiola a Iesu Keriso.

“E Mafai Ona Tatou Faia ia Lelei Atu ma Ia Tatou Lelei Atu,” Liahona, Me 2019, 67.

Osia ma Tausia Feagaiga

“O tamaitai ma alii uma e osia ni feagaiga ma le Atua ma tausia na feagaiga, ma o e auai ma le agavaa i sauniga o le perisitua, e mauaina le avanoa tuusao i le mana o le Atua. O i latou ua maua faaeega paia i le maota o le Alii ua maua se meaalofa o le mana o le perisitua a le Atua e tusa ma le paia o a latou feagaiga, faatasi ma se meaalofa o le poto e iloa ai le auala e utuvai ai mai lena mana.”

“O Gafatia Faaleagaga,” Liahona, Nov. 2019, 77.

Faalogo i le Alii

“Ua silafia e lo tatou Tamā pe a siomia i tatou e le lē mautonu ma le fefe, o le mea o le a sili ona fesoasoani tele ia i tatou, o le faalogo lea i Lona Alo.

“Ona a tatou saili atu e faalogo—faalogo moni lava—i Lona Alo, o le a taialaina i tatou ia iloa po o le a le mea e fai i soo se tulaga.”

“Faalogo ia te Ia,” Liahona, Me 2020, 88.

Filifili e Faamuamua le Atua

“Faatasi ma le uiga FaaEperu o Isaraelu i le mafaufau, ua tatou iloa ai o le faapotopotoina o Isaraelu ua i ai ma lona uiga faaopoopo. O loo faapotopotoina e le Alii i latou o loo loto e faamuamua le Atua i o latou olaga. O loo faapotopotoina e le Alii i latou o le a filifili e avea le Atua ma faatosinaga sili ona taua i o tatou olaga.”

“Ia Faamuamua le Atua,” Liahona, Nov. 2020, 92.

Manumalo i le lalolagi

“O le manumalo i le lalolagi e lē o se mea e tupu i se aso se tasi pe lua. E tupu i le olaga atoa pe a tatou taliaina pea lava pea le mataupu faavae a Keriso. Tatou te faafaileleina le faatuatua ia Iesu Keriso e ala i le salamo i aso taitasi ma tausia feagaiga ia e faaee mai ai le mana ia i tatou. Tatou te tumau i luga o le ala o feagaiga ma faamanuiaina i le malosiaga faaleagaga, faaaliga faaletagata lava ia, faateleina o le faatuatua, ma auaunaga a agelu. O le ola i le mataupu faavae a Keriso e mafai ona tupu mai ai le taamilosaga mamana o le mamā, lea e fatua’i ai le malosiaga faaleagaga i o tatou olaga.”

“Manumalo i le Lalolagi ma Maua le Malologa,” Liahona, Nov. 2022, 97.

Filifili e Avea ma sē e Faatupuina le Filemu

“O finauga e tata’iese ai le Agaga—i taimi uma. O finauga e saga faamalosia ai manatu sese faapea o le fevataua’i o le ala lea e fo’ia ai eseesega; ae e leai lava. O finauga o se filifiliga. O le faatupuina o le filemu o se filifiliga. Ua ia te oe lau faitalia e filifili ai ia finauga po o le faaleleiga. Ou te uuna’ia outou ia filifili e avea ma sē e faatupuina le filemu, i le taimi nei ma aso uma.”

“Ua Manaomia i Latou e Faatupuina le Filemu,” Liahona, Me 2023, 100.

Mafaufau Faaselesitila

“Pe a e faia ni filifiliga, ou te valaaulia oe ia faia se vaaiga umi—o se vaaiga e faavavau. Ia faamuamua Iesu Keriso, ona o lou ola e faavavau e faalagolago i lou faatuatua ia te Ia ma i Lana Togiola. E faalagolago foi i lou usiusitai i Ana tulafono. E saunia e le usiusitai le ala mo se olaga fiafia mo oe i le taimi nei ma se taui mamalu e faavavau a taeao.”

“Mafaufau Faaselesitila!,” Liahona, Nov. 2023, 118.