‟O Le Ofusa o le Perisitua Paia,” Liahona, Sete. 2024.
O Le Ofusa o le Perisitua Paia
I le avea ai o se vaega o le faaeega paia o le malumalu, ua tuuina mai ia i tatou se faamanatu paia faaletino o a tatou feagaiga—o se faatusa o le Faaola Lava Ia.
Faamatalaga mai ia Atamu ma Eva, saunia e Douglas M. Fryer
E tusa lava po o le a le sauniuniga na tuuina atu ia i la’ua ma faamautinoaga sa la taumafai e manatua, atonu o se mea na faateia ai lava Atamu ma Eva i le tuua o le la Faatoaga faaparataiso o Etena ae laa atu i se lalolagi pa’ū.
Faatasi ai ma le silafia faamaoni, sa la iloa ai le uiga o le faafesuia’i o lo la’ua olaga filemu, ma le leai o se popole i se lalolagi e i ai le tetee ma le afu, laau talatala ma le faanoanoa—ma oo ina mulimuli mai ai le mea e ta’ua o le oti. Sa lē mafai ona la iloaina i le amataga le uiga o nei mea uma, ae na vave ona la iloaina o aso taitasi e mafai ona aumaia ai se tiga fou. O le mea moni, o le mea aupito sili ona tiga o mea uma o le iloaina lea o le a la feagai ma nei mea uma o le vavaeeseina mai lo la Tama oi le Lagi—‟ua tapunia mai lona afioaga”, o le tala lea a Mose mulimuli ane.
I le tuuina atu o lenei tuueseeseina ma le tuuatoatasi i se lalolagi malulu ma faanoanoa, e ma’eu le mafanafana atonu na oo ia Atamu ma Eva i le manatuaina o se mea se tasi: na faia ni folafolaga—o se mea paia ma e faavavau ua ta’ua o feagaiga. Sa la’ua folafola atu o le a la usiusitai i le Tama i aso uma o o la’ua olaga, ma sa Ia folafola mai o le a saunia se Faaola, o lē o le a faamāmāina o la’ua tiga ma faanoanoaga, togiola mo a la’ua mea sese, ma toe aumai i la’ua ma le saogalemu i Lona afioaga.
Ae o le a faapefea ona manatua e nei tagata mea na la folafola atu? E faapefea ona la nofouta pea i lo la’ua tulaga faigata—ia iloa i taimi uma, i le ao ma le po?!
O Se Faamanatu o a La’ua Feagaiga
Mo lea faamanatu na Ia tuuina atu ai ia i la’ua ‟ofu o pa’u.” Ma’eu lenei meaalofa ma le talafeagai o le taimi. Ina ua uma ona la aai i le fua faasāina, na toetoe lava a iloa vave e Atamu ma Eva ua la lē lavalavā. Muamua, sa la taumafai e ufiufi lo la lē lavalavā i laulaau o le mati. Ona o le fefefe i lo la lē agavaa, sa la taumafai ai e lalafi mai le Alii. (O se taumafaiga valea faapea o se faamaoniga lea o le ola ai i le olaga faaletino!) Mai lena taimi e oo mai i le taimi nei, ua valaaulia ai e se Tama alofa Ana fanau e o mai, mai i o latou lafitaga, ia te Ia. Ma e pei o ofu o pa’u i lena taimi ma ituaiga eseese o lavalava talu mai lena taimi, e le’i tuua lava i tatou e Ia i Lona alofa mutimutivale ia lē lavalavā ae ua ia faaofuina ē usiusitai i se ‟ofutalaloa o le amiotonu,” o se faamanatu o a tatou folafolaga ma feagaiga. O nei ‟ofusa o le faaolataga” ua faatusa i le meaalofa silisili o meaalofa uma, o le Togiola a Iesu Keriso.
O Le Ofusa o se Faatusa o le Faaola
Ia, o nei manatu uma e uiga ia Atamu ma Eva ma feagaiga ma lavalava, e moni, e sili atu nai lo na o se gaoioiga faalemafaufau. E le faigata ona vaai faalemafaufau i lagona o Atamu ma Eva, auā o loo tatou feagai foi ma faafitauli i lenei lalolagi pa’ū. Ua vavaeeseina foi i tatou mai le afioaga o le Atua, ma ua atili ai ona tatou taumamao ese i taimi uma tatou te solitulafono ai. E pei o Atamu ma Eva, ua tuuina mai ia i tatou lena lava Faaola e tasi, o Iesu Keriso le Nasareta, Alefa ma le Omeka, le Alo o le Atua soifua. E pei o Atamu ma Eva, ua tatou osia ni feagaiga ma le Atua. Ma, o se vaega o le faaeega paia o le malumalu, ua tuuina mai ia i tatou se faamanatu paia faaletino o na feagaiga—o se faatusa o le Faaola lava Ia. I le tatou tisipenisione ua ta’ua o le ofusa o le perisitua paia.
Tatou te ofuina lenei ofusa i lalo ifo o o tatou ofu i fafo. Po o a lava o’u tiutetauave, po o a lava matafaioi ou te faia i le olaga, po o a lava tiute o le olaga i aso taitasi e manaomia, i lalo ifo o na mea uma o loo i ai a’u feagaiga—e lē aunoa ma faavavau. I lalo ifo o na mea uma o loo i ai na folafolaga paia ia ou te pipii atu i ai ma le naunauta’i. O le ofusa e lē faatāsinaina pe faaalialia i luma o le lalolagi, ma e faapena foi i a’u feagaiga. Ae ou te tausia faalatalata uma ia te a’u—i le latalata ou te ono mafaia. E matua’i patino lava ma e silisili ona paia.
I le manatuaina o na feagaiga, o na folafolaga itū-lua, tatou te ofuina ai le ofusa i o tatou olaga atoa. O lenei faiga e atagia mai ai lo tatou manao mo le Faaola ia avea ma se faatosinaga faifai pea i o tatou olaga. O isi faatusa pele e faavaitaimi. E faatasi ona papatisoina i tatou i o tatou olaga. E faatasi i le vaiaso ona tatou aai ma feinu i le faamanatuga. Tatou te o i le malumalu pe a talafeagai ai. Ae o le ofusa o le perisitua paia e ese: o lenei faatusa tatou te faamamaluina i aso uma ma po uma.
Ma o le tulaga lena e i ai feagaiga—e lē tuueseina ona o le faigofie po o le faatamala ma e lē fetuuna’ia foi ina ia fetaui ma tu ma aga o le lalolagi. I le soifuaga o se soo o Iesu Keriso, e tatau ona fetuuna’i ala o le lalolagi ina ia ōgatusa ma a tatou feagaiga, ae le o le isi itu.
Pe a tatou ofuina le ofusa, ua tatou ofuina, e pei ona aoao mai e le Au Peresitene Sili, se faatusa paia o Iesu Keriso. I le tulaga lenā, aiseā tatou te sa’ili ai mo se alofaga e aveese ai lenā faatusa? Aisea o le a tatou aveesea ai i tatou lava mai le folafolaga o le mana, puipuiga, ma le alofa mutimutivale o loo suitulaga mai e le ofusa? Ae i le isi itu, soo se taimi lava tatou te aveesea ai mo se taimi lē tumau le ofusa, e tatau ona tatou naunau e toe ofuina, i se taimi vave lava, auā tatou te manatua uma folafolaga ma tulaga lamatia e tuuina mai ai se uiga i a tatou feagaiga. Ae sili atu i mea uma, tatou te manatua le satauro ma le tuugamau avanoa o Keriso.
Atonu e fai mai nisi, ‟E i ai isi auala ou te manatua ai Iesu.” Ma o le a ou tali atu, e ese le manaia. O le tele o le lelei foi lena. Sei o tatou mafaufau uma i le tele o auala tatou te mafaia e tausia ai la tatou tautinoga ia ‟manatua pea o ia.” Ae o le faia o lena mea, o se mea lē faamaoni le lē amana’iaina ma le mautinoa o le faamanatu na tuuina mai e le Alii lava Ia i ē ua faaeeina, le ofusa o le perisitua paia.
O Iesu Keriso ma Lana talalelei o mea uma ia iā te a’u. O o’u faamoemoega ma faanaunauga uma mo le faavavau, o mea uma ou te faapelepele i ai, e pipii ia te Ia. O Ia o ‟le papa o lo’u faaolataga,” o lo’u ala e maua ai lo’u Tama Faalelagi, le ala e tasi lava e toe foi atu ai i mea sa ou maua muamua lea ua ou manao nei ia toe maua, faatasi ai ma le tele o isi mea. O Lana meaalofa ia i tatou o le meaalofa aupito sili lea ona agalelei ua ou mauaina, o le meaalofa aupito sili ona agalelei ua tuuina mai—na faatauina mai e pei ona sa i ai i mafatiaga e lē gata, na tuuina atu i se aofaiga e lē gata, ua tuuina mai ma le alofa e lē gata. O vao tuitui ma laau talatala, o le tiga ma le mafatia, o le faanoanoa ma le agasala o lenei lalolagi pa’ū ua ‟tofatumoanaina uma ia Keriso.”
O lea ua ou ofuina ai le ofusa o le perisitua paia—i aso uma ma po uma pe a talafeagai ai talu ona faaeeina a’u i le 64 tausaga ua mavae, i le 19 o o’u tausaga—ona ou te alofa ia te Ia ma ou te manaomia folafolaga o loo suitulaga i ai.
Fesili e uiga i le Ofuina o le Ofusa?
Atonu o nisi o outou o loo faitauina lenei tusiga ma le faamoemoe o le a ou taliina se fesili faapitoa e uiga i le ofusa. Atonu e te faamoemoe mo se ‟Ua faapea ona fetalai mai o le Alii”—po o se ‟Ua faapea ona fetalai mai ai Ana auauna”—i se mataupu e latalata i lou loto. Atonu e mafua mai lau fesili i se tulaga patino e faatatau i le galuega, faamalositino, tumamā, tau, tauagafau, fale ma fanua, po o se tulaga faafoma’i.
O nisi o tali i nei ituaiga o fesili e mafai ona maua i le temples.ChurchofJesusChrist.org ma le vaega 38.5 o le Tusitaulima Aoao. E mafai ona faafesootaia tagata o le aiga ma taitai faatuatuaina e uiga i se mataupu patino. Ae ui i lea, o loo i ai se faatonuga manino lava ua tuuina mai i sauniga amata, ma o loo i ai pea lava pea lou Tama oi le Lagi, o lē e silafia oe ma alofa ia te oe ma malamalama i mea uma e uiga i ou tulaga. O le a fiafia lava o Ia pe a e fesili patino atu ia te Ia i nei fesili.
Ata o le tumutumu o le Malumalu o. St. George Iutā.
Faamolemole aua e te malamalama sese. A o e aapa atu mo se taitaiga faalelagi, o le a lē musuia oe e le Agaga e faia se mea e itiiti ifo nai lo le mulimuli i faatonuga na maua i le malumalu ma fautuaga faaperofeta na faasoa mai e le Au Peresitene Sili i a latou saunoaga lata mai. O le a lē fesoasoani atu se Tama alofa ia te oe e mafaufau i le faia o se mea e itiiti ifo nai lo le mea e te mafaia e ōgatasi ai ma Ana tulaga faatonuina o le tuuto ma le tauagafau lea o le a faamanuiaina ai oe i le taimi nei ma le faavavau. Ae pe o malamalama o Ia i au fesili, ma pe o le a Ia fesoasoani ia te oe e maua faamanuiaga o le faaaloalo i le ofusa ma le tausia o au feagaiga? Ioe! Pe tatau foi ona e feutagai ma tagata tomai faapitoa faafomai ma le soifua maloloina pe a manaomia? Ioe! Pe tatau ona e lē amana’iaina le mafaufau lelei pe vaai i tala atu o le faailoga? Ou te tatalo o le a e lē faia.
E lē mafai ona ou taliina uma au fesili. E lē mafai foi ona ou taliina uma a’u fesili o i ai. Ae e mafai, i le avea ai ma se Aposetolo a le Alii o Iesu Keriso, ona folafola atu ia te outou le fesoasoani a se Atua alofa, o lē e sailia lo outou manuia ma faamanuiaga uma, i auala e lē mafai nei ona outou malamalama pe mua’i vaaia, a o outou tausia feagaiga na outou osia ma Ia.