“E Taitai i Tatou e le Perofeta ia Iesu Keriso,” Liahona, Sete. 2024.
E Taitai i Tatou e le Perofeta ia Iesu Keriso
E silafia e le perofeta le ala aua ua ia iloa Iesu Keriso, o le “ala, ma le upu moni, ma le ola” (Ioane14:6).
Sailia o le Tasi, saunia e Liz Lemon Swindle, e le mafai ona kopiina
I se tasi aso sa fai ai sa’u meaai i le faleai o le Maota o le Pulega o le Ekalesia faatasi ma a’u uo e toatolu i le Au Fitugafulu. A o matou aai, sa sau Peresitene Russell M. Nelson i le matou laulau ma lana ipu supo ma fai mai, “E mafai ona ou faatasi ma outou?”
“Ioe, Peresitene,” sa matou tali atu ai. O ai o le a le manao e fai se taumafataga o le aoauli ma le perofeta?
A o matou aai, sa faasoa mai e Peresitene Nelson ni nai aafiaga sa ia oo i ai i le tele o atunuu sa ia asia ma talanoa e uiga i tagata na musuiaina o ia. Sa agaalofa, atamai, ma agalelei o Ia.
Ina ua uma le matou taumafataga o le aoauli, sa ou faliu atu ia Peresitene Nelson ma faapea atu, “Peresitene, ou te le iloa pe o le a ou nofo i le laulau lava e tasi faatasi ma oe i se isi se taimi lata mai. Ae o le afiafi nei, o le a ou vaai ai i lo’u toalua ma la’u fanau ma ta’u atu ia i latou sa matou aai faatasi i le aoauli ma le perofeta. Ou te iloa o le a latou fesili mai ia te au, ‘O le a le mea na ia ta’u atu ia te oe e ta’u mai ia i matou?’ Peresitene, o le a se mea e te manao ou te ta’u atu i lo’u toalua ma la’u fanau?”
Sa tilotilo mai Peresitene Nelson ia te a’u mo sina taimi. Sa ou matuai naunau ia iloa le mea o le a ia fai mai ai. “E na o le tolu ni a’u upu mo oe,” na fai mai ai. “Ta’u atu i lou aiga sa ou fai atu, ‘Tausi ia poloaiga.’”
Ua tatou faalogo uma lava i lenei fautuaga mai ia Peresitene Nelson muamua, ae i lena taimi, sa ou lagonaina se molimau patino, ma le malosi o Peresitene Nelson o le perofeta moni lava. Sa ou faafetai atu ia te ia, ma mulimuli ane i lena aso sa ou ta’u atu i lo’u aiga le mea na tupu. Na faia mulimuli ane e le ma fanau ni pepa “Tausi Poloaiga” ma tuu i luga o a matou pusaaisa ma faaata e faamanatu mai ai ia i matou le saunoaga a Peresitene Nelson.
Talu mai lena taimi, ua ou mafaufau loloto lava i le fautuaga a Peresitene Nelson. A tatou tausia poloaiga, ua faaali atu ai lo tatou alofa mo le Tama Faalelagi ma le Faaola. Tatou te faalatalata atili atu ia i Laua ma tumau i lo La’ua alofa. (Tagai Ioane 14:21; 15:10.)
O lenei aafiaga ma le perofeta ua faamautu mai ai ia te a’u se upumoni taua maoae faaleagaga. Tatou te pepese i le Peraimeri, “Mulimuli i le perofeta; na te iloa le ala.” Ua Ia silafia le ala! E silafia e le perofeta le ala aua na te silafia le Faaola, o ia o le ala, ma le upu moni, ma le ola” (Ioane14:6). Pe a tatou mulimuli i le perofeta, ua taitaiina atu i tatou ia Iesu Keriso.
O le Matafaioi Paia a Perofeta
Ua tuuina mai e le Alii se matafaioi taua ma paia i perofeta anamua ma i o tatou aso. Tatou te faitau i tusitusiga paia e faapea “e le faia lava se mea e le Alii o Ieova, seia faaalia lona finagalo i ana auauna o perofeta” (Faaliliuga a Iosefa Samita, [i le Amosa 3:7, vaefaamatalaga a]).
I le tusi a Esekielu, tatou te aoao atili ai e uiga i mea e manaomia mai perofeta. Sa fetalai atu le Alii ia Esekielu, “ua ou tofia oe [e fai] ma tagata vaai i le aiga o Isaraelu; o le mea lea ia e faalogo mai ai i le upu [mai] lo’u gutu, ma e apoapoai atu ia te i latou mai ia te au” (Esekielu 33:7).
O perofeta, e pei o tagatavaai i luga o se ’olo, ua i ai le poloaiga faapitoa e avea ma fofoga taumomoli o le Alii ma tautino atu mea ua Ia faaalia mai ia i latou. E manaomia e le Alii Ana perofeta ina ia avea ma alii o le faatuatua, o alii o le amiosa’o, ma tagata e le fefefe.
Atatusi o Samuelu le sa Lamana na saunia e Dan Burr
Mo se faataitaiga, o Samuelu le sa Lamanā, na faaalia lona tautino atoa ia Iesu Keriso ina ua ia tu i luga o se pa ma tautino atu i sa Nifae mea na tuu e le Alii i lona loto (tagai Helamana 13:4).
“Ma faauta, o se agelu a le Alii na ia taʼu mai nei mea ia te aʼu,” na fai atu ai Samuelu, “ma sa ia aumai tala fiafia i loʼu agaga. Ma faauta, sa auina mai aʼu e taʼu atu foi ia mea ia te outou, ina ia outou maua tala fiafia; ae faauta, ua outou le talia aʼu” (Helamana 13:7).
E ofoofogia ia te au le molimau atu ma le lototoa o Samuelu e uiga i le upumoni—e tusa lava pe “fetogia e sa Nifae maa ia te ia … ma … tafana aū ia te ia ao tu o ia i luga o le pa” (Helamana 16:2). Ua tatou vaaia lenei lototoa i perofeta, tagatavaai, ma talifaaaliga i aso nei.
Faia o le Lalolagi o se Nofoaga e Sili Atu
E lei leva atu, sa ou feiloai ai i se ulugalii i le taimi o se konafesi faalesiteki i Nashville, Tennessee, ISA. Sa avea lana avā ma se tagata o le Ekalesia i lona olaga atoa. O le tane sa le o se tagata o le ekalesia.
Sa la o mai ia te a’u, ma fai mai le tane, “Ua ou sauni e papatiso.”
Sa ou fiafia lava e faalogo atu i lenei mea! Sa ou fesili atu ia te ia, “O le a le mea ua suia?”
Sa ia tau mai ia te au, “Ina ua ou faalogo i le savali a Peresitene Nelson i le konafesi aoao, sa matuai o’u ootia ai lava. Sa ou iloa ai o ia o se perofeta. Sa ou maua se molimau, ma o lea ua ou saunia e papatiso.”
Ou te iloa foi se tamaitai i Cape Coast, Kana, lea na faalogo i le konafesi aoao. Na te lei faalogo lava i Le Ekalesia a Iesu Keriso o le Au Paia o Aso e Gata Ai, ae sa amata ona ia piimau i mea sa ia vaaia ma faalogo i ai mai perofeta, tagatavaai, ma talifaaaliga. Mulimuli ane, sa ia saili mo le Ekalesia. Sa ia maua se falesa ma feiloai atu i faifeautalai. Sa iu ina papatisoina o ia. Talu ai nei, sa ia auina mai ai ni ata o ia lava i le malumalu ina ia maua ona faaeega paia.
O nei tulaga e lua ua faaalia ai le mamana tele o le savali a le perofeta i le lalolagi! Afai e faalogo tagata uma i lana savali, o le a matua toafilemu lava le lalolagi. O le a tatou taulai uma atu i mea e sili ona taua, e aofia ai le atiina ae o se sootaga ma le Tama Faalelagi ma Lona Alo, o Iesu Keriso, ma le fausiaina o ni aiga malolosi ma faavavau. O le a avea foi i tatou ma o tatou tagata sili ona lelei aua o le a tatou tausia poloaiga sili e lua: alofa i le Atua ma alofa i o tatou tuaoi (tagai Mataio 22:37–39). O le a tatou aumaia Siona, o se nuu e manumalo ai le alofa, amiotonu, ma le lotogatasi, e atagia mai ai le agaga o le avea ma soo (tagai Mataupu Faavae ma Feagaiga 82:14).
A tatou mulimuli i le perofeta, e mafai ona tatou mautinoa o loo tatou faia le mea e finagalo le Atua tatou te faia aua e mulimuli le perofeta—ma fesoasoani ia i tatou e mulimuli—ia Iesu Keriso. Ona o Iesu Keriso, o le a i ai le uiga o mea uma i le olaga. “E mafai ona tatou lagonaina le olioli e tusa lava po o a mea o tutupu—pe le o tutupu foi—i o tatou olaga.” O le mulimuli i le perofeta, e mafai ai ona tatou faia moni le lalolagi o se nofoaga e sili atu ona lelei.
Saili Faamanuiaga Folafolaina
Ina ua tutuliese le Au Paia mai Katelani, Ohaio, sa tuuina atu e le Au Peresitene Sili ia Oliva Kurena e faatau atu meatotino a le Au Paia ma totogi aitalafu a le Ekalesia. O Oliva, o se tagata masani e tele lava ina tauaso ona o le aafia i le malulu, na taliaina lenei galuega faigata ona sa saunoa atu ai le Perofeta o Iosefa Samita ma isi taitai ia te ia. Sa tumau pea Oliva i le tele o faigata, ma sa faatauaina e le Alii lana osigataulaga ma taumafaiga.
“Ou te manatua la’u auauna o Oliva Kurena,” na fetalai mai ai le Alii. “Faauta, e moni Ou te fai atu ia te ia o le a manatua i le paia lona igoa mai lea tupulaga i lea tupulaga, e faavavau faavavau lava. …
“… ma a paʼū o ia o le a toe tulai mai o ia, ona o le a sili atu le paia o lana taulaga ia te aʼu nai lo ona faatelega” (Mataupu Faavae ma Feagaiga 117:12–13).
Sa lagolagoina e Oliva ma lona faletua, o Litia, le perofeta, ma sa silafia e le Alii sa faia e Oliva le mea sili na te mafaia e tusa lava pe le o taimi uma sa manuia ai o ia. Sa faamamafa mai e le Alii le taua o ana taumafaiga i mea na ia ausia.
I le avea ai ma se faifeautalai ma e oo lava i le taimi nei, ou te le manatuaina le faalogo tele e uiga ia Oliva Kurena, ae o lona igoa o loo ta’ua i tusitusiga paia ona sa usitai o ia i le taitaiga a le perofeta ma maua faamanuiaga folafolaina—o lona suafa ua manatuaina ma le paia. Ua tatou aoao mai ia Oliva Kurena e ui lava o le taitaiga e sau mai se punavai paia (e ala mai i perofeta), ae e le faamaonia ai se ala saogalemu e leai ni luitau, ae o folafolaga e mautinoa (tagai Alema 37:17).
Mata e faape’i o tatou olaga e aunoa ma perofeta? O le perofeta soifua ma le Peresitene o le Ekalesia ua fai ma sui o se laina tuusao o fesootaiga mai le Atua i Lona nuu ma ua na o le pau lea o le tagata i luga o le fogaeleele e mauaina faaaliga e taiala ai le Ekalesia atoa. Na te tuuina mai foi faaaliga faifai pea mai le Atua e fesoasoani ai ia i tatou e faatautaia luitau o o tatou taimi. O le uai atu i le fautuaga a le perofeta, e mafai ai ona tatou maua le filemu, olioli, ma le taitaiga i o tatou olaga a o tatou taumafai ia avea atili e faapei o Iesu Keriso. (Tagai i le Mataupu Faavae ma Feagaiga 21:4–6.)
Ia tatou taliaina aoaoga ma faataitaiga a perofeta o aso nei, i le iloaina o i latou o ni meafaigaluega i aao o le Atua ma taitai atu i tatou agai atu i faamanuiaga e faavavau. Ou te alofa ia i latou ma tatalo mo i latou. Ou te faafetai i le iloaina e musuia i latou ma fesoasoani e taitai i tatou ma o tatou aiga i lo tatou Faaola, o Iesu Keriso.