E Na’o Tusiga Faaeletonika: Talavou Matutua
O Auala e 7 e Mafai ai e le Talalelei a Iesu Keriso ona Faaleleia le Soifua Maloloina Faalemafaufau
O faamanuiaga o le talalelei e mafai ona fesoasoani ia i tatou e maua ai le filemu i le lotolotoi o faafitauli tau i le soifua maloloina faalemafaufau.
I lo’u olaga atoa, sa ou lagonaina pea lava pea o’u lagona i se tulaga loloto ma tauivi ai ma lo’u soifua maloloina faalemafaufau.
E ui lava i nei luitau, ae ua ou maua ni auala e taulima ai le popole ma le atuatuvale. Ua fesoasoani tele meafaigaluega e pei o le inuina o fualaau ma le galulue faatasi ma se tagata tomai faapitoa i le soifua mālōlōina o le mafaufau! Ae o le mea moni, o le mea e sili ona fesoasoani ia te a’u o le mafai lea ona fesootai atu i se punavai o le filemu lea e aveese ai le pogisa mai lo’u olaga: o Iesu Keriso ma Lana talalelei.
Ma e le o tuua na o a’u! Ua faaalia i suesuega e faapea, o le auai i lotu ma le faaleagaga e fesootai atu i taunuuga lelei o le soifua mālōlōina o le mafaufau.
O le ola ai i le talalelei e mafai foi ona fesoasoani ia te oe e maua ai le malamalama! O mea nei e fitu e mafai ona saunia e le talalelei a o e faafoeina tauiviga o le soifua maloloina faalemafaufau:
1. Faamoemoega ma le Taitaiga
Ona o le talalelei, ua tatou iloa ai o i tatou o fanau a matua faalelagi ma e i ai se faamoemoega o le olaga. E i ai foi sa tatou sini mulimuli e galulue agai i ai: ia avea faapei o lo tatou Faaola ma taumafai e toe foi atu i lo tatou Tama Faalelagi.
Sa aoao mai Peresiene Russell M. Nelson: “Ona o le Togiola lē i’u a Iesu Keriso, o le fuafuaga a lo tatou Tama Faalelagi o se fuafuaga e atoatoa! O se malamalamaaga i le fuafuaga ofoofogia a le Atua ua aveesea ai le mealilo mai i o tatou olaga ma masalosaloga ma lē mautonu mai lo tatou lumanai.”
O nei upumoni paia e mafai ona fesoasoani ia i tatou e tumau ai le fesootai atu i mea e sili ona taua pe a oo ina lagona e tauiviga o le soifua maloloina faalemafaufau le lē mautonu o le olaga.
2. O Se Nofoaga e Auai Ai
I le avea ai ma soo o Keriso, ua tatou lotogatasi uma lava i le mulimuli i le Faaola. E ala i le ola ai i le talalelei, e mafai ai ona tatou fausia se upegafesootai faaagafesootai o uo ma le lagolago.
Ae o le mea moni, sa aoao mai Elder Ulisses Soares: “E mafai ona ou faamautinoa atu faapea, o le malamalama o se aso fou e susulu atili i o tatou olaga pe a tatou vaai ma taulima o tatou uso a tagata ma le faaaloalo ma le mamalu ma o ni uso ma ni tuafafine moni ia Keriso.
O le avea ma se tagata o le Ekalesia e mafai ona totōina ai se lagona o le auai i totonu o i tatou. Ma o fesootaiga tatou te faia e mafai ona faaitiitia ai lagona o le tuuatoatasi lea e o faatasi ma faafitauli tau i le soifua maloloina faalemafaufau.
3. Auala Faalelagi e Taulimaina ai
Pe a tatou tauivi ma le soifua mālōlōina o le mafaufau, o tomai e taulima ai e mafai ona fesoasoani ia i tatou e faagaoioia ai o tatou lagona i se auala lelei. Ma o mausa faaleagaga e pei o le tatalo faamaoni, suesueina o tusitusiga paia, ma tapuaiga i le malumalu e mafai foi ona aoga mo le taulimaina o popolega po o le atuatuvalega. O le faia o nei mea e valaaulia ai le Agaga Paia, o lē ua igoa o le Fesoasoani (tagai i le Ioane 14:26), i o tatou olaga.
4. Taiala mo le Soifua Maloloina Faaletino
Pe a galulue faatasi ma se foma’i e taulimaina le popole po o le atuatuvale, o le auala muamua lava e puipuia ai nei faaletonu, o le ola i se olaga maloloina e ala i le taumafa i meaai tatau ma faamalositino. O le vaai atu i le Upu o le Poto (tagai i le Mataupu Faavae ma Feagaiga 89), atonu e te iloa ai pe faapefea e faamanuiaga o lenei poloaiga ona aoga i lo tatou soifua maloloina faalemafaufau.
O o tatou mafaufau, tino, ma le agaga e fesootai uma lava, ma o le mulimuli i le Upu o le Poto e fesoasoani ia i tatou e tausia ai vaega uma o i tatou lava, lea e ono maua ai foi e lo tatou soifua maloloina faalemafaufau se malosiaga manaomia.
5. Faamoemoe e ala i Feagaiga
O luitau o le soifua maloloina faalemafaufau e mafai ona lagona ai le faanoanoa ma le tele o mea e onosaia i nisi taimi.
Ae peitai o le talalelei a Iesu Keriso o se talalelei o le faamoemoe. O feagaiga tatou te osia ma le Tama Faalelagi ua tatou maua ai le mausali, saogalemu, ma mafuaaga e faamoemoe ai nai lo se isi lava mea i le lalolagi!
Na aoao mai Elder Dale G. Renlund o le Korama a Aposetolo e Toasefululua: “O le tausia o feagaiga … e tuuina mai ia i tatou le malosi e tetee atu ai i tofotofoga ma lototiga o le olaga nei. O aoaoga faavae e o faatasi ma nei feagaiga ua faafaigofie ai lo tatou ala ma aumaia ai ia i tatou le faamoemoe, mafanafana, ma le filemu.”
6. Toomaga e ala i le Auauna Atu i Isi
E ui o le auauna atu e ala i valaauga po o le auauna atu atonu e foliga mai e mamafa pe a e tauivi ma ou lava avega, ae a tatou aapa atu e siitia isi, e faigofie atu ona vaai i fafo atu o i tatou lava ma faamanatu atu i ai le alofa o le Tama Faalelagi mo i tatou.
Na molimau mai Peresitene Camille N. Johnson o le Peresitene Aoao o le Aualofa: “E mafai ona tatou faipaaga ma le Faaola e fesoasoani e tuu atu le mapusaga faaletino ma faaleagaga mo i latou e manaomia—ma i le faagasologa tatou te maua ai lo tatou lava mapusaga ia Iesu Keriso.”
7. Filemu ma Malologa
E le o faamoemoeina i tatou e le Tama Faalelagi ma Iesu Keriso ina ia atoatoa “i le taimi lenei i lo tatou alualu i luma e faavavau.” Ina ia taofia le faaatoatoaina mai le aafia ai o lo tatou soifua maloloina faalemafaufau, e mafai ona fesoasoani le manatua, i lenei olaga, e na o le pau le mea e mananao ai le Tama Faalelagi ma Iesu Keriso ia tatou liliu atu o tatou loto ia i Laua, ia faalagolago i le fesoasoani a le Faaola pe a tatou faia ni mea sese, ma tumau ai i le ala o le feagaiga.
Sa molimau mai Peresitene Nelson: “Pe a tatou tauivi e ola i tulafono maualuluga atu a Iesu Keriso, o le a amata ona suia o tatou loto ma o tatou lava natura. E siitia e le Faaola i tatou i luga a’e o faaosoosoga o lenei lalolagi pa’ū e ala i le faamanuiaina o i tatou i le alofa mamā sili atu, lotomaualalo, agaalofa, agalelei, loto-pulea, filemu, ma le malologa.”
Ou te manatu o se mea lena tatou te moomoo uma i ai—filemu ma le malologa mai avega o le olaga. Ma o le mea lena o loo ofoina mai pea e le talalelei a Iesu Keriso ia i tatou.
Mo a’u lava ia, o loo faaauau pea ona aveesea e le talalelei ia upega o le pogisa i le lalolagi ma toe fesootai mai a’u i filo o le malamalama a le Faaola.