E Le o Toe Tuuatoatasi: O Auala e 7 e Fesootai Ai

Saunia e Julianne Holt-Lunstad

Polofesa o le Mafaufau, Iunivesite o Polika Iaga

O le tuuatoatasi o se luitau lea e mafai ona faatoilaloina i ni taumafaiga, malosi faalelagona, ma le fesoasoani mai le Faaola.

o ni tagata se toalua o nofo le isi i talane o le isi

Atonu o le a tatou oo uma lava i le tuuatoatasi i nisi taimi. O lagona i nisi taimi o le tuuatoatasi e mafai moni lava ona soifua maloloina ma aoga, o se faailoilo moni lava e manaomia ona tatou fausia ni sootaga malolosi atu. Ae o le tuuatoatasi faifai pea e masani lava o se faafitauli tele i le fiafia.

O le fuafuaga o le fiafia a le Tama Faalelagi e aofia ai le faapotopotoina o i tatou i aiga ma i faapotopotoga. E fesoasoani lenei mea ia i tatou e le gata i lo tatou alualu i luma e faavavau ae faapea foi i o tatou manaoga faaletagata ia i ai faatasi ma isi, ia lagona e pei o i tatou o ni tagata o le ekalesia, ia tuuina atu ma maua le lagolago faalelagona. Ua amata ona iloa e le saienisi ia fesootaiga faaagafesootai o se manaoga moni e fesootai i lo tatou soifua maloloina ma le ola ai.

O se manaoga faaleagaga foi. Tatou te manaomia le tasi ma le isi mo lo tatou soifua manuia faaleagaga ma le tuputupu ae. Ma o se lagi e tumu i sootaga e faavavau o se manatu e faapitoa le fiafia (tagai Mataupu Faavae ma Feagaiga 130:2).

Mafaufau i manatu nei e faafetauia ai le tuuatoatasi i lou olaga:

Faalagolago i le Faaola. E silafia e lou Tama Faalelagi ma Iesu Keriso lou tuuatoatasi ma e finagalo e fesoasoani atu. O le iloaina e masani le Faaola i le tiga o le tuuatoatasi e mafai ona fesoasoani ia te oe e iloa ai e malamalama o Ia i ou lagona. O le faalatalata atili atu i le Tama Faalelagi ma le Faaola e ala i le tatalo, suesueina o tusitusiga paia, ma le tapuai i le Sapati ma i le malumalu o le a fesoasoani e te iloa ai e le tuua lava na o oe. E pei ona aoao mai Peresitene Russell M. Nelson, “Afai o le taulaiga o o tatou olaga e i luga o … Iesu Keriso ma Lana talalelei, e mafai ona tatou lagona le olioli e tusa lava po o a mea o tutupu—pe le o tutupu foi—i o tatou olaga.”
Ia faauo. O le tuuatoatasi e mafai i nisi taimi ona mafua ai ona tatou masalosalo o le faia o se taumafaiga o le a faaitiitia ai o tatou tiga. Fai se iloiloga faaletagata lava ia e iloa ai pe o e mafaufau o le a leaga mea uma. A o vaavaai atu mo ni faauoga, ia manatua o le faauo e masani ona manaomia. O le fai atu talofa i se tuaoi e mafai ona faia ai se eseesega. Ma o le sailia o avanoa e faamanuia ai olaga o isi o loo tauivi foi ma le tuuatoatasi atonu o ni faalavefau aupito malolosi ia o mea uma.
Fausia i luga o ni mea e fiafia uma i ai. Saili tagata ma vaega o mea latou te fiafia i ai, vaaiga, ma tulaga faatonuina e talitutusa ma oe. E mafai ona e vaavaai mo (pe mafaufau foi e amata!) se kalapu tusi, kalapu auauna atu, kalapu o savaliga sopo, vaega o pesepesega, afiafi faaleaiga, po o se vaega o tagata ua leai ni fanau.
Faamalosia sootaga o i ai nei. O le toatele o tagata ua i ai sootaga ma aiga, uo, tuaoi, ma tagata o le uarota. O le faafaileleina o nei sootaga o i ai nei o se nofoaga sili lea e amata ai pe a faafetauia le tuuatoatasi. O faauoga e alu ai le taimi e fausia ai i se tulaga masani, o lea ia onosai a o e faafaileleina sootaga. Manatua o le tulaga lelei o au fegalegaleaiga e sili atu ona taua nai lo le aofai o ou sootaga o i ai.
Saili avanoa e auauna atu ai ma faasoa atu au taleni ma meaalofa faaleagaga. E toetoe lava a le tapulaa avanoa e auauna atu ai ma tautua i le Ekalesia, o tatou aiga, ma le nuu. A tatou lagonaina o loo i ai se aafiaga lelei o a tatou taumafaiga i isi, e mafai ona aumaia ai se lagona o le uiga ma le faamoemoega i o tatou olaga. O le lagonaina o o tatou olaga e i ai se uiga [taua] i isi o se tapulaa malosi lea i le tuuatoatasi.
Fuafua mo taimi luitauina O aso malolo ma aso taua, e pei o le faamanatuina o le tausaga o le maliu o se tasi e pele, e mafai ona faigata. Taumafai e fuafua ni gaoioiga faatasi ma uo po o aiga i aso faapena e taofia ai mai le nofo ai i fesootaiga e te moomoo maimau pe ana i ai ia te oe.
Auai i galuega o le malumalu ma talafaasolopito o aiga O se auala mamana lenei e lagona ai le mafanafana ma le auai. Na folafola mai e Elder Dale G. Renlund o le Korama a Aposetolo e Toasefululua le tele o faamanuiaga e mafai ona tatou maua, e aofia ai le “alofa faateleina ma le talisapaia o tuaa ma aiga o loo soifua pea, o lea tatou te le toe lagona ai le tuuatoatasi.”

Mo le toatele o tagata, o le tuuatoatasi o se luitau lea e mafai ona faatoilaloina i ni taumafaiga, malosiaga faalelagona, ma le fesoasoani mai le Faaola.