Matou te Molimau Atu i lo Tatou Perofeta Soifua

Matou te faafetai ia te Oe le Atua, mo le perofeta.

ata pue o Peresitene Russell M. Nelson o loo ataata

Ou te iloa o Peresitene Russell M. Nelson o se perofeta a le Atua, ma ou te faafetai e fetalai mai le Atua ia te ia. O le alofa o Peresitene Nelson mo i tatou o se tasi lea o faaaliga o le alofa o le Atua. Ou te alofa ia Peresitene Nelson. O folafolaga ua ia folafola mai e a le Atua ia.

Justine Hinautan, Filipaina

Ryan Hulme

Ua aoao mai a’u e Peresitene Nelson o le mea aupito sili ona taua i aso nei o le filifili lea o Keriso e ala i le faatauaina ma le faamamaluina o feagaiga.

Ryan Hulme, Niu Sila

Ou te matua faafetai lava mo le perofeta, o Russell M. Nelson. Ou te molimau atu o ia o se alii ua valaauina e le Atua e taiala ma faamalosia i tatou i aso e gata ai. Afai tatou te mulimuli i lana fautuaga, o le a lelei mea uma.

Nelson Almeida, Cabo Verde

Brenda Boyle

Faafetai atu, Peresitene Nelson, mai le taele o o matou loto mo le tuuina mai ia i matou o upu o le poto mai lo tatou Tama Faalelagi. Ia faamanuia oe e le Atua, lo tatou perofeta pele!

Brenda Boyle, Sikotilani

Thuong Putheary

Faafetai atu, Peresitene Nelson, mo au aoaoga musuia ma faagaeetia. Matou te alolofa ia te oe.

Thuong Putheary, Kemupotia

Ou te matua faafetai lava mo le alofa ma malamalamaaga ua ofoina mai e Peresitene Nelson o se perofeta. O lana lauga i le malumalu na aumaia ai a’u agai i le mauaina o o’u faaeega paia, o lona tuuto i le autalavou matutua ua faamanatu mai ai ia te a’u ia iloa lo’u faasinomaga sili o se atalii o le Atua, ma o lana uunaiga mo le faapotopotoina o Isaraelu ua avea ma se autu faifai pea i totonu o lo’u aiga ma le nuu o le uarota. O le mea e sili ona taua, ua ia fesoasoani ia te a’u e faalatalata atili atu i lo’u Faaola.

Grace Burt, Iunaite Setete

Ana Montoya

Ua ou mafaufau loloto lava i aoaoga a lo tatou perofeta pele, o Russell M. Nelson. O Ana aoaoga ua musuia ai lo’u olaga. O ana upu faaperofeta ua uunaia ai a’u e faaauau pea ona agai i luma ma ia ola atoatoa atili i lenei lalolagi fesuisuiai ma feteenai. Ou te lagona le saogalemu tele i le iloa o loo i ai so tatou perofeta i o tatou aso o le e apoapoai mai ia i tatou ia maua se agaga o le filemu, e aloese mai finauga ma a tatou uo. Ou te faatauaina ana aoaoga maoae.

Ana Montoya, Honduras

David G. Fernandes

E i ai sa’u molimau mausali o Peresitene Russell M. Nelson o le perofeta a le Atua mo aso e gata ai. Sa ou maua le avanoa e molimauina moni ai lava lona lotomaualalo, lona faafaigofieina, ma le alofa ua ia lagonaina mo tagata. O le mea moni, o ia o le tamalii filifilia e taitaia le malo o le Atua i le lalolagi i lenei taimi tulaga ese. Sa ou faalogo ma mulimuli i ana fautuaga, lea na taialaina a’u e ola i se olaga amiotonu ma feagai ma luitau o le olaga faaletino. Ou te lagonaina le alofa tele mo Peresitene Nelson, ma ua ou iloa lona sao tulaga ese i le alualu i luma o le malo o le Atua ma le faapotopotoina o Isaraelu e ala i ana musumusuga ma faasilasilaga mo le fausiaina o malumalu i le lalolagi atoa.

David G. Fernandes, Pasila

Saúl Alfredo Rojas de León

I le aso 24 o Aokuso, 2019, na saunoa ai le perofeta i le faaSipaniolo ma sa faatonuina i matou i le tausiga o poloaiga a le Alii. Sa ou lagonaina le malosi tele o le alofa o Iesu Keriso mo le taumafaiga a le perofeta i le aoaoina o la matou gagana. Ou te iloa e ala mai i le perofeta soifua, e uunaia, aoaoina, puipuia, taiala, ma faamanuia ai i tatou e le Atua.

Saúl Alfredo Rojas de León, Kuatemala