E Na’o Tusiga Faaeletonika
Mauaina o “se Mafuaaga mo le Fiafia”
Ina ua lagona le mamafa o lo’u loto, sa faamanatu mai e upu a se perofeta ia te a’u ia ou olioli.
Ina ua oo mai le faamai o le KOVITI-19, sa ou auauna o se faifeautalai i le Ripapilika o Tominikana. O a’u uluai siitaga e tolu o se faifeautalai sa le faigofie, ae sa ou lagona le faafetai mo mea uma sa ou aoaoina ma sa ou fiafia e faaauau pea ona tuputupu ae o se soo o Iesu Keriso.
O lea ina ua auina atu a’u i le fale mo le tolu masina, sa ou le mautonu ma nutimomoia lo’u loto. O lo’u olaga sa pei e le mautonu ma faaletonu. Na iu lava ina toe tofia a’u i le Aai o Aioua, ISA. E ui lava sa vave ona ou alofa ia Aioua ma tagata iina, ae sa ou lagonaina e pei ua ou toe amata. Sa faigata le fetuunaiga, ma sa ou tauivi ma lagona o le le agavaa, popole, ma le tuuatoatasi.
Sa ou tatalo i aso uma mo se ituaiga o toomaga. Sa mamafa o’u lagona, ma sa ou tauivi e tauaveina na o a’u.
I le taimi o la’u suesuega patino, sa ou faitau ai i se upusii a Peresitene Gordon B. Hinckley (1910–2008) lea na fesoasoani i lo’u loto e lagona ai le māmā. Sa ia faasoa mai:
“Sa fetalai mai le Alii: ‘O le mea lea, ia sii aʼe i luga lou loto ma olioli, ma pipii i feagaiga ua e faia.’ (Mataupu Faavae ma Feagaiga 25:13.)
“Ou te talitonu o loo ia fetalai mai ia i tatou taitoatasi, ia fiafia. O le talalelei o se mea e olioli ai. Ua aumaia ai ia i tatou se mafuaaga mo le fiafia.”
Sa amata ona ou vaai i le upu olioli i tusitusiga paia i se malamalama fou. O se valaaulia mai le Alii ia fiafia. E sili atu le silafia e le Tama Faalelagi ma Iesu Keriso nai lo soo se tasi o luitau, tiga, ma faigata tatou te feagai—ae o loo Laua valaaulia pea i tatou ia fiafia.
Sa ou filifili e talia lena valaaulia. E ui lava e lei suia o’u tulaga ma e lei mou ese atu o’u lagona faanoanoa, ae sa ou lagonaina se lagona loloto atu, ma le faavae o le lotofaafetai ma le olioli mo faamanuiaga ma folafolaga o le talalelei a Iesu Keriso.
O faataitaiga mai tusitusiga paia ua faaali mai ai ia i tatou le auala na maua ai e le Au Paia mai le taimi ua tuanai le olioli e oo lava i tulaga sili ona faigata. I le Helamana, tatou te vaaia ai tagata o le Ekalesia o e na liliu atu i le talalelei ina ia maua le olioli e ui lava ina sa sauaina e isi:
“Ae ui i lea sa latou anapopogi ma tatalo pea lava pea, ma sa faasolo malolosi ma faatupulaia ai pea i lo latou lotomaualalalo, ma mausali ma atili mausali ai i le faatuatua ia Keriso, seia oo ina faatutumuina o latou agaga i le olioli ma le faamafanafanaga, ioe, seia oo ina faamamaina ma faapaiaina o latou loto, o le faapaiaga lea e oo mai ona o lo latou tuuina atu o o latou loto i le Atua” (Helamana 3:35).
Pe a tatou vaavaai atu i le Faaola i o tatou tofotofoga, e mafai ona faatumulia o tatou agaga i le olioli ma le faamafanafanaga. O le faia o lena mea, tatou te aoao ai e faaogatusa lelei o tatou loto ma le Alii.
A o faaauau pea ona ou faataitaia le olioli, ua ou maua se lagona sili atu o le malosi i le feagai ai ma faigata. Sa ou feagai talu ai nei ma se le fiafia lea na tuua ai a’u ma se faanoanoaga. Ae a o ou toe mafaufau i o’u lagona, sa mafai ona ou iloa le tele o lo’u tuputupu ae talu mai lo’u taimi o se faifeautalai.
E lei lagonaina le faalavelaveina o lo’u faanoanoa, aua ua ou iloaina o le fiafia moni o le ola ai lea i le talalelei a Iesu Keriso. E le faapea o le a tatou le oo lava i ni faigata pe o le a tatou feagai ma luitau uma ma le alofa tunoa atoatoa.
Ua aoao mai Elder Neil L. Andersen o le Korama a Aposetolo e Toasefululua:
“Tatou te saili mo le fiafia. Tatou te moomoo mo le filemu. Tatou te faamoemoe mo le alofa. Ma e faamanuia i tatou e le Alii i le anoanoai o faamanuiaga ofoofogia. Ae faatasi ai ma le olioli ma le fiafia, e tasi le mea e mautinoa: o le a i ai taimi, o itula, o aso, o nisi taimi o le tele o tausaga o le a lagona ai e lou agaga le manu’a.
“Ua aoao mai tusitusiga paia o le a tatou oo uma i taimi tiga ma taimi fiafia ma o le a i ai le ‘faafeagai o mea uma’ [2 Nifae 2:11].”
E mafai ona ola faatasi le faanoanoa ma le olioli. Faavauvau ma le lotofaafetai. Tiga ma le lelei. O le mea moni, o o’u aafiaga i mea le lelei i le olaga ua faalauteleina ai lo’u tomai e lagona ai ma faatagaina ai a’u e atiina ae se gafatia sili atu e olioli ai i mea lelei. O upumoni matagofie o le talalelei e faamama ai o’u tiga. O loo latou tiga pea ae ua siomia i se alofa loloto mo le Faaola, o se talisapaia o vavega matagofie ua faatumulia ai lo’u olaga, o se faatuatuaga o le a galulue faatasi uma mo lo’u lelei, ma se lagona loloto o le olioli.