O Leo o le Au Paia o Aso e Gata Ai

O Le Agaga Na Faia le Eseesega

Saunia e Lisa Nielsen Young, Karolaina i Saute, ISA

Sa mafai ona ou lagonaina le alofa o tagata o le uarota a o latou usuina e aunoa ma la’u piano.

Ata na tusia e Katy Dockrill

Sa matou nonofo i se taulaga laitiiti i Georgia, ISA, ina ua maliu lo’u tamā i le na o le 55 tausaga le matua. O le toatele o lo matou aiga sa nonofo i se isi setete. E lei i ai lava se taimi na sili atu ai le mamao o le 2,000 maila (3,200 km) i lo matou va nai lo lena taimi.

O lo’u toalua o le epikopo ma o a’u o le ta okeni a le matou uarota laitiiti. Faatasi ai ma lagona uma ma le atuatuvale o le fesoasoani atu i fuafuaga o maliu, sa ou lagonaina le matuai vaivai lava i lena Aso Sa ina ua oo i le taimi mo la matou viiga faaiu o le sauniga faamanatuga: “Tu Ieova i lo Tatou Va” (Viiga, nu. 89).

I le afa o le fuaiupu lona lua, sa lofituina a’u i lo’u faavauvau. I se isi itu, sa ou taina e oo i le faaiuga o lena fuaiupu, ae sa gatete o’u lima ma sa tumu o’u mata i loimata ma sa tatau ai ona ou taofi i se fuaiupu atoa na totoe. Sa le mafai ona taofi lo’u tagi.

Sa sosoo ai ma se malologa puupuu ina ua iloa e le potopotoga ua leai se okeni. Ae na amata ona usuina e tagata o le uarota e aunoa ma se piano. Sa lei atoatoa ia pese. Sa toalaiti lava i matou. Ae na faia e le Agaga le eseesega. E ala i o’u loimata ma le maasiasi, sa mafai ona ou lagonaina le alofa o le toatele a o latou pepese.

Tu Ieova i lo tatou va;

Siomia i lona alofa;

Pe a oo mai le oti.

Seia tatou toe feiloai.

Ina ua uma le viiga, sa fusi au e le taitai musika a o ou tagi masusū i le tatalo faaiu. Ona o mai lea o ni nai tagata i le okeni ma loimata i o latou mata e ta’u mai lo latou agaga faanoanoa e uiga i lo’u tamā.

Mulimuli ane, sa ou ta’u atu i le taitai musika o le a ou taina le piano i le falelauasiga. Atonu sa foliga mai o se manatu leaga ina ua mavae le mea lea faatoa tupu, ae sa fiafia tele lo’u tamā e faalogo mai o o’u taina le piano. Sa ou manao e tatā mo ia. Sa ou iloaina i lena taimi le latalata tele o ona lagona i le taimi o le viiga faaiu.

Ou te matua faafetai lava mo viiga. Ou te molimau atu e mafai e musika ona aoao ma faamafanafana i tatou i auala e masani ona le mafai e upu. E pei ona tusia e le Au Peresitene Sili i le faatomuaga o le tusipese, “O viiga … e faamafanafana i e vaivai, faamafanafana i e faanoanoa, ma uunaia i tatou ia tumau e oo i le iuga.” Ou te faafetai foi mo le alofa o se uarota lelei ina ua ou mamao ese mai lo’u lava aiga. Ou te iloa o le a ma toe feiloai moni lava ma lo’u tamā.